Read bariba Womusu 66 Bible Online

Womusu 66 - bariba bible

Womusu 66

¹Womu ɡe bɑ wom kowobun wiruɡii kuɑ. Ge wee. Bɛɛ hɑnduniɑn tɔmbu kpuro, i Gusunɔ nɔɔɡiru sueyo kɑ nuku dobu.

²I womu koowo win yĩsirun yiikon sɔ̃. I win yĩsiru wɔlle suo kɑ womusu,

³kpɑ i nùn sɔ̃ mɑ win sɔmɑ yɑ nɑnum mɔ, domi win dɑm mu kpɑ̃. Yen sɔ̃nɑ win yibɛrɛbɑ bɑ nùn wiru kpĩiyɑmmɛ.

⁴Hɑnduniɑɡibu kpuro bɑ nùn yiirɑmmɛ. Bɑ nùn tɔmɑmɔ kɑ womusu, mɑ bɑ win yĩsiru bɛɛrɛ wɛ̃ɛmɔ.

⁵I nɑ i Gusunɔn sɔmɑ mɛɛri ye u kuɑ. U nɑnum mɔ ù n sɔmburu mɔ̀ tɔmbun suunu sɔɔ.

⁶U derɑ dɑɑrɑ ɡberɑ, mɑ sɑ tɔburɑ bɛsɛn nɑɑsu kun nim wɑ, mɑ sɑ nuku dobu kuɑ wi sɔɔ.

⁷U bɑndu diiwɑ sere kɑ bɑɑdommɑɔ win dɑm sɑɑbu. U bwesenu kpuro mɛɛrɑ kɑ lɑɑkɑri, kpɑ mɛm nɔɔ sɑribɑ bu ku rɑɑ nùn seesi.

⁸I Gusunɔ siɑro bɛɛ bwesenu kpuro. I nùn tɔmɔ bu nɔ bɑɑmɑ.

⁹Domi u bɛsɛn wɑ̃ɑru wɔrɑ. U ǹ dere su sokurɑ.

¹⁰Gusunɔ, ɑ sun doke lɑɑkɑri mɛɛribu sɔɔ. A derɑ sɑ wɑ̃ɑ dɔ̃ɔ sɔɔ nɡe sii ɡeesu.

¹¹A sun kpɛ̃ɛ yinɑ sɔɔ mɑ ɑ sun sɔmu bɑkɑnu sɔbi.

¹²A derɑ bɛsɛn yibɛrɛbɑ bɑ sun sɔni, mɑ sɑ dɔ̃ɔ kɑ nim sɑrɑ. Adɑmɑ ɑ sun yɑrɑ min di sɑ n kɑ bɔri yɛndu mɔ.

¹³Kon du wunɛn sɑ̃ɑ yerɔ n kɑ nun yɑ̃kuru kuɑ, kpɑ n nɛn nɔɔ mwɛɛnu yibiɑ

¹⁴ni nɑ nun kuɑ nɛn wɑhɑlɑn sɑɑ sɔɔ.

¹⁵Kon kɑ nun kɛtɛbɑ kɑ bonu yɑ̃kuru kuɑ, kpɑ n kɑ nun yɑ̃ɑ ni nu ɡum mɔ yɑ̃ku dɔ̃ɔ mwɑɑrɑruɡinu kuɑ.

¹⁶Bɛɛ be i Gusunɔ nɑsie, i nɑ i nɔ, kpɑ n bɛɛ sɔ̃ ye u mɑn kuɑ.

¹⁷Nɑ nùn nɔɔɡiru sue u mɑn somi, mɑ nɑ nùn siɑrɑ kɑ womusu.

¹⁸Nɑ̀ n dɑɑ torɑru ɡɑru mɔ nɛn ɡɔ̃ruɔ, Yinni Gusunɔ kun dɑɑ mɑn wurɑrimɔ.

¹⁹Adɑmɑ u nɛn kɑnɑru swɑɑ dɑki u mɑn wurɑri.

²⁰Nɑ nùn siɑrɑ domi u nɛn kɑnɑru mwɑ. Mɑ u ǹ mɑn win durom wunɑri.