Read bariba Mɔnnu 30 Bible Online

Mɔnnu 30 - bariba bible

Mɔnnu 30

¹Aɡuri, Yɑken biin ɡɑri wee yi u ɡeruɑ Itiɛli kɑ Itiɛli kɑ Ukɑlin sɔ̃.

²U nɛɛ, ɡeemɑ nɛnɑ nɑ ɡɑri bɑkɑru bo tɔmbu sɔɔ. Nɑ ǹ tɔnun bwisi mɔ.

³Goo kun mɑn bwisi kɛ̃ɛre yi yi koo de n Gusunɔ Dɛɛro ɡiɑ.

⁴Wɑrɑ u wɔllu dɑɑre. Wɑrɑ u sɑrɑmɑre wɔllun di. Wɑrɑ u woo nɔmɑ nɛnure. Wɑrɑ u nim kurusire win yɑ̃nu sɔɔ. Wɑrɑ u tem nɔɔ burɑ yenu kuɑ. Amɔnɑ win yĩsiru. Amɔnɑ win biin yĩsiru. A yɛ̃?

⁵Gusunɔn nɔɔ mwɛɛnu kpuro nu nɑɑnɛ mɔ. Wi u kukuɑ win mi, u sɑ̃ɑwɑ yɛ̃ron tɑrɑkpe.

⁶A ku ɡɑri ɡɛɛ sosi win ɡɑri sɔɔ. À n kuɑ mɛ, ɑ weesu kuɑwɑ, kpɑ u nun sɛɛyɑsiɑ.

⁷Yinni Gusunɔ, ɡɑ̃ɑnu yiru yeniwɑ nɑ nun kɑnɑmɔ. A mɑn nu kɛ̃ɛyɔ nɑ n nu mɔ sere n kɑ ɡbi.

⁸Niyɑ, ɑ ku de nɑ n sɑ̃ɑ wee kowo, kpɑ n ku tɔmbu nɔni wɔ̃ke. A ku mɑɑ de nɑ n sɑ̃ɑ sɑ̃ɑro ǹ kun mɛ ɡobiɡii. A ɡesi mɑn wɛ̃ɛyɔ ye kon di nɑ n kɑ wɑ̃ɑ.

⁹Domi nɑ̀ n ɑrumɑni wɑ too, kon nun siki n nɛɛ, wɑrɑ rɑ n wunɛ, Yinni Gusunɔ. Mɛyɑ nɑ̀ n mɑɑ kuɑ sɑ̃ɑro, kon dɑ n ɡbɛni kpɑ n wunɛn yĩsiru sɑnku.

¹⁰A ku sɔm kowo ɡɑri weesuɡii mɑni win yinnin mi, kpɑ u ku rɑɑ nun bɔ̃rusi, kpɑ bɔ̃ri yi, yi nun di.

¹¹Gɑbɑ wɑ̃ɑ bɑ rɑ ben tundo bɔ̃rusiwɑ kpɑ bu ben mɛron kɔ̃sɑ ɡere.

¹²Gɑbɑ wɑ̃ɑ bɑ rɑ n tɑmɑɑ bɑ dɛɛrewɑ, ɑdɑmɑ bɑ ǹ dɛɛre.

¹³Gɑbɑ wɑ̃ɑ bɑ rɑ n tii sue kpɑ bɑ kun ɡoo ɡɑrɑ.

¹⁴Gɑbɑ wɑ̃ɑ ben donnu nu sɑ̃ɑwɑ nɡe tɑkobi, mɑ ben bɑɑ sɑburosu su sɑ̃ɑ nɡe wobɑ bu kɑ wɔnwɔndobu kɑ sɑ̃ɑrobu wɔri bu ben yɑ̃nu ɡurɑ.

¹⁵Kɔkɔ te tɑ rɑ yɛm nɔ tɑ wɔndiɑbɑ yiru mɔ be bɑ rɑ soku, ɑ sun wɛ̃ɛmɑ, ɑ sun wɛ̃ɛmɑ. Gɑ̃ɑnu nnɛ ɡɑɑ wɑ̃ɑ yɑ ku rɑ debu. Niyɑ, ɡɔribun wɑ̃ɑ yeru, kɑ tɔn kurɔ wĩro, kɑ tem ɡbebum, kɑ sere mɑɑ dɔ̃ɔ wi u ku rɑ nɛɛ, u den debɑ.

