Read bariba Womusu 99 Bible Online

Womusu 99 - bariba bible

Womusu 99

¹Yinni Gusunɔ u bɑndu dii mɑ tɔmbɑ diirimɔ. U sɔ̃ wɔllun kɔ̃sobun suunu sɔɔ mɑ tem mu yĩirimɔ.

²Yinni Gusunɔ u kpɑ̃ Siɔniɔ. Wiyɑ u bwesenu kpuro mɔ.

³I Yinni Gusunɔn yĩsiru wɔlle suo. Tɑ kpɑ̃, tɑ nɑnum mɔ. U dɛɛrewɑ.

⁴I Yinni Gusunɔn dɑm wɔlle suo. Domi u sɑ̃ɑwɑ sinɑ boko wi u rɑ ɡem kɑ̃. Yinni Gusunɔ, wunɑ ɑ sun sɔ̃ɔsi nɡe mɛ sɑ ko kɑ bɛsɛn wɑ̃ɑru diisinɑ. Wunɑ ɑ Yɑkɔbun bweseru woodɑ wɛ̃ Isireliɔ.

⁵Yinni Gusunɔ u dɛɛre. I nùn wɔlle suo. I nɑ i yiirɑ win sinɑ kitɑrun nuurɔ.

⁶Mɔwisi kɑ Aroni bɑ wɑ̃ɑwɑ win yɑ̃ku kowobu sɔɔ. Sɑmuɛli u sɑ̃ɑwɑ be bɑ rɑ nùn sokun turo. Be kpurowɑ bɑ nùn sokɑ mɑ u bu wurɑri.

⁷U kɑ bu ɡɑri kuɑ sɑɑ ɡuru wii wurorun di. Mɑ bɑ win woodɑbɑ mɛm nɔɔwɑ ye u bu wɛ̃.

⁸Gusunɔ bɛsɛn Yinni, wunɑ ɑ bu wisɑ. Mɑ ɑ kuɑ ben Yinni wi u rɑ bu torɑru suuru kue. Adɑmɑ ɑ bu sɛɛyɑsiɑ ben kɔ̃sɑn sɔ̃.

⁹I Gusunɔ bɛsɛn Yinni siɑro. I yiiro win ɡuu dɛɛrɑrɔ i nùn bɛɛrɛ wɛ̃. Domi u sɑ̃ɑwɑ Dɛɛro.