Read bariba Womusu 62 Bible Online

Womusu 62 - bariba bible

Womusu 62

¹Womu ɡe Dɑfidi u Yedutum kɑ wom kowobun wiruɡii kuɑ. Ge wee.

²Kɑ ɡeemɑ, Gusunɔ wunɛ sɔɔrɑ nɛn nɑɑnɛ wɑ̃ɑ. Wunɑ ɑ rɑ mɑn fɑɑbɑ ko.

³Wunɑ ɑ mɑɑ sɑ̃ɑ nɛn kperu tèn mi nɑ rɑ kuke n kɑ fɑɑbɑ wɑ. Wunɑ ɑ sɑ̃ɑ nɛn kuku yee bɑkɑru. A ǹ derimɔ nɛn nɑɑsu su sokurɑ.

⁴Sere sɑɑ yerɑ̀ i ko i n tɔnu kunisi i n sɛ̃re, nɡe mɛ bɑ rɑ ɡɑnɑ ye yɑ dɛburɑ sure, ǹ kun mɛ kɑrɑ ye yɑ wɔrumɑɑ dɔɔ.

⁵Geemɑ, bɑ nɔɔ tiɑ mɔ̀ bu kɑ durɔ wi surɑ win ɑye bɑkɑrun di. Bɑ ku rɑ n weesu mɛɛrɑ ɡɑ̃ɑnu ben mi. Kɑ nɔɔwɑ bɑ rɑ n tɔnu domɑru kuɑmmɛ, ɡɔ̃ruɔ kpɑ bɑ n nùn bɔ̃rusimɔ.

⁶Gusunɔ, wunɛ sɔɔrɑ nɛn nɑɑnɛ wɑ̃ɑ. Wunɛ sɔɔrɑ nɛn yĩiyɔbu wɑ̃ɑ.

⁷Wunɑ ɑ sɑ̃ɑ nɛn kperu tèn mi kon kuke n kɑ fɑɑbɑ wɑ. Wunɑ ɑ sɑ̃ɑ nɛn kuku yee bɑkɑru. Nɛn nɑɑsu kun mɑɑ sokurɑmɔ.

⁸Gusunɔ, wunɑ ɑ rɑ mɑn fɑɑbɑ ko, kpɑ ɑ de nɑ n bɛɛrɛ mɔ. Wunɑ nɛn kuku yee dɑmɡiru.

⁹Bɛɛ tɔmbu, i nùn nɑɑnɛ koowo sɑɑ kpuro. I nùn sɔ̃ɔwɔ ye yɑ bɛɛ nɛni. Domi wiyɑ u sɑ̃ɑ bɛsɛn kuku yeru.

¹⁰Tɔnu u sɑ̃ɑwɑ wom dirum. Mɛyɑ u mɑɑ sɑ̃ɑ weesu. Bɑ̀ n nùn kilo sɔndi, kɑɑ deemɑ u ǹ woo bunum turɑ.

¹¹I ku bɛɛn nɑɑnɛ doke dɑɑ bɔɔbɔyɑ sɔɔ. I ku mɑɑ bɛɛn yĩiyɔbu doke wɔbiɑ sɔɔ. Bɛɛn dukiɑ yɑ̀ n kuurɑmɔ, i ku bɛɛn bwɛ̃rɑ kpuro doke ye sɔɔ.

¹²N ǹ nɔn teeru nɑ Gusunɔn ɡere yeni nuɑ ye u nɛɛ, wiyɑ u dɑm mɔ.

¹³Yinni Gusunɔ, wunɑ ɑ durom mɔ. A rɑ bɑɑwure kɔsiewɑ ye u kuɑ.