Read bariba Womusu 50 Bible Online

Womusu 50 - bariba bible

Womusu 50

¹Asɑfun womu. Ge wee. Yinni Gusunɔ u ɡɑri mɔ̀, u hɑnduniɑɡibu soku be bɑ wɑ̃ɑ sɔ̃ɔ yɑri yerɔ n kɑ dɑ sɔ̃ɔ duu yerɔ.

²Gusunɔ u kurɑmɑ sɑɑ Siɔni wuu burɔ ɡen min di kɑ yɑm bururɑm.

³Bɛsɛn Yinni u wee wi, wi u ku rɑ mɑri. Win wuswɑɑɔ dɔ̃ɔ boko sɔ̃ruɑ, mɑ ɡuru woo bɔkɔ ɡɑ kɑ nùn sikerenɛ.

⁴U nɔɔɡiru sue wɔllɔ kɑ temɔ u kɑ win tɔmbu siri.

⁵U mɔ̀, i mɑn nɛn tɔmbu mɛnnɑmɑ be bɑ mɑn nɑɑnɛ sɑ̃ɑ, be, be bɑ kɑ mɑn ɑrukɑwɑni bɔkuɑ mɑ bɑ ye sire kɑ yɑ̃kuru.

⁶Wɔllu kpuro tɑ koo win ɡem ɡɑri kpɑrɑ. Domi wiyɑ u sɑ̃ɑ siri kowo.

⁷Yinni Gusunɔ u nɛɛ, i swɑɑ dɑkio bɛɛ nɛn tɔmbu Isirelibɑ. Nɑ kon bɛɛ sɔ̃ mɑ nɛnɑ nɑ sɑ̃ɑ bɛɛn Yinni.

⁸N ǹ bɛɛn yɑ̃kunun sɔ̃ nɑ bɛɛ ɡerusimɔ. Domi nɑ rɑ bɛɛn yɑ̃ku dɔ̃ɔ mwɑɑrɑruɡinu mwɛ bɑɑdommɑ.

⁹Nɑ ǹ mɑɑ nɑɑ kinɛnu mwɑɑmɔ bɛɛn yɛnuɔ, ǹ kun mɛ boo kinɛnu bɛɛn boo ɡɔ̃sɔ.

¹⁰Domi nɛnɑ nɑ ɡbeeku yɛɛ kpuro mɔ kɑ yi yi wɑ̃ɑ ɡuunɔ dɑbi dɑbinu.

¹¹Nɑ ɡunɔ si su wɑ̃ɑ ɡuunɔ kpuro yɛ̃ kɑ mɑɑ yɛɛ yi yi wɑ̃ɑ yɑkɑsɔ. Yi mɑɑ sɑ̃ɑwɑ nɛɡii.

¹²Ǹ n ɡɔ̃ɔrun nɑ tɑ mɑn mɔ̀, n ǹ wunɛ kon sɔ̃. Domi nɛnɑ nɑ hɑnduniɑ mɔ kɑ ye yɑ wɑ̃ɑ ye sɔɔ kpuro.

¹³I tɑmɑɑ kon nɑɑ kinɛnun yɑɑ temwɑ? I tɑmɑɑ boo kinɛnun yɛmɑ kon nɔ?

¹⁴Ye n burɑm bo, yerɑ i nɛ Gusunɔ bɛɛn Yinni siɑrɑ. Kpɑ i bɛɛn nɔɔ mwɛɛnu yibiɑ ni i mɑn kuɑ.

¹⁵A mɑn sokuo sɑnɑm mɛ ɑ nuki sɑnkire. Sɑɑ ye sɔɔ, kon nun wurɑri, kpɑ ɑ mɑn bɛɛrɛ wɛ̃.

¹⁶Adɑmɑ Gusunɔ u kɔ̃sɑn kowo sɔ̃ɔmɔ u mɔ̀, mbɑn sɔ̃nɑ ɑ nɛn woodɑbɑ siɑmɔ mɑ ɑ nɛn ɑrukɑwɑnin ɡɑri ɡerumɔ,

¹⁷wunɛ wi ɑ ku rɑ sɔ̃ɔsiru kɑ̃, mɑ ɑ nɛn ɡere ɑtɑfiiru sɑ̃ɑ.

¹⁸À n ɡbɛnɔ wɑ, ɑ rɑ kɑ nùn nɔɔ tiɑ ko, ɑ rɑ n wɑ̃ɑ kɑ sɑkɑrɑ kowobu.

¹⁹Wunɛn nɔɔ ɡɑ rɑ n kɔ̃sɑ yibɑwɑ, wunɛn yɑrɑ yɑ weesu sekumɔ.

²⁰Mi ɑ sinɑ kpuro, wunɛn winsimwɑ ɑ rɑ n wĩimɔ, kpɑ ɑ n wunɛn mɛro bisin kɔ̃sɑ ɡerumɔ.

²¹Yenibɑ kpurowɑ ɑ kuɑ, mɑ nɑ mɑɑri. Domi ɑ tɑmɑɑ nɑ sɑ̃ɑwɑ nɡe wunɛ. Adɑmɑ kon nun tɑɑrɛ wɛ̃ kpɑ n kpuro terɑsiɑ wunɛn wuswɑɑɔ.

²²I lɑɑkɑri koowo, kpɑ i swɑɑ dɑki i nɔ bɛɛ be i nɛ Gusunɔ duɑri. Mɑ n kun mɛ, kon bɛɛ sɛ̃re n yɑɑku. Goo kun mɑɑ kpɛ̃ u bɛɛ wɔrɑ.

²³Wìn yɑ̃kuru tɑ sɑ̃ɑ siɑrɑbu, yɛ̃rowɑ u mɑn bɛɛrɛ wɛ̃ɛmɔ. Wi u mɑɑ win tii nɛni dee dee yɛ̃rowɑ u koo nɛn fɑɑbɑ wɑ.