Read bariba Womusu 37 Bible Online

Womusu 37 - bariba bible

Womusu 37

¹Dɑfidin womu. A ku tii nɔwiɑ ko tɔn kɔ̃sobun sɔ̃. A ku kɑ kɔ̃sɑn kowobu kinɛnu ko.

²Domi bɑ rɑ mundewɑ nɡe yɑkɑ ɡbebusu, kpɑ bu yɑndɑ nɡe yɑkɑ bekusu.

³A n Yinni Gusunɔ nɑɑnɛ sɑ̃ɑ kpɑ ɑ n ɡeɑ mɔ̀. Nɡe mɛyɑ kɑɑ n kɑ wɑ̃ɑ yeru mɔ tem mɛ sɔɔ, kpɑ ɑ n bɔri yɛndu mɔ.

⁴A wunɛn nuku dobu kɑsuo Yinni Gusunɔn mi. U koo mɑɑ nun wɛ̃ ye wunɛn ɡɔ̃ru ɡɑ kĩ.

⁵A Yinni Gusunɔ wunɛn wɑ̃ɑru nɔmu sɔndio, ɑ n nùn nɑɑnɛ sɑ̃ɑ. Wiyɑ u koo nun kpuro wunɑnɑ.

⁶U koo de wunɛn ɡem mu sɔ̃ɔsirɑ nɡe sɔ̃ɔ wii wɔllun sɔ̃ɔ.

⁷Wi u kpĩɑ u kɔ̃sɑ kuɑ ye u ɡɔ̃ru doke, ɑ ku tii nɔwiɑ ko win sɔ̃. A n mɑɑri kpɑ ɑ n Yinni Gusunɔ swɑɑ dɑki.

⁸A mɔru derio, ɑ nuku ɡbisibu yinɔ, ɑ ku tii nɔwiɑ ko. Ye kpurowɑ yɑ koo rɑ nun kɔ̃sɑ koosiɑ.

⁹Domi bɑ koo tɔn kɔ̃sobu kpeerɑsiɑ, ɑdɑmɑ be bɑ Yinni Gusunɔ nɑɑnɛ sɑ̃ɑ, berɑ bɑ ko n tem mɛ mɔ.

¹⁰N tie fiiko ye tɔn kɔ̃sobɑ kun ko n mɑɑ kɑ wɑ̃ɑ. Bɑɑ ɑ̀ n mɛɛrɑ mi bɑ rɑɑ wɑ̃ɑ, ɑ ǹ mɑɑ bu wɑsi.

¹¹Adɑmɑ be bɑ tii yɛ̃, bɑ koo tem mɛ tubi di, kpɑ bɑ n yɛ̃ɛrimɔ ɡem ɡem ɑlɑfiɑ sɔɔ.

¹²Tɔn kɔ̃sobɑ ɡemɡibu bwisiku kɔ̃sunu koosimɔ, mɑ bɑ bu wiru diirisimɔ.

¹³Yinni u tɔn kɔ̃so be yɛ̃ɛmɔ, u yɛ̃ mɑ tɔ̃rɑ bu sisie.

¹⁴Tɔn kɔ̃sobɑ ben tɑkobi womɑmɔ, mɑ bɑ ben tɛnnu bɛrimɔ bu kɑ sɑ̃ɑrobu kɑ wɔnwɔndobu hunde wunɑ, kpɑ bu be bɑ ɡeɑ mɔ̀ ɡo.

¹⁵Adɑmɑ ben tɑkobi be, bɑ koo duwɑ ben tiin toronɔ, kpɑ ben tɛnnu nu bɔɔkirɑ.

¹⁶Gɑ̃ɑ piimii ni ɡemɡii u mɔ, nu tɔn kɔ̃so dɑbinun dukiɑ kere.

¹⁷Domi bɑ koo tɔn kɔ̃sobun dɑm kpeerɑsiɑ, ɑdɑmɑ Yinni Gusunɔ u yɔ̃ ɡemɡibun biruɔ.

¹⁸Yinni Gusunɔ u yɛ̃ ye n koo tɑɑrɛ sɑriruɡibu deemɑ ben wɑ̃ɑru sɔɔ. Ben yɛnu ɡɑ ǹ bɑnsu mɔ̀.

¹⁹Bɑ ǹ sekuru wɑsi wɑhɑlɑn sɑɑ sɔɔ. Bɑ ko bɑ n mɑɑ deburu mɔ ɡɔ̃ɔrun sɑnɑm.

²⁰Adɑmɑ tɔn kɔ̃sobɑ koo kɑm ko. Yinni Gusunɔn yibɛrɛbɑ bɑ kɑ yɑkɑsun wɛ̃su weenɛ. Bɑ koo yɑrinɑwɑ nɡe dɔ̃ɔ wiisu.

