Read bariba Womusu 78 Bible Online

Womusu 78 - bariba bible

Womusu 78

¹Womu ɡe Asɑfu u kuɑ. Ge wee. Nɛn tɔmbu, i nɛn ɡɑri swɑɑ dɑkio. I swɑɑ tem kpĩiyɔ i nɔ ye nɑ ɡerumɔ.

²Kon bɛɛ fɑɑɡi ɡɑɑ kuɑ kɑ mɔnnu ye yɑ sɑ̃ɑ yellun ɡɑri.

³Ye sɑ nuɑ kɑ ye sɑ ɡiɑ kɑ ye bɛsɛn bɑɑbɑbɑ bɑ sun sɔ̃ɔwɑ,

⁴sɑ ǹ ye bɛsɛn bibu beruɑmmɛ. Sɑ ko bu Yinni Gusunɔn tɔmɑru sɔ̃wɑ kɑ win dɑm ɡɑri kɑ sɔm mɑɑmɑɑkiɡii ni u kuɑ.

⁵U bɛsɛ Isirelibɑ, Yɑkɔbun bweseru woodɑ wɛ̃. Woodɑ yerɑ u bɛsɛn bɑɑbɑbɑ wɛ̃ bu kɑ ye ben bibu sɔ̃ɔsi.

⁶Bii be bɑ koo mɑrurɑ, ben tii bɑ koo ye ɡiɑ, kpɑ bu mɑɑ ye ben bibu sɔ̃ɔsi.

⁷Sɑɑ yerɑ bɑ koo Yinni Gusunɔ nɑɑnɛ ko. Bɑ ǹ mɑɑ duɑrimɔ ye u kuɑ. Kpɑ bu win woodɑbɑ mɛm nɔɔwɑ.

⁸Bɑ ǹ mɑɑ mɔ̀ nɡe ben bɑɑbɑbɑ. Domi bɑɑbɑ be, bɑ kuɑ mɛm nɔɔ sɑribɑ, mɑ ben ɡɔ̃ru ɡɑ ǹ kɑ Gusunɔ turo yɔ̃re. Mɑ bɑ kuɑ nɑɑnɛ sɑribɑ Gusunɔn mi.

⁹Efɑrɑimun bweseru te tɑ tɛnnu mɔ tɑ biruku yirɑ wurɑ tɑbun sɑɑ.

¹⁰Tɑ ǹ ten ɑrukɑwɑni yibie ye tɑ kɑ Gusunɔ bɔkuɑ. Tɑ yinɑ tu win woodɑbɑ mɛm nɔɔwɑ.

¹¹Tɑ win sɔm mɑɑmɑɑkiɡii ni duɑri ni u tu sɔ̃ɔsi.

¹²U mɑɑmɑɑki kuɑ ben sikɑdobɑn wuswɑɑɔ Soɑniɔ Eɡibitin temɔ.

¹³U nim wɔ̃ku bɛrɑ ɡɑ kpɑɑsinɑ ɡɑ yɔ̃rɑ nɡe ɡɑnɑ, mɑ u derɑ bɑ tɔburɑ.

¹⁴Guru wii wurorɑ u derɑ tɑ bu ɡbiiye sɔ̃ɔ sɔɔ. Wɔ̃kuru, kpɑ u de dɔ̃ɔ yɑrɑ yɑ n sɔ̃ɔsire ɡuru wii wuro te sɔɔ.

¹⁵U kpenu bɛsukɑ ɡbɑburɔ, mɑ nim bɑkɑm mu kurɑ bɑ nɔrɑ.

¹⁶U derɑ nim mu yɑrɑ kpenun di, mɑ mu kokumɔ nɡe dɑɑ bɑkɑrun nim.

¹⁷Adɑmɑ kɑ mɛ, bɑɑbɑ be, bɑ wi, Wɔrukoo torɑrimɔwɑ bɑ dɔɔ. Bɑ nùn seesiwɑ ɡbɑburu mi, mi ɡɑ̃ɑnu ku rɑ kpi.

¹⁸Mɑ bɑ wi, Gusunɔ nɔɔ kuurɑ bɑ nùn dĩɑnu kɑnɑ ni bɑ kĩ.

¹⁹Bɑ nɛɛ, kɑ ɡem, Gusunɔ u koo kpĩ u sun diisiɑ ɡbɑburu mini?

²⁰Geemɑ, Mɔwisi u kpee te so, mɑ nim mu kokɑ nɡe dɑɑrun nim. Adɑmɑ u koo kpĩ u sun diisiɑ? U koo kpĩ u sun yɑɑ wɛ̃ su tem?

²¹Ye Yinni Gusunɔ u yeni kpuro nuɑ, yerɑ win mɔru yɑ seewɑ nɡe dɔ̃ɔ wi bɑ sɔ̃re win tɔmbu Isirelibɑn sɔ̃.

²²Domi bɑ ǹ nùn nɑɑnɛ kue. Bɑ ǹ win somiru yĩiyɔ.

²³Kɑ mɛ, u ɡuru wiru woodɑ wɛ̃. Mɑ u wɔllun ɡɑmbobɑ kɛniɑ.

