Read bariba Womusu 69 Bible Online

Womusu 69 - bariba bible

Womusu 69

¹Womu ɡe Dɑfidi u wom kowobun wiruɡii kuɑ. Ge wee.

²Gusunɔ, ɑ mɑn fɑɑbɑ koowo. Nɑ sɑ̃ɑre nɑ nim mwɛɛre wɑhɑlɑn sɔ̃.

³Nɑ nummɔ yironu sɔɔ, nɑ ǹ kpɛ̃ n yɔ̃rɑ. Nɑ wɔri nim bwerɔ mɑ nim torɑ kɑ mɑn doonɔ.

⁴Nɑ swĩ nɑ wɑsirɑ sere nɛn ɡɔ̃ru ɡɑ ɡberɑ. Nɛn nɔni dɑm dwiiyɑ ye nɑ wunɛn somiru mɑrɑ.

⁵Be bɑ mɑn tusɑ bɑ ǹ ten wiru kɑ nɑɑsu yɛ̃, bɑ dɑbi bɑ nɛn wirun seri kere. Nɛn yibɛrɛ be bɑ kĩ bu mɑn ɡo kɑm bɑ dɑm mɔ. Ye nɑ ǹ ɡbɛnɛ, bɑ kĩ n yen kɔsire wɛ̃.

⁶Gusunɔ, ɑ nɛn ɑsɑnsi sɑriru yɛ̃. Nɛn torɑnu nu ǹ mɑɑ beruɑ wunɛn mi.

⁷Gusunɔ, wɔllu kɑ tem Yinni, ɑ ku de be bɑ nun yĩiyɔ bu sekuru wɑ nɛn sɔ̃. Isirelibɑn Yinni, ɑ ku de be bɑ nun kɑsu bu sekuru di nɛn sɔ̃.

⁸Domi wunɛn sɔ̃nɑ nɑ seku bɑkɑru sɔɔwɑ tɑ derɑ nɑ nɛn wuswɑɑ wukiri.

⁹Nɛn mɛro bisibu bɑ mɑn mɛɛrɑ tuko. Nɛn mɛro turosibu bɑ ǹ mɑn yɛ̃.

¹⁰Wunɛn dirun kĩrɑ mɑn mɛnimɔ nɡe dɔ̃ɔ. Be bɑ nun wɔmmɔ, ben wɔmɑ wɔri nɛ sɔɔ.

¹¹Sɑnɑm mɛ nɑ tii kɑwɑ nɑ nɔɔ bɔkuɑ, bɑ mɑn funɛ wunɑ.

¹²Sɑnɑm mɛ nɑ sɑɑki sebuɑ nuku sɑnkirɑnun sɔ̃, bɑ mɑn yɑɑkoru mɔ̀.

¹³Be bɑ sɔ̃ ɡbɑ̃rɑ kɔnnɔwɔ bɑ mɑn wĩimɔ. Tɑm nɔrobu bɑ kɑ nɛn yĩsiru womu mɔ̀.

¹⁴Adɑmɑ Yinni Gusunɔ, wunɑ nɛ, nɑ kɑnɑmɔ. Gusunɔ, ɑ mɑn wurɑrio wunɛn durom bɑkɑm sɔ̃ sɑɑ ye ɑ kĩ. Domi ɑ rɑ tɔnu fɑɑbɑ ko kɑ ɡem.

¹⁵Kpɑ ɑ mɑn yɑrɑ yironun di n ku kɑ kpɑm num. A mɑn wɔro nɛn yibɛrɛbɑn nɔmɑn di kɑ nim bwerun di.

¹⁶A ku de nim yiburu tu mɑn wukiri, kpɑ nim bweru tu mɑn di. A ku de wɔru bɔkɔ ɡu mɑn kɔrusi.

¹⁷Yinni Gusunɔ, ɑ mɑn wurɑrio wunɛn tɔn ɡeerun sɔ̃. Wunɛn wɔnwɔn bɑkɑru sɔɔ, ɑ mɑn sĩiremɑ.

¹⁸A ku nɛ wunɛn sɔm kowo biru kisi. A mɑn wurɑrio fuuku, wee nɑ wɑ̃ɑ nuku sɑnkirɑ bɑkɑnu sɔɔ.

