Read bariba Womusu 88 Bible Online

Womusu 88 - bariba bible

Womusu 88

¹Womu ɡe Koren bibu bɑ wom kowobun wiruɡii kuɑ. Bɑ ɡu kuɑwɑ kɑ ɡuuru. Hemɑni Esirɑhiɡiiwɑ u ɡu kuɑ. Ge wee.

²Yinni Gusunɔ nɛn fɑɑbɑ koowo, nɑ rɑ n nɔɔɡiru suewɑ wunɛn wuswɑɑɔ wɔ̃kuru kɑ sɔ̃ɔ sɔɔ.

³A de ɑ nɛn kɑnɑru nɔ. A swɑɑ tem kpĩiyɔ ɑ nɔ ye nɑ nun kɑnɑmɔ.

⁴Wee wɑhɑlɑ yɑ mɑn deemɑ n kpɑ̃ sere nɑ ɡɔribun wɑ̃ɑ yeru turuku kuɑ.

⁵Nɑ wɑ̃ɑ be bɑ ɡɔɔ dɔɔn wuurɔ. Nɑ ǹ mɑɑ dɑm mɔ.

⁶Wee nɑ kpĩ kɑ ɡɔribu sɑnnu. A derɑ nɑ wɑ̃ɑ kɑ be sɑnnu sikirɔ, be, be ɑ ǹ mɑɑ yɑɑyɑmɔ, ɑ ǹ mɑɑ bu nɔɔrimɔ.

⁷A mɑn kpɛ̃ɛ wɔru bɔkɔ sɔɔ mi yɑm wɔ̃kurɑ wɑ̃ɑ.

⁸A mɑn mɔru seesi, mɑ n sɑ̃ɑre nɑ nim mwɛɛre.

⁹A derɑ nɛn kpɑɑsibu bɑ mɑn deri. A derɑ bɑ mɑn tusɑ, mɑ nɑ tɑɑrere nɑ ǹ kpɛ̃ n nundɑ nɛn wɑhɑlɑn di.

¹⁰Nɛn nɔni dɑm dwiiyɑ nɔni swɑ̃ɑrun sɔ̃. Yinni Gusunɔ, tɔ̃ru bɑɑtere nɑ rɑ nɔmɑ yiiyewɑ wunɛn mi ɡiɑ nɑ n nun somiru kɑnɑmɔ.

¹¹Gɔribɑ ɑ rɑ mɑɑmɑɑki kue? Gɔribɑ bɑ koo kpĩ bu se bu nun sɑ̃?

¹²Gɔribɑ bɑ koo kpĩ bu wunɛn bɔrɔkinirun ɡɑri ɡere siki wɔruɔ? Bɑ koo kpĩ bu wunɛn tɔn ɡeerun ɡɑri ɡere ɡɔribun wɑ̃ɑ yerɔ?

¹³Bɑ koo kpĩ bu wunɛn mɑɑmɑɑki wɑ yɑm wɔ̃kurɔ? Bɑ koo kpĩ bu wunɛn ɡem tubu ɡɔriɔ mi bɑ rɑ tɔmbu duɑri?

¹⁴Yinni Gusunɔ, wunɑ nɑ rɑ fɑɑbɑ kɑnɛ. Bururu bɑɑtere, wunɑ nɑ rɑ nɔɔɡiru sue.

¹⁵Yinni Gusunɔ, mbɑn sɔ̃nɑ ɑ mɑn wunɛn wuswɑɑ berue. Mbɑn sɔ̃nɑ ɑ ǹ kĩ n nun wɑ.

¹⁶Sɑɑ nɛn birun di, nɑ wɔnwɔndu soorewɑ nɑ ɡɔɔ dɔɔ. Nɑ burisinɛ nɔni swɑ̃ɑ te ɑ mɑn kpɛ̃ɛn sɔ̃.

¹⁷Nɛ sɔɔrɑ wunɛn mɔru yɑ wɔri, mɑ yɑ mɑn ɡoomɔ.

¹⁸Yɑ kɑ mɑn sikerenɛ tɔ̃ɔ bɑɑtere nɡe nim bweru. Ye kpurowɑ yɑ mɑn wukiri.

¹⁹A derɑ nɛn kpɑɑsibu kɑ nɛn bɔrɔbɑ bɑ mɑn biru kisi. Be kpuro bɑ mɑn deri.