²⁴U derɑ dĩɑ ni bɑ mɔ̀ mɑnnɑ nu bu nɛɛyɑ sɑɑ wɔllun di.

²⁵U bu ye wɛ̃wɑ nɡe mɛ̀n nɔɔ bɑ kĩ. Tɔn boko dimɑ bɑ di.

²⁶Yen biru, u derɑ woo ɡɑ nɑ sɑɑ sɔ̃ɔ yɑri yerun di ɡɑ wɔllu swee. Kɑ win dɑmɑ u woo seeyɑmɑ sɔ̃ɔ yɛ̃sɑn nɔm dwɑru ɡiɑn di,

²⁷mɑ u derɑ ɡunɔsu su sɑrɑmɑ su bu wukiri nɡe tuɑ. Su dɑbi nɡe yɑni sɛɛri nim wɔ̃kun ɡoorɔ.

²⁸U derɑ su wɔrukɑ su tɛrie bɑɑmɑ ben sɑnsɑniɔ.

²⁹Mɑ Gusunɔ u bu wɛ̃ ye bɑ kĩ. Mɑ bɑ di bɑ debɑ.

³⁰Adɑmɑ ye bɑ dimɔ bɑ ǹ kpɑ, dĩɑnu yibɑ ben nɔsɔ.

³¹Sɑnɑm mɛyɑ Gusunɔ u kɑ bu mɔru kuɑ. Mɑ u be bɑ dɑm bo ɡo. U ben ɑluwɑɑsibɑ so u sururɑ.

³²Kɑ mɛ, bɑ wure bɑ torɑ. Bɑ ǹ win sɔm mɑɑmɑɑkiɡii ni nɑɑnɛ kue.

³³Mɑ Yinni Gusunɔ u bu doke bɛrum sɔɔ u ben wɑ̃ɑru nɔru koosiɑ nɡe woo. U bu kɑm koosiɑ nɔni kpɑki teeru.

³⁴Yinni Gusunɔ ù n kĩ u bu ɡo, yerɑ ben ɡɑbu bɑ rɑ ɡɔsirɑmɛ win mi ɡiɑ.

³⁵Kpɑ bu yɑɑyɑ mɑ wi, Wɔrukoowɑ u sɑ̃ɑ ben kpee bɑɑ mì bɑ rɑ kuke. Wiyɑ u rɑ mɑɑ bu wɔre.

³⁶Adɑmɑ bɑ ku rɑ ɡem ɡere. Bɑ rɑ n kĩ bu nùn nɔni wɔ̃kewɑ kɑ ben ɡɑri.

³⁷Ben ɡɔ̃ru ɡɑ ǹ kɑ nùn wɑ̃ɑ. Bɑ ǹ mɑɑ ben ɑrukɑwɑni yibie.

³⁸Adɑmɑ kɑ mɛ, Yinni Gusunɔ u rɑ tii nɛnɛ u kun win mɔru kpuro yɔ̃su. U rɑ bu wɔnwɔndu kue, kpɑ u bu ben durum wɔkɑ u kun bu ɡo.

³⁹U rɑ yɑɑye mɑ bɑ sɑ̃ɑwɑ tɔmbu. Bɑ sɑ̃ɑwɑ nɡe woo. Gɑ̀ n doonɑ, ɡɑ ku rɑ wurɑmɛ.

⁴⁰Nɔn dɑbinɑ bɑ Gusunɔ seesi ɡbɑburɔ. Nɔn dɑbinɑ bɑ win mɔru seeyɑ.

⁴¹Bɑ mɑɑ wure bɑ nùn nɔɔ kuurɑ wi, wi u sɑ̃ɑ ben Yinni Dɛɛro.

⁴²Bɑ ǹ tɔ̃ɔ te yɑɑye tè sɔɔ u bu wɔrɑ yibɛrɛbɑn nɔmɑn di kɑ win dɑm.

⁴³Bɑ ǹ mɑɑ yɑɑye sɔm mɑɑmɑɑkiɡii ni u kuɑ Eɡibitiɔ kɑ Soɑnin ɡberu kpɑɑnɛɔ.

⁴⁴U Eɡibitiɡibun dɑɑnun nim ɡɔsiɑ yɛm, mɑ bɑ kpɑnɑ bu mu nɔ.

⁴⁵U derɑ ɡbɑbu swɛ̃ɛ yi bu wɔri yi di. Mɑ u derɑ surenu nu bu kɑm kuɑ.

⁴⁶U derɑ twee yi ben dĩɑnu wɔri yi di. Mɑ u derɑ ben hɑniɑn ɑre kɑm kuɑ.

⁴⁷U derɑ ɡuru kpenu nu ben resɛm ɡbɑɑnu kɑm koosiɑ. Mɑ woorɑ ben dɑ̃ɑ ɡbɑɑnu sɑnkɑ.

⁴⁸U derɑ ɡuru ɡbɑ̃ɑ kɑ ɡuru kpenu ben yɑɑ sɑbenu di.

