Read bariba Womusu 90 Bible Online

Womusu 90 - bariba bible

Womusu 90

¹Mɔwisi Gusunɔn sɔm kowo u kɑnɑru kuɑ u nɛɛ, Yinni, sɑɑ yellun di, wunɑ ɑ sɑ̃ɑ bɛsɛn kuku yeru.

²A sɑ̃ɑwɑ Gusunɔ ɑ sere ɡuunu kɑ hɑnduniɑ tɑkɑ kuɑ. Mɛyɑ kɑɑ n mɑɑ sɑ̃ɑ sere kɑ bɑɑdommɑɔ.

³A rɑ de tɔnu u ɡɔsirɑ tuɑ. A rɑ nùn sɔ̃ ɑ nɛɛ, u ɡɔsiro min di, u we.

⁴Wunɛn mi, wɔ̃ɔ nɔrɔbu (1.000) rɑ n sɑ̃ɑwɑ nɡe ɡĩɑn tɔ̃ru te tɑ doonɑ kɔ, ǹ kun mɛ nɡe wɔ̃kurun sɑ̃kiru.

⁵A rɑ tɔnun wɑ̃ɑru nɔru koosiewɑ nɡe mɛ dosu ɡɑ rɑ doonɛ bururu. Gɑ ku rɑ tɛ nɡe yɑkɑsu

⁶sìn wɛ̃su rɑ n bɑɑre bururu, ǹ n kuɑ yokɑ bu su burɑ kpɑ su ɡberɑ.

⁷Wunɛn mɔru yɑ derɑ sɑ ɡɔɔ dɔɔ. Mɑ sɑ nɑndɑ yen sɑɑbu.

⁸A rɑ bɛsɛn torɑnu terɑsiewɑ wunɛn wuswɑɑɔ, kpɑ wunɛn yɑm bururɑm mu bɛsɛn ɑsiri kpuro sɔ̃ɔsi.

⁹Bɛsɛn wɑ̃ɑru tɑ rɑ doonɛwɑ wunɛn mɔrun sɔ̃. Tɑ rɑ doonɛwɑ nɡe wɛ̃siɑ teeru.

¹⁰Tɔnun wɑ̃ɑru tɑ rɑ turi sere wɔ̃ɔ wɑtɑ kɑ wɔkuru, wi u mɑɑ dɑm mɔ, wɔ̃ɔ wɛnɛ, ɑdɑmɑ kɑ mɛ, tɔnun wɑ̃ɑrɑ ku rɑ n ɑrufɑɑni ɡɑɑ mɔ sere wɑhɑlɑ kɑ nɔni swɑ̃ɑru. Domi tɑ rɑ doonɛwɑ fuuku ɡɔri ɡiɑ.

¹¹Wɑrɑ u wunɛn mɔrun dɑm yɛ̃. Wɑrɑ u nun nɑsie yen sɔ̃.

¹²A de sɑ n yɛ̃ mɑ bɛsɛn wɑ̃ɑrun tɔ̃rɑ kun dɛ̃u, kpɑ su ko bwisiɡibu.

¹³Yinni Gusunɔ, sere dommɑ kɑɑ ɡɔ̃ru ɡɔsiɑ ɑ wunɛn mɔru deri. A bɛsɛ wunɛn sɔm kowobun wɔnwɔndu wɑɑwo.

¹⁴A sun wunɛn durom bɑkɑm sɔ̃ɔsio bururu bɑɑtere. Kpɑ sɑ n nuku dobu mɔ sɑ n womusu mɔ̀ bɛsɛn wɑ̃ɑrun tɔ̃ru kpuro sɔɔ.

¹⁵A sun nuku dobu wɛ̃ɛyɔ nɡe mɛ̀n nɔɔ ɑ sun sɛɛyɑsiɑ. Kpɑ ɑ bɛsɛn nuku sɑnkirɑ ten wɔ̃su ɡɔsiɑ nuku dobun wɔ̃su.

¹⁶A de su wunɛn sɔmɑ wɑ bɛsɛ wunɛn sɔm kowobu, kpɑ ɑ bɛsɛn bibun bweseru wunɛn yiiko sɔ̃ɔsi.

¹⁷Gusunɔ bɛsɛn Yinni, ɑ sun durom kuo, kpɑ ɑ de bɛsɛn sɔmɑ kpuro yu ɑrufɑɑni ko.