Read bariba Womusu 9 Bible Online

Womusu 9 - bariba bible

Womusu 9

¹Womu ɡe Dɑfidi u wom kowobun wiruɡii kuɑ. Bɑ ɡu kuɑwɑ kɑ ɡɔ̃ru yɑ̃kɑ. Ge wee.

²Yinni Gusunɔ, kon nun siɑrɑ kɑ nɛn ɡɔ̃ru kpuro. Kon wunɛn sɔm mɑɑmɑɑkiɡiɑn ɡɑri kpɑrɑ. Kon womu ko kɑ nuku dobu. Yinni Wɔrukoo, kon nun tɔmɑ.

⁴Nɛn yibɛrɛbɑ bɑ nun wɑ, bɑ biruku yirɑ wurɑ. Nɛn yibɛrɛbɑ bɑ nun wɑ, bɑ wɔrukɑ bɑ ɡbisukɑ.

⁵Yinni Gusunɔ, wunɛ wi ɑ sɔ̃ wunɛn sinɑ ɡɔnɑɔ, ɑ rɑ siri dee dee. Wunɛ wi ɑ sɔ̃ wunɛn sinɑ ɡɔnɑɔ, ɑ mɑn ɡem wɛ̃.

⁶Yinni Gusunɔ, ɑ bwese ni nu ǹ nun yɛ̃ ɡerusi. A tɔn kɔ̃sobu kpeerɑsiɑ. A ben yĩsɑ ɡo sere kɑ bɑɑdommɑɔ.

⁷Yinni Gusunɔ, ɑ nɛn yibɛrɛbɑn wusu kɔsukɑ. A ben tii kpeerɑsiɑ mɑm mɑm. Bɑ ǹ mɑɑ bu yɑɑyɑmɔ sere kɑ bɑɑdommɑɔ.

⁸Yinni Gusunɔ, ɑ sɔ̃ wunɛn sinɑ ɡɔnɑɔ. Kɑɑ n sɑ̃ɑwɑ sunɔ sere kɑ bɑɑdommɑɔ. Wunɑ ɑ hɑnduniɑ kpɑre ɡem sɔɔ. Wunɑ ɑ tɔmbu sirimɔ dee dee.

¹⁰Yinni Gusunɔ, ɑ sɑ̃ɑwɑ be bɑ dɑm dɔremɔn kɔ̃so. A sɑ̃ɑwɑ be bɑ kpikiru suɑn kuku yeru.

¹¹Yinni Gusunɔ, be bɑ wunɛn yĩsirun bɛɛrɛ yɛ̃, bɑ rɑ n nun nɑɑnɛ sɑ̃ɑ. Be bɑ nun kɑsu, ɑ ku rɑ bu biru kisi.

¹²Yinni Gusunɔ u win sinɑ ɡɔnɑ tɛriɑ Siɔniɔ. I nùn siɑro kɑ womusu. I win sɔmɑn ɡɑri kpɑro. I de bwesenu kpuro nu yi nɔ.

¹³U rɑ be bɑ wuri mɔ̀ yɑɑye. U rɑ be bɑ nɔni sɔ̃ɔren kɑnɑru nɔ. U rɑ be bɑ bu dɑm dɔremɔ sɛɛyɑsie.

¹⁴Yinni Gusunɔ, ɑ mɑn durom kuo. A mɛɛrio wɑhɑlɑ ye nɑ mɔ̀ be bɑ mɑn tusɑn sɔ̃. A mɑn wɔro ɡɔɔn nɔmɑn di,

¹⁵kpɑ n kpĩ nɑ n wɑ̃ɑ Siɔnin tɔmbun suunu sɔɔ, nɑ n tɑkɑru mɔ̀ ye ɑ mɑn kuɑn sɔ̃, nɑ n nuku dobu mɔ̀ fɑɑbɑ ye ɑ mɑn kuɑn sɔ̃.

¹⁶Wee bwese tukunu nu suurɑ ɡbɑ ɡɑbun sɔ̃, mɑ nin tii nu wɔri ye sɔɔ. Nu ɡɑbu yinɑ bɛriɑ, mɑ nin tiin nɑɑsu wɔri ye sɔɔ. Tɔn kɔ̃sobɑ sɔm kɔ̃sunu kuɑ. Mɑ ben tii bɑ nin ɑre wɑ. Yinni Gusunɔ u sɔ̃ɔsi mɑ u rɑ siri dee dee.

¹⁸Wee ye u koo de n koorɑ. Tɔn kɔ̃sobɑ koo ɡbiwɑ. Be bɑ nùn yinɑ bɑ koo kɑm ko.

¹⁹Adɑmɑ u ku rɑ yɑ̃ɑrobu duɑri. U rɑ de wɔnwɔndobu bɑ n yĩiyɔbu mɔ wi sɔɔ.

²⁰Yinni Gusunɔ, ɑ seewo. A ku de bu nɛɛ, tɔnuwɑ u kɑ nun kinɛnu mɔ̀. A ku de bwese tukunu nu nun ɑtɑfiiru ko. A bu sɛɛyɑsio nɡe mɛ n weenɛ,

²¹kpɑ nu bɛrum soorɑ, nu ɡiɑ mɑ nu sɑ̃ɑwɑ tɔn dirobu. Yinni Gusunɔ, ɑ seewo.