Read bariba Womusu 39 Bible Online

Womusu 39 - bariba bible

Womusu 39

¹Dɑfidin womu ɡe u Yedutum, wom kowobun wiruɡii kuɑ. U nɛɛ,

²nɑ rɑɑ nɛɛ, kon nɛn sɑnu sɑnusu lɑɑkɑri ko kpɑ n ku durum ko nɛn ɡɑri ɡerubu sɔɔ. Kon nɛn nɔɔ kpĩ sɑnɑm mɛ nuku kɔ̃suruɡii wɑ̃ɑ nɛn bɔkuɔ.

³Nɑ rɑɑ mɑɑri, nɑ ǹ ɡɑ̃ɑnu ɡeruɑ, mɑ nɑ deemɑ n kuɑ kɑm, domi nɛn nɔni swɑ̃ɑru tɑ sosiwɑ.

⁴Nɛn lɑɑkɑri yɑ seewɑ. Ye nɑ bwisikumɔ yɑ mɑn nɛni nɡe dɔ̃ɔ, mɑ nɑ ɡeruɑ nɑ nɛɛ,

⁵Yinni Gusunɔ, ɑ mɑn nɛn wɑ̃ɑrun sɑkɑ sɔ̃ɔsio kpɑ nɑ n yɛ̃ nɡe mɛ nɑ ǹ dɑm mɔ.

⁶N wee ɑ nɛn tɔ̃ru yĩirɑ kɑ wunɛn nɔmɑn yɑsum, mɑ nɛn wɑ̃ɑrun sɑnɑm kun ɡɑ̃ɑnu turɑ wunɛn nɔni sɔɔ. Kɑ ɡeemɑ tɔnu bɑɑwure koo doonɑ nɡe woo tiɑ,

⁷ǹ kun mɛ nɡe tiro. Ye u mɔ̀ kpuro kɑmɑ. U ɑrumɑni mɛnnɑmɔ, u ǹ yɛ̃ wɑrɑ koo ye di.

⁸Tɛ̃ Yinni, mbɑ nɑ mɑɑ mɑrɑ. Nɛn yĩiyɔbu wɑ̃ɑ wunɛ sɔɔ.

⁹A mɑn yɑkio nɛn durum kpuron di. A ku de ɡɑri bɑkɑsu su n mɑn yɑɑkoru mɔ̀.

¹⁰Kon mɑri, nɑ ǹ ɡɑri ɡerumɔ, domi wunɑ ɑ derɑ yɑ koorɑ mɛ.

¹¹A ku mɑɑ mɑn wɑhɑlɑ ko. Nɑ wɑsikirɑmɔ wunɛn nɔm ɡɛrɑn sɔ̃.

¹²A rɑ tɔnu ɡerusi kpɑ ɑ nùn sɛɛyɑsiɑ win torɑnun sɔ̃. Ye tɔnu u kĩ, yerɑ ɑ rɑ di nɡe kɔkɔbu. Geemɑ, tɔnu bɑɑwure u koo doonɑwɑ nɡe woo tiɑ.

¹³Yinni Gusunɔ, ɑ nɛn kɑnɑru nɔɔwɔ, kpɑ ɑ nɛn sokuru swɑɑ dɑki. A ku nɛn wuri ɑtɑfiiru ko, domi nɑ sɑ̃ɑwɑ sɔɔ wunɛn mi nɡe nɛn sikɑdobɑ kpuro.

¹⁴A mɑn derio sɛ̃ɛ, kpɑ n wom wɑ n sere sɑriru ko.