⁴⁹Mɑ u kɑ Eɡibitiɡii be mɔru seewɑ kɑ dɑm u bu nɔni sɔ̃ɔwɑ. U derɑ ɡɔɔn ɡɔrɑdobɑ bɑ nɑ dɑbi dɑbinu bɑ bu wɔri.

⁵⁰U ǹ dere win mɔru yu ɡoo sɛ̃ɛnɑ. U bu kɛ̃si kɛ̃si bɑrɑnu kpɛ̃ɛ u kɑ bu ɡo.

⁵¹U Eɡibitiɡibu be, be bɑ sɑ̃ɑ Kɑmun bibun bweserun bii tɔn durɔ ɡbiikoo bɑɑwure ɡo, be, be bɑ sɑ̃ɑ ben ɑluwɑɑsirun bibu.

⁵²U derɑ win tɔmbɑ yɑrɑ nɡe yɑ̃ɑ ɡɔ̃ɔ ɡe ɡɑ yɑrimɑ ɡɔ̃run di. Mɑ u bu kpɑrɑ ɡbɑburɔ.

⁵³U bu kpɑrɑ kɑ bɔri yɛndu, bɑ ǹ diirɑ. Mɑ u derɑ nim wɔ̃ku ɡɑ ben yibɛrɛbɑ wukiri.

⁵⁴Mɑ u kɑ bu dɑ win tem dɛɛrɑmɔ, ɡuu ten mi, te u mwɑ kɑ win dɑm.

⁵⁵U bwese tukunu ɡirɑ win tɔmbu Isirelibɑn sɔ̃. Mɑ u tem mɛ bɔnu kuɑ u derɑ bɑ sinɑ mi, kuu bekuruɡinu sɔɔ.

⁵⁶Adɑmɑ bɑ Gusunɔ nɔɔ kuurɑ. Bɑ wi, Wɔrukoo seesi. Bɑ ǹ win woodɑbɑ mɛm nɔɔwɛ.

⁵⁷Bɑ Gusunɔ dɛsirɑri, mɑ bɑ kuɑ nɑɑnɛ sɑribɑ nɡe mɛ ben bɑɑbɑbɑ bɑ rɑɑ kuɑ. Bɑ wururɑ nɡe tɛn tèn kirikɑ yɑ kusirɑ.

⁵⁸Bɑ win mɔru seeyɑ kɑ ben bũu turɑnu. Bɑ win nisinu seeyɑ kɑ ben bwɑ̃ɑrokunu.

⁵⁹Ye Gusunɔ u ye kpuro wɑ, yerɑ win mɔru seewɑ, mɑ u Isirelibɑ yinɑ.

⁶⁰U sɑ̃ɑ yee te deri te tɑ wɑ̃ɑ Siloɔ. U kuu bekuruɡii te deri tèn mi u rɑ kɑ bu yinnɛ.

⁶¹Mɑ u derɑ yibɛrɛbɑ bɑ win woodɑn kpɑkororu mwɑ, tè sɔɔ u rɑ win dɑm kɑ win yiiko sɔ̃ɔsi. U derɑ bɑ kɑ tu doonɑ tem tukumɔ.

⁶²U kɑ win tɔmbu mɔru kuɑ, mɑ u derɑ bɑ bu ɡo tɑbu sɔɔ.

⁶³U derɑ ɑluwɑɑsibɑ bɑ dɔ̃ɔ mwɑɑrɑ, mɑ wɔndiɑbɑ bɑ durɔbu biɑ.

⁶⁴U derɑ bɑ ben yɑ̃ku kowobu ɡo tɑbu sɔɔ kɑ tɑkobi. Mɑ ben ɡɔminibu bɑ ǹ ben ɡɔɔ swĩ.

⁶⁵Yerɑ Yinni Gusunɔ u seewɑ nɡe tɔnu wi u dom yɑndɑmɑ. U seewɑ nɡe tɑbu durɔ wɔruɡɔ wi tɑm mu ɡoomɔ.

⁶⁶Mɑ u win yibɛrɛbɑ so u ɡirɑ. U bu sekuru doke te tɑ ǹ kpeemɔ sere kɑ bɑɑdommɑɔ.

⁶⁷U Efɑrɑimu Yosɛfun biin bweseru yinɑ. U ǹ tu ɡɔsɑ.

⁶⁸Yudɑn bweseru kɑ Siɔnin ɡuurɑ u kĩɑ u ɡɔsɑ.

⁶⁹Guuru miyɑ u win sɑ̃ɑ yeru bɑnɑ tɑ dɑm mɔ nɡe wɔllu kɑ tem mɛ u swĩi sere kɑ bɑɑdommɑɔ.

⁷⁰U Dɑfidi ɡɔsɑ u n kɑ sɑ̃ɑ win sɔm kowo. Yɑ̃ɑ kpɑrɑ yerun diyɑ u nùn mwɑɑmɑ

⁷¹u kɑ ko Isirelibɑ, Yɑkɔbun bweserun kpɑro be, be bɑ sɑ̃ɑ wi, Yinni Gusunɔn tɔmbu.

⁷²Dɑfidi wi, u tɔn be kpɑrɑwɑ kɑ ɡɔ̃ru dɛɛrɔ, kɑ lɑɑkɑri.