Read bariba Womusu 4 Bible Online

Womusu 4 - bariba bible

Womusu 4

¹Dɑfidin womu ɡe u wom kowobun wiruɡii kuɑ kɑ mɔrɔku. Ge wee.

²Gusunɔ, nɑ̀ n wɑ̃ɑ nɔni swɑ̃ɑru sɔɔ, wunɑ ɑ rɑ mɑn somi. Nɑ̀ n nun sokɑ, ɑ mɑn wurɑrio. A nɛn wɔnwɔndu wɑɑwo, ɑ nɛn kɑnɑru nɔɔwɔ, wunɛ wi ɑ rɑ mɑn sirie.

³Bɛɛ tɔmbu, sere sɑɑ yerɑ̀ i ko i n mɑn wɔmmɔ. Bɛɛ tɔmbu, sere sɑɑ yerɑ̀ i ko i n kɑm ɡire. Bɛɛ tɔmbu, sere sɑɑ yerɑ̀ i ko i n weesu swĩi.

⁴I n yɛ̃ mɑ Gusunɔ u rɑ tii nɑɑnɛɡii ɡɔsie. I n yɛ̃ mɑ Gusunɔ u rɑ nɛn nɔɔ nɔ.

⁵I bwisikuo ɡɔ̃ruɔ bɛɛn kpin yenɔ kpɑ i mɑri. I diirio bɛrum sɔ̃ kpɑ i durum deri.

⁶I Yinni Gusunɔ nɑɑnɛ dokeo. I yɑ̃kunu koowo ni u bikiɑmɔ.

⁷Tɔn dɑbirɑ weeweenu mɔ̀ tɑ mɔ̀, Gusunɔ, ɑ kɑ sun bɔri yɛndu nɑɑwɔ. Yinni, ɑ kɑ sun nɔnu ɡeu mɛɛrio.

⁸Adɑmɑ nɛ, nɑ rɑ n nuku dobu mɔ n kere be bɑ dĩɑnu yibɑ. Nɑ rɑ n yɛ̃ɛrimɔ n kere be bɑ tɑm yibɑ.

⁹Nɑ̀ n kpunɑ nɑ rɑ dweeye kɑ bɔri yɛndu, domi wunɛ turowɑ ɑ mɑn kɔ̃su, Yinni Gusunɔ.