¹⁷Wi u win tundo yɑɑkoru mɔ̀ mɑ u win mɛro ɡɛmɑ, ɡunɔ bɑkeru tɑ koo win nɔni wɔwɑ, kpɑ yɑberekunu nu win yɑɑ di.

¹⁸Gɑ̃ɑnu itɑwɑ nu wɑ̃ɑ ni nu ku rɑ mɑn yeeri, niyɑ nɡe mɛ ɡunɔ bɑkeru tɑ rɑ n kɑ yɔ̃ɔwɑ, kɑ nɡe mɛ wɑɑ yɑ kɑ sĩimɔ kpee sɑɑrɑ wɔllɔ, kɑ nɡe mɛ ɡoo nimkuu ɡɑ kɑ sĩimɔ nim wɔ̃ku wɔllɔ. Gɑ̃ɑnu nnɛse mɑɑ wɑ̃ɑ, niyɑ kĩi te tɑ rɑ tɔn durɔ sure tɔn kurɔn mi ɡiɑ.

²⁰Kurɔ tɑnɔ ù n sɑkɑrɑru kuɑ u kpɑ, u rɑ woburewɑ kpɑ u nɛɛ, u ǹ kɔ̃sɑ ɡɑɑ kue, kpɑ u n sɔ̃ nɡe wi u di u kpɑ u nɔɔ wokɑmɔ.

²¹Gɑ̃ɑnu nnɛwɑ yɑ wɑ̃ɑ ye yɑ ku rɑ kɑ tɔmbu nɑɑwɛ. Niyɑ, yoo ù n kuɑ sinɑ boko, kɑ ɡɑri bɔkɔ ù n di u debɑ, kɑ kurɔ wi bɑ ɡɔburu wɑ ù n durɔ wɑ, kɑ mɑɑ tɔn kurɔ yoo wi u win yinni durɔ mwɑɑri.

²⁴Yɛɛ bwese piiminu nnɛ yi wɑ̃ɑ yi yi bwisi mɔ too.

²⁵Gbiikɑɑ tɑni. Yi ǹ dɑm mɔ ɑdɑmɑ yi rɑ yin dĩɑnu ɡurewɑ ɡɛ̃ɛbun sɑɑ sɔɔ.

²⁶Yiruse, yɑɑ ɡɑɑ ye yɑ kɑ sɑɑtɑburu nɛ ye bɑ rɑ soku dɑmɑɑ. Yɑ ǹ dɑm ɡɑm mɔ, ɑdɑmɑ yɑ rɑ yen wɑ̃ɑ yeru kowɑ ɡuurɔ.

²⁷Itɑse twee. Yi ǹ sunɔ mɔ, ɑdɑmɑ kɑ mɛ, yi rɑ yɑriwɑ wuu wuukɑ.

²⁸Nnɛse bɔsu. Kɑɑ kpĩ ɑ ɡe mwɑ, ɑdɑmɑ ɡɑ rɑ kpĩ ɡu du sere sinɑmbun dii sɔɔwɔ.

²⁹Hunde koni nnɛ ɡɛɛ wɑ̃ɑ yèn sɑnum mu nɑnum mɔ. Niyɑ, ɡbee sunɔ ɡe ɡɑ yɛɛ kpuro bwisi kere, ɡɑ ku rɑ mɑɑ biru wure ɡoon wuswɑɑn di, kɑ ɡoo dɔɔ ɡe ɡɑ wiru yɔ̃rɑsie, kɑ boo kinɛ yeburu te tɑ rɑ sɑnnɛ, kɑ sinɑ boko wi u wɑ̃ɑ win tɑbu kowobun suunu sɔɔ.

³²À n tii wɔlle suɑ, ɑ ɡɑri bɑkɑ kookoosu kuɑwɑ. Mɑ ɑ kɔ̃sɑ bwisikɑ ɑ de ɑ wunɛn nɔɔ kpĩ.

³³Domi bɑ̀ n bom swɛ̃, mɛn ɡum mu rɑ ɡɛrewɑ. Bɑ̀ n tɔnun wɛ̃ru so, yɛmɑ mu rɑ yɑri. Mɛyɑ mɑɑ ɑ̀ n tɔnun mɔru seeyɑ, sɑnnɔwɑ yɑ koo mɑ.