Read bariba Womusu 58 Bible Online

Womusu 58 - bariba bible

Womusu 58

¹Womu ɡe Dɑfidi u wom kowobun wiruɡii kuɑ. Ge wee.

²Bɛɛ Wɔrukoon tɔmbu, i ko kpĩ i bɑɑwure siri dee dee i n kɑ sere nɔɔ mɑɑri?

³Aɑwo, i kɔ̃sɑ mɔ̀wɑ ɡɔ̃ruɔ. Mɑ i bɔbunu ɑyeru kɛ̃mɔ.

⁴Dɑɑ kɔ̃sɑɡii u rɑ sɔ̃ɔsirewɑ sɑɑ win mɛron nukurun di. Wee kowo u rɑ kɔ̃ɔrewɑ sɑɑ win birun di.

⁵Ben nɔɔ ɡɑ rɑ n dɛ̃ɛ yibɑwɑ nɡe wɑɑ, kpɑ bɑ n ben swɑsu kɔruɑ nɡe surɔkɔru

⁶te tɑ kun kĩ tu dobo doboɡibun ɡɑri nɔ, bɑɑ mɑm wi u dobo dobo yɛ̃ru bon ɡɑri.

⁷Yinni Gusunɔ, ɑ bu nɔɔ kɔsukuo. Be, be bɑ sɑ̃ɑ nɡe ɡbee sinɑn kpɛmminu mi, ɑ ben bɑɑ sɑburosu yɑkirio.

⁸A de bu yɑrinɑ nɡe nim mɛ mu kokumɔ, kpɑ ɑ bu twee bu ko kpɑnɔbu.

⁹Bu ɡbio bu yɑndɑ nɡe sokoro, kpɑ ɑ ku de bu sɔ̃ɔ wɑ nɡe bii wìn suru kun yibɑ bɑ kɑ mɑrɑ.

¹⁰Kɑɑ bu ɡurɑwɑ fuuku kɑ woo ɡunɑ sere bu kɑ nɛɛ, weke te bɑ swɛ̃n koru tɑ dɔ̃ɔ wɑ tɑ swĩɑ, bɑɑ dɑ̃ɑ yɑ̀ n ɡbere.

¹¹Adɑmɑ ɡemɡii u ko n nuku dobu mɔwɑ ù n wɑ bɑ nùn mɔru bɑrɑ. U koo win nɑɑsu kpɑkiɑ tɔn kɔ̃sobun yɛm sɔɔ,

¹²kpɑ tɔmbu bu nɛɛ, ɡemɡiiwɑ u koo ɑre wɑ. Domi Gusunɔwɑ u hɑnduniɑn tɔmbu kpuro sirimɔ.