Read bariba Womusu 73 Bible Online

Womusu 73 - bariba bible

Womusu 73

¹Womu ɡe Asɑfu u kuɑ. Ge wee. Geemɑ, Gusunɔ u sɑ̃ɑwɑ tɔn ɡeo Isirelibɑn sɔ̃ kɑ mɑɑ bèn ɡɔ̃rusu dɛɛre.

²Nɑ rɑɑ wɔrumɑɑ dɔɔ, n tie fiiko n kɑ tem turi.

³Domi nɑ rɑɑ kɑ ɡɑri bɑkɑsu nisinu kuɑ yèn sɔ̃ nɑ wɑɑmɔ tɔn kɔ̃sobu bɑ nuku dobu mɔ̀.

⁴Gɑ̃ɑnu ɡɑnu kun bu nɔni sɔ̃ɔmɔ ben wɑ̃ɑrun tɔ̃ru kpuro sɔɔ. Mɛyɑ ben wɑsi yi bwɑ̃ɑ do mɑ yi bɑllimɔ.

⁵Bɑ ǹ duniɑn wɑ̃ɑrun wɑhɑlɑ ɡɑɑ yɛ̃. Mɛyɑ bɑ ǹ mɑɑ yɛ̃ nɔni swɑ̃ɑ te tɔn be bɑ tie bɑ kɑ wɑ̃ɑ.

⁶Bɑ tii suɑbu sebuɑ nɡe sɑbɑ ye bɑ rɑ sebe wĩirɔ. Mɑ bɑ dɑɑ bɔɔbɔyɑ sebuɑ nɡe yɑberu.

⁷Ben nuku kɔ̃surun kom mu yɑrimɔ sɑɑ ben nukurun di, mɑ ben ɡɔ̃run bwisikunu nu sɔ̃ɔsirɑmɔ tɔɔwɔ.

⁸Bɑ rɑ n tɔnu yɛ̃ɛmɔwɑ bɑ n mɔ̀, bɑ koo nùn dɑm dɔre kɑ nuku kɔ̃suru. Kpɑ bɑ n tii suɑ ɡɑri ɡerumɔ,

⁹bɑ n Gusunɔ wɔllu wɔmmɔ. Mɛyɑ mɑɑ ben yɑrɑ ku rɑ ɡoo deri hɑnduniɑ mi.

¹⁰Yen sɔ̃nɑ tɔmbu kpuro bɑ wurɑmɔ ben mi ɡiɑ. Mɑ bɑ ben ɡɑri nɔrumɔ nɡe nim,

¹¹bɑ mɔ̀, Gusunɔ kun ɡɑ̃ɑnu yɛ̃. Wi, Wɔrukoo, u ǹ yɛ̃ru mɔ.

¹²Nɡe mɛyɑ tɔn kɔ̃sobun wɑ̃ɑrɑ sɑ̃ɑ. Bɑ ku rɑ n wurure. Bɑ rɑ n ben dukiɑ kuurɑsiɑmɔwɑ.

¹³Mɑ nɑ tii sɔ̃ɔwɑ nɑ nɛɛ, ǹ n mɛn nɑ, kɑm sɔɔrɑ nɑ nɛn ɡɔ̃ru dɛɛrɑsiɑ, mɑ nɑ niɑ n kɑ sɔ̃ɔsi mɑ nɑ dɛɛre.

¹⁴Yinni, tɔ̃ru bɑɑtere ɑ rɑ mɑn sɛɛyɑsiewɑ, kpɑ ɑ mɑn nɔni sɔ̃ bururu bɑɑtere.

¹⁵Nɑ̀ n nɛɛ, kon ko nɡe tɔn kɔ̃so be, ko nɑ n kĩ n nɛn bweseru siki te ɑ ɡɔsɑ.

¹⁶Ye nɑ ɡɑri yin ɑsɑnsi kɑsu n kɑ yi tubu, mɑ nɑ wɑ yi mɑn sɛ̃sie too.

¹⁷Adɑmɑ dɔmɑ te nɑ duɑ wunɛ Gusunɔn sɑ̃ɑ yerɔ, sɑɑ yerɑ nɑ ɡiɑ ye yɑ tɔn kɔ̃sobu mɑrɑ.

¹⁸Geemɑ, Yinni Gusunɔ, ɑ bu surewɑ swɑɑ yè sɔɔ bɑ koo sɛllɑ, kpɑ bu wɔrumɑ bu ɡbi.

¹⁹Kɑɑ de bu kɑm ko mii mii, kpɑ ben wɑ̃ɑru tu nɔru ko subɑru sɔɔ.

²⁰Yinni, ɑ rɑ bu kpeerɑsiewɑ, kpɑ bu ben ɡɑri duɑri nɡe mɛ tɔnu u rɑ dosu duɑri.

²¹Ye nɛn ɡɔ̃ru ɡɑ sɑnkirɑ, n sɑ̃ɑwɑ nɡe ɡɑ̃ɑnu sɔkɑ nɛn nukurɔ.

²²Mɑ nɑ kuɑ nɡe ɡɑri bɔkɔ, nɑ ǹ ɡɑ̃ɑnu tubɑ nɡe ɡbeeku yɑɑ.

²³Adɑmɑ kɑ mɛ, nɑ wɑ̃ɑ kɑ wunɛ. Mɑ ɑ mɑn mwɑ kɑ wunɛn nɔm ɡeu.

²⁴Kɑɑ mɑn kpɑrɑ kɑ wunɛn bwisi. Yen biru, kɑɑ mɑn mwɑ wunɛn yiiko sɔɔ.

²⁵Wɑrɑ nɑ mɔ wɔllɔ, wunɛ bɑɑsi. Mɛyɑ nɑ ǹ mɑɑ ɡoo yĩiyɔ hɑnduniɑ yeni sɔɔ.

²⁶Nɛn wɑsi kɑ nɛn bwisikunu kpuro koo doonɑ. Adɑmɑ wunɛ Yinni Gusunɔ, wunɑ ɑ rɑ mɑn dɑm kɛ̃. A sɑ̃ɑwɑ nɛn dukiɑ sere kɑ bɑɑdommɑɔ.

²⁷Wee be bɑ kɑ nun tondɑ bɑ ɡbimɔ. Mɛyɑ ɑ be bɑ nun deri ɡo.

²⁸Adɑmɑ nɛ, n mɑn wɛ̃re nɑ n wɑ̃ɑ wunɛn bɔkuɔ Yinni Gusunɔ. Domi nɑ kuku yee nɑɑnɛɡiru wɑ wunɛ sɔɔ. Kon kpɑrɑ ye ɑ mɑn kuɑ kpuro.