¹⁹A susimɑ ɑ nɛn hunde wɔrɑ. A mɑn fɑɑbɑ koowo nɛn yibɛrɛbɑn nɔmɑn di.

²⁰A yɛ̃ nɡe mɛ bɑ mɑn funɛ wunɑ. Bɑ mɑn sekuru doke, bɑ mɑn kɑm mɛɛrɑ. A mɑɑ nɛn yibɛrɛbɑ kpuro yɛ̃.

²¹Sekurɑ mɑn nuki sɑnkɑ sere nɑ kom yɑɑ bie. Nɑ mɑrɑ ɡoo u mɑn wɔnwɔndu kuɑ, ɑdɑmɑ sɑri. Nɑ kɑsu wi u koo mɑn nukuru yɛmiɑsiɑ, nɑ ǹ wɑ bɑɑ turo.

²²Sɑnɑm mɛ ɡɔ̃ɔrɑ mɑn mɔ̀, bɑ dɛ̃ɛ doke nɛn dĩɑnu sɔɔ. Sɑnɑm mɛ nim nɔru ɡɑ mɑn mɔ̀, tɑm mɔmmɔmɑ bɑ mɑn wɛ̃ n nɔ.

²³A de ben tɔ̃ɔ bɑkɑ dim mu ko yinɑ sɑnɑm mɛ bɑ sɔ̃ sɛ̃ɛ kɑ bɔri yɛndu.

²⁴A ben nɔni wukirio bu ku mɑɑ kɑ yɑm wɑ, kpɑ ben dɑm mu dwiiyɑ.

²⁵A bu wunɛn mɔru seesio, kpɑ wunɛn mɔru bɑkɑ ye, yu bu deemɑ.

²⁶A de ben wɑ̃ɑ yenu nu ko bɑnsu. Kpɑ ɡoo u kun mɑɑ wɑ̃ɑ ben kuu bekunuɡinu sɔɔ.

²⁷Domi wi ɑ soomɔ, wiyɑ bɑ nɔni sɔ̃ɔmɔ. Wi ɑ mɑɑ yɑɑsɑ sɔkɑ ɑ mɛɛrɑ kuɑ, bɑ win nuku sɑnkirɑnu sosimɔ.

²⁸A ben torɑnu kpuro yɑɑyo. A ku bu wɔnwɔndu kuɑ bɑɑ fiiko.

²⁹A ben yĩsinu ɡoowo wɑ̃ɑrun tirenun di, kpɑ ɑ ku bu mɛnnɑ kɑ ɡemɡibu.

³⁰Adɑmɑ nɑ wɑ̃ɑ nuku sɑnkirɑnu kɑ wɑhɑlɑ sɔɔ. Gusunɔ, ɑ de wunɛn somiru tu mɑn yɑrɑ.

³¹Kon Gusunɔ siɑrɑ kɑ womusu. Kon tɑkɑru ko n nùn wɔlle suɑ.

³²Yeyɑ yɑ rɑ Yinni Gusunɔ wɛ̃re n kere nɑɑ kinɛ yeburu.

³³Be bɑ ɡɛmɑ, bɑ̀ n yeni wɑ, bɑ ko n nuku dobu mɔ. Bɛɛ be i Gusunɔ kɑsu, i ko n ɡɔ̃ru dobu mɔ bɛɛn wɑ̃ɑru sɔɔ.

³⁴Domi Yinni Gusunɔ u rɑ sɑ̃ɑrobun ɡɑri nɔ. U ku rɑ wiɡibu duɑri be bɑ wɑ̃ɑ dɛsiru sɔɔ.

³⁵Wɔllu kɑ tem kɑ nim wɔ̃ku kɑ kpuro ye yɑ wɑsi mi sɔɔ, yu nùn tɔmɔ.

³⁶Gusunɔ u koo Siɔni fɑɑbɑ ko. U koo mɑɑ Yudɑn wusu bɑni. Win sɔm kowobu bɑ koo sinɑ wuu si sɔɔ kpɑ su ko beɡisu.

³⁷Ben bibun bweserɑ koo tem mɛ tubi di. Be bɑ Gusunɔ kĩ, bɑ ko n ben wɑ̃ɑ yeru mɔ mi.