Read bariba Womusu 35 Bible Online

Womusu 35 - bariba bible

Womusu 35

¹Dɑfidin womu. Yinni Gusunɔ, be bɑ mɑn wɔrim wee, ɑ bu wɔrio. Be bɑ kɑ mɑn sɑnnɑmɔ, ɑ kɑ bu sɑnnɔ.

²A tɛrɛ piibu kɑ bɑkɑru suo, kpɑ ɑ nɑ ɑ mɑn somi.

³A wunɛn yɑɑsɑ suo ɑ be bɑ mɑn nɔni sɔ̃ɔmɔ sɔ̃ɔsi, kpɑ nɑ n yɛ̃ mɑ wunɑ ɑ sɑ̃ɑ nɛn fɑɑbɑ kowo.

⁴A de be bɑ mɑn kɑsu bu ɡo bu sekuru wɑ. A de be bɑ kĩ n kɑm ko bu biti soorɑ kpɑ bu biru wurɑ.

⁵A de bɑ n sɑ̃ɑ nɡe yɑkɑ si woo ɡɑ kɑ doonɔ, kpɑ Yinni Gusunɔn ɡɔrɑdo u bu ɡirɑ.

⁶A de ben swɑɑ yu wɔriɑ, kpɑ yɑm wɔ̃kuru tu ye wukiri. Kpɑ Yinni Gusunɔn ɡɔrɑdo u bu nɑɑ swĩi.

⁷Wee nɑ ǹ ɡɑ̃ɑnu kue bɑ kɑ mɑn suurɑ bɛriɑmmɛ.

⁸A de bu kɑm ko subɑru sɔɔ, bu wɔri ben suurɑ ye sɔɔ, bu ɡbi.

⁹Kpɑ nɑ n nuku dobu mɔ̀ wunɛn sɔ̃ Yinni Gusunɔ, fɑɑbɑ ye ɑ mɑn kuɑn sɔ̃.

¹⁰Kpɑ sɑɑ nɛn ɡɔ̃ru sɔɔn di, n nɛɛ, ɡoo sɑri wi u dɑm mɔ nɡe wunɛ. Domi ɑ nɛ wɔnwɔndo yɑrɑ sɑɑ wi u mɑn dɑm keren nɔmɑn di.

¹¹Wee, wee kowobu bɑ seewɑ bɑ mɑn ɡɑri mɑnimɔ yi nɑ ǹ yɛ̃.

¹²Nɑ̀ n bu ɡeɑ kuɑ, kɔ̃sɑ bɑ rɑ mɑn kɔsie, kpɑ bu mɑn deri nɛ turo.

¹³Adɑmɑ sɑnɑm mɛ nɛn yibɛrɛ be, bɑ bɑrɔ, nɑ sɑɑkin yɑberu sebuɑ nuku sɑnkirɑrun sɔ̃. Mɑ nɑ tii tɔ̃yɑ mɔ̀ kɑ nɔɔ bɔkuru. Nɑ rɑ n yiirewɑ nɑ n kɑnɑru mɔ̀,

¹⁴nɑ n sɑ̃ɑ nɡe ben kpɑɑsi, ǹ kun mɛ nɡe ben mɛro bisi. Nɑ nuki sɑnkire nɡe wi u win mɛro biɑ.

¹⁵Adɑmɑ be, bɑ rɑ mɛnnɛwɑ bu nuku dobu ko, sɑnɑm mɛ nɑ sokurɑ. Bɑ rɑ mɛnnɛwɑ nɛn biru bu kɑ mɑn kɔ̃sɑ bwisikusi, kpɑ bɑ n mɑn yɑɑ kɑsikimɔ bɑɑdommɑ.

¹⁶Bɑɑ kɑ be bɑ ǹ Gusunɔ yɛ̃ bɑ mɑn yɛ̃ɛmɔwɑ. Bɑ mɑn kɔ̃rusi, bɑ nɔɔ dɔnnɛ ɡbɑm ɡbɑm.

¹⁷Yinni, sere dommɑ kɑɑ n yenibɑ mɛɛrɑ. A ku de bu mɑn wɔri, domi bɑ sɑ̃ɑwɑ nɡe ɡbee sinɑ kpɛnsu.

¹⁸Wunɑ kon siɑrɑ mi wunɛn tɔmbɑ mɛnnɛ, kpɑ n nun bɛɛrɛ wɛ̃ tɔn dɑbinun suunu sɔɔ.

¹⁹A ku de be bɑ sɑ̃ɑ nɛn yibɛrɛbɑ bɑ n mɑn yɛ̃ɛmɔ kɑm sɔɔ, kpɑ be bɑ mɑn tusɑ kɑm sɔɔ bɑ n mɑn wɔmmɔ kɑ ɡɔnibu.

²⁰Domi ben ɡɑri ɡerubu kun do. Kɔ̃sɑ bɑ rɑ n tɔmbu mɑnimɔ, be bɑ wɑ̃ɑ bɔri yɛndu sɔɔ tem mɛ sɔɔ.

²¹Bɑ rɑ n mɑn nɔɔ ɡɛ̃ɛwɑ bɑ n mɔ̀, bɑ mɑn wɑ.

²²Yinni Gusunɔ, wunɑ ɑ ye kpuro wɑɑmɔ. Yen sɔ̃, ɑ ku nɔɔ mɑri, ɑ ku mɑɑ kɑ mɑn tondɑ.

²³Gusunɔ, nɛn Yinni, ɑ seewo ɑ mɑn siriɑ. A kɑ mɑn yinɔ.

²⁴Gusunɔ nɛn Yinni, ɑ sɑ̃ɑwɑ ɡemɡii, ɑ mɑn sirio, kpɑ bu ku rɑɑ mɑɑ nuku dobu ko nɛn sɔ̃,

²⁵bu ɡere ben ɡɔ̃ruɔ bu nɛɛ, wee, ye bɑ kĩ, yɑ koorɑ, bɑ mɑn kɑmiɑ.

²⁶A de be, be bɑ nuku dobu mɔ̀ nɛn wɑhɑlɑn sɔ̃, be kpuro bu sekuru wɑ sɑnnu sɑnnu. A de be, be bɑ mɑn seesimɔ, bu sekuru wɑ tɑ n kpɑ̃.

²⁷Adɑmɑ ɑ de be bɑ nuku dobu mɔ nɛn tɑɑrɛ sɑrirun sɔ̃ bu yɛ̃ɛri, kpɑ bɑ n wunɛ Yinni Gusunɔ siɑrɑmɔ bɑɑdommɑ, wunɛ, wi ɑ kĩ nɛ, wunɛn sɔm kowo nɑ n wɑ̃ɑ bɔri yɛndu sɔɔ.

²⁸Yinni, nɑ kon wunɛn ɡem ɡɑri kpɑrɑ. Kon mɑɑ nun tɔmɑ bɑɑdommɑ.