Read bariba Womusu 80 Bible Online

Womusu 80 - bariba bible

Womusu 80

¹Womu ɡe Asɑfu u wom kowobun wiruɡii kuɑ kɑ mɔrɔku. Ge wee.

²Wunɛ Isirelibɑn kpɑro, ɑ swɑɑ dɑkio ɑ nɔ. Wunɛ wi ɑ rɑ wunɛn tɔmbu kpɑre nɡe yɑ̃ɑ ɡɔ̃ɔ, mɑ ɑ sɔ̃ wɔllun kɔ̃sobun suunu sɔɔ, ɑ tii sɔ̃ɔsio wunɛn yiiko sɔɔ.

³A bɛsɛ Efɑrɑimu kɑ Bɛnyɑmɛɛ kɑ Mɑnɑsen bwese kɛri wunɛn dɑm sɔ̃ɔsio, kpɑ ɑ sun fɑɑbɑ ko.

⁴Yinni Gusunɔ, ɑ sun wɔro. A kɑ sun nɔnu ɡeu mɛɛrio, kpɑ ɑ sun fɑɑbɑ ko.

⁵Gusunɔ wɔllu kɑ tem Yinni, sere sɑɑ yerɑ̀ kɑɑ n kɑ sun mɔru sɑ̃ɑ ɑ n bɛsɛn kɑnɑru yinɑmɔ.

⁶Wee ɑ derɑ nuku sɑnkirɑnu nu kuɑ bɛsɛn dĩɑnu, mɑ ɑ derɑ bɛsɛn nɔni yĩresu kuɑ bɛsɛn nim.

⁷A derɑ be bɑ kɑ sun sikerenɛ bɑ sɑnnɑmɔ bɛsɛn sɔ̃. Mɑ bɛsɛn yibɛrɛbɑ bɑ sun yɛ̃ɛmɔ.

⁸Gusunɔ wɔllu kɑ tem Yinni, ɑ sun wɔro. A kɑ sun nɔnu ɡeu mɛɛrio kpɑ su fɑɑbɑ wɑ.

⁹Wee ɑ resɛm dɑ̃ɑ wukɑmɑ Eɡibitin di, mɑ ɑ tɔmbu seeyɑ ben wɑ̃ɑ yenun di, mɑ ɑ resɛm ye ɡirɑ mi.

¹⁰A ye ɑyeru kuɑ mɑm mɑm, mɑ yɑ seewɑ yɑ nuwi ɡirɑ. Yɑ kpɛ̃ɑ yɑ tem kpuro

¹¹kɑ ɡuunu wukiri, mɑ yen kɑ̃ɑsi yi kpɛ̃ɑ nɡe dɑ̃ɑ ye bɑ mɔ̀ sɛduru.

¹²Yen kɑ̃ɑsi yi, yi dɑ sere nim wɔ̃kuɔ, mɑ yin nuwi yi dɑ sere dɑɑ bɑkɑrɔ yi kpɑrɑ.

¹³Yinni Gusunɔ, mbɑn sɔ̃nɑ ɑ yen kɑrɑn ɡɑmbo kɔsukɑ, mɑ ɑ derɑ be bɑ sɑrɔ mi, bɑ ye ɡurɑmɔ.

¹⁴Mɑ ɑ derɑ sɑkɑnu kɑ ɡbeeku yɛɛ yi yi tie, yi nɑɑmɔ yi ye dimɔ.

¹⁵Gusunɔ, wɔllu kɑ tem Yinni, ɑ wurɑmɑ. A mɛɛrio wɔllun di kpɑ ɑ wunɛn resɛm ye nɔni doke. A ye kɔ̃suo.

¹⁶A resɛm dɑ̃ɑ te nɔɔrio te, te tɑ sɑ̃ɑ nɡe wunɛn bii wi ɑ ɡɔsɑ.

¹⁷Wee bɑ resɛm bɔɔrɑ bɑ dɔ̃ɔ mɛni. A bu mɔru kɔsieyo bu ɡbi.

¹⁸A de wunɛn dɑm mu n kɑ wi ɑ ɡɔsɑ u sɔ̃ wunɛn nɔm ɡeuɔ wɑ̃ɑ.

¹⁹Sɑɑ yerɑ sɑ ǹ mɑɑ kɑ nun tondɑmɔ. A de sɑ n wɑ̃ɑ kpɑ sɑ n nun sɑ̃ɑmɔ.

²⁰Gusunɔ, wɔllu kɑ tem Yinni, ɑ sun wɔro. A kɑ sun nɔnu ɡeu mɛɛrio, kpɑ su fɑɑbɑ wɑ.