Read bariba Womusu 85 Bible Online

Womusu 85 - bariba bible

Womusu 85

¹Womu ɡe Koren bibu bɑ wom kowobun wiruɡii kuɑ. Ge wee.

²Yinni Gusunɔ, ɑ wunɛn tem durom kuɑ. Wee ɑ kɑ bɛsɛ Isireli be sɑ sɑ̃ɑ Yɑkɔbun bweseru wurɑmɑ.

³A bɛsɛ wunɛn tɔmbun torɑnu wɔkɑ. A bɛsɛn durum kpuro wukiri.

⁴A ǹ mɑɑ kɑ sun mɔru sɑ̃ɑ. A derɑ wunɛn mɔru kpuro yɑ sure.

⁵Gusunɔ bɛsɛn fɑɑbɑ kowo, ɑ sun wesio nɡe yellu. A ku mɑɑ kɑ sun mɔru ko.

⁶Nɡe kɑɑ n kɑ sun mɔru sɑ̃ɑwɑ sere kɑ bɑɑdommɑɔ? Nɡe kɑɑ n mɔru sɑ̃ɑwɑ sere kɑ bɛsɛn bibun bibu sɔɔ?

⁷A ǹ sun wɑ̃ɑru wesiɑmɔ kpɑ bɛsɛ wunɛn tɔmbu su wɑ su nuku dobu ko wunɛn sɔ̃?

⁸Yinni Gusunɔ, ɑ sun wunɛn durom sɔ̃ɔsio kpɑ ɑ sun fɑɑbɑ ko.

⁹Yinni Gusunɔ, kon swɑɑ dɑki n nɔ ye ɑ ɡerumɔ. Domi bɔri yɛndun ɡɑriyɑ ɑ rɑ n wunɛn tɔmbu sɔ̃ɔmɔ be bɑ nun nɑɑnɛ sɑ̃ɑ mɑ bɑ kun wure wiirɑ ɡɑri sɔɔ.

¹⁰Be bɑ nun nɑsiewɑ ɑ rɑ fɑɑbɑ ko. Kpɑ ɑ de bɛɛrɛ yɑ n wɑ̃ɑ bɛsɛn tem sɔɔ.

¹¹Tɔn ɡeeru kɑ bɔrɔkinirɑ koo wurɑmɑ kpɑ ɡem kɑ bɔri yɛndɑ n wɑ̃ɑ tem mɛ sɔɔ.

¹²Bɔrɔkiniru tɑ koo se tem mɛ sɔɔ nɡe dĩɑ bwese te bɑ duurɑ, kpɑ ɡem mu sɑrɑmɑ wɔllun di.

¹³Yinni Gusunɔn tiiwɑ u koo sun bɔri yɛndu wɛ̃, kpɑ bɛsɛn tem mu binu mɑ.

¹⁴Gemɑ mu ko n nùn ɡbiiye, kpɑ mu win swɑɑ sɔmɛ.