Read bariba Womusu 45 Bible Online

Womusu 45 - bariba bible

Womusu 45

¹Kĩrun womu ɡe Koren bibu bɑ wom kowobun wiruɡii kuɑ. Ge wee.

²Nɛn ɡɔ̃ru ɡɑ bwisiku duronu yibɑ sere nu yɑrimɔ. Nɑ womu ɡeni mɔ̀ sunɔn sɔ̃. Nɛn yɑrɑ yɑ sɑ̃ɑ nɡe yoro ɡeon yorutiɑ.

³Wunɑ ɑ burɑm bo tɔn bibun suunu sɔɔ. Wunɛn ɡɑri yi durom yibɑ. Yen sɔ̃nɑ ɑ Gusunɔn domɑru mɔ sere kɑ bɑɑdommɑɔ.

⁴Tɑbu kowo dɑmɡii, ɑ wunɛn tɑkobi bɛkio, wunɑ ɑ yiiko kɑ bɛɛrɛ bɑkɑ mɔ.

⁵Kɑ wunɛn sinɑndun dɑm, ɑ wunɛn tɑbu kɛkɛ yɔɔwo ɑ dɑ ɑ nɑsɑrɑ suɑ, kpɑ ɑ ɡem sɑnnɑ kɑ dɑɑ duudwiɑ kɑ ɡeɑn kobu, kpɑ ɑ sɔm mɑɑmɑɑkiɡinu ko kɑ wunɛn nɔm ɡeun dɑm.

⁶Wunɛn sɛ̃ɛnu nu nɔɔ do, nu koo wunɛn yibɛrɛbɑ sɔku, kpɑ tɔmbu bu wɔruku wunɛn wuswɑɑɔ.

⁷Gusunɔ, bɑ wunɛn bɑndu swĩi sere kɑ bɑɑdommɑɔ. Gemɑ ɑ kɑ wunɛn bɑndu nɛni.

⁸A ɡeɑ kĩ, mɑ ɑ kɔ̃sɑ tusɑ. Yen sɔ̃nɑ Gusunɔ wi u sɑ̃ɑ wunɛn Yinni, u nun ɡɔsɑ. U mɑɑ nun nuku dobu wɛ̃ ye u kɑ nun ɑye bɛɛrɛɡiru wɛ̃ te tɑ wunɛn kpɑɑsibuɡiru kpɑ̃ɑru kere.

⁹Wunɛn yɑ̃nu nu turɑre numɔ ye bɑ rɑ soku miru kɑ ɑloɛsi kɑ kɑsi. Bɑ mɔrɔkunu soomɔ ɑ kɑ nuku dobu wɑ wunɛn sinɑ ɡbɑburɔ te bɑ suunu donnu mɑni mɑni.

¹⁰Sinɑ bii wɔndiɑbɑ bɑ sɑ̃ɑ wunɛn kurɔ kpɑɑ sɑ̃kobu. Kurɔ kpɑo u yɔ̃ wunɛn nɔm ɡeuɔ u wurɑ sebuɑ ye yɑ nɑ Ofirin di.

¹¹A swɑɑ dɑkio, bii kurɔbu ɑ nɛn ɡɑri nɔ, kpɑ ɑ yi bwisiku. A wunɛn tɔmbu duɑrio kɑ wunɛn bɑɑn yɛnuɡibu.

¹²Wunɛn burɑm mu kɑ sinɑ boko nɑɑwɑ ɡem ɡem. A nùn bɛɛrɛ wɛ̃ɛyɔ yèn sɔ̃ u sɑ̃ɑ wunɛn yinni.

¹³Tirin tɔmbu be bɑ bwesenu kpuro ɑrumɑni kere, bɑ koo kɑ nun dukiɑ bwese bwesekɑ nɑɑwɑ bu kɑ wunɛn kĩi ɡeeru kɑsu.

¹⁴Sinɑ bii wɔndiɑ kurɔ kpɑo wi, u wɑ̃ɑ sinɑ kpɑɑrɔ, u yɑ̃nu sebuɑ ni bɑ burɑru koosi kɑ wurɑbɑ.

¹⁵Bɑ kɑ nùn dɑ sunɔn mi kɑ win yɑ̃ɑ burɑ nɔniɡii ni, mɑ win kurɔ kpɑɑ sɑ̃kobɑ nùn swĩi.

¹⁶Bɑ bu duusiɑ sinɑ kpɑɑrɔ kɑ nuku dobu kɑ yɛ̃ɛribu.

¹⁷Sinɑ boko, wunɛn bibɑ koo wunɛn bɑɑbɑbɑn tubi di, kpɑ bu bɑndu di tem kpuro sɔɔ.

¹⁸Nɛn womu ɡeni, ɡɑ koo de bu wunɛn yĩsiru yɑɑyɑ tɔ̃ru bɑɑtere, kpɑ bwesenu kpuro nu nun siɑrɑ sere kɑ bɑɑdommɑɔ.