²¹Tɔn kɔ̃sobu bɑ̀ n bɔkurɑ, bɑ ku rɑ wesie. Adɑmɑ ɡemɡii u rɑ kɛ̃ kɑ nuku tiɑ.

²²Be Yinni Gusunɔ u domɑru kuɑ, bɑ ko n tem mɛ mɔ, ɑdɑmɑ be u bɔ̃rusi, beyɑ bɑ koo kpeerɑsiɑ.

²³Yinni Gusunɔ u rɑ tɔn ɡeo kpɑre win sɑnum sɔɔ. Yɛ̃ron swɑɑ rɑ nùn wɛ̃re.

²⁴Ù n sokurɑ u wɔrumɑ, u rɑ sewɑ, domi Yinni Gusunɔ u win nɔmɑ nɛni.

²⁵Nɑ rɑɑ sɑ̃ɑ bii, tɛ̃ nɑ bukurɑ. Nɑ ǹ mɑɑ wɑɑre Gusunɔ u ɡemɡii deri, ǹ kun mɛ win bibu bu bɑrɑ ko bu kɑ di.

²⁶Bɑɑdommɑ u wɛ̃ɛmɔ kɑ nuku tiɑ. U ǹ be bɑ bɔkurɑmɔ yinɑrimɔ. Win bibu bɑ rɑ mɑɑ ɡɑbu ɑrufɑɑni kue.

²⁷A kɔ̃sɑ derio kpɑ ɑ ɡeɑ ko, kpɑ wunɛn bibun bweseru tɑ n tem mɛ mɔ kɑ bɑɑdommɑɔ.

²⁸Yinni Gusunɔ u ɡem kĩ. U ǹ win tɔmbu derimɔ, u rɑ n bu kɔ̃su. Adɑmɑ bɑ koo tɔn kɔ̃sobun bweseru kpeerɑsiɑ.

²⁹Gemɡibɑ ko n tem mɛ mɔ, kpɑ bɑ n wɑ̃ɑ mi, kɑ bɑɑdommɑɔ.

³⁰Gemɡiin nɔɔ, ɡɑri bwisiɡiiyɑ ɡɑ rɑ yɑre. Win yɑrɑ, ɡemɑ yɑ rɑ mɑɑ ɡere.

³¹Gusunɔn woodɑ yɑ rɑ n wɑ̃ɑ win ɡɔ̃ruɔ. Win nɑɑsu kun mɑɑ sokurɑmɔ.

³²Tɔn kɔ̃so u rɑ n ɡemɡii sɑ̃kiriɑmmɛwɑ, kpɑ u n swɑɑ kɑsu u kɑ nùn ɡo.

³³Adɑmɑ Yinni Gusunɔ kun derimɔ u nùn nɔmɑ turi. U ǹ mɑɑ nùn tɑɑrɛ wɛ̃ɛmɔ siribun sɑnɑm.

³⁴A n Yinni Gusunɔ yĩiyɔ kpɑ ɑ n win swɑɑ swĩi. U koo nun wɔlle suɑ kpɑ ɑ n kɑ tem mɛ mɔ. Kɑɑ wɑ tɔn kɔ̃sobɑ kpeerɔ.

³⁵Nɑ tɔn kɔ̃sobu wɑ kɑ ben dɑm kpuro, bɑ yɛki nɡe dɑ̃ɑ kɛriɡiru te tɑ kpɑre.

³⁶Adɑmɑ ben bɑɑ yɑ doonɑ, wee bɑ ǹ mɑɑ wɑ̃ɑ. Nɑ bu kɑsu, ɑdɑmɑ bɑ ǹ wɑɑrɔ.

³⁷A tɑɑrɛ sɑriruɡii mɛɛrio kpɑ ɑ n nùn lɑsɑbu sɑ̃ɑ. Domi wi u rɑ bɔri yɛndu kɑ̃n bweserɑ kun kpeemɔ.

³⁸Adɑmɑ mɛm nɔɔ sɑriruɡibɑ koo kɑm kowɑ kpuro, kpɑ tɔn kɔ̃sobun bweseru tu kpeerɑ.

³⁹Yinni Gusunɔwɑ u ɡemɡibu fɑɑbɑ mɔ̀. Wiyɑ u rɑ bu bere nɔni swɑ̃ɑrun sɑnɑm.

⁴⁰U bu somimɔ, u bu wɔrɑmɔ tɔn kɔ̃sobun nɔmɑn di, u bu fɑɑbɑ mɔ̀, domi win miyɑ bɑ ben kuku yeru kɑsu.