Read bariba Wɑɑsu kowo 3 Bible Online

Wɑɑsu kowo 3 - bariba bible

Wɑɑsu kowo 3

¹Hɑnduniɑ ye sɔɔ, ɡɑ̃ɑnu bɑɑnire kɑ nin sɑɑ. Tɑrɑ mi, sɑɑ bɑɑyere kɑ yen sɑɑ.

²Mɑrubu kɑ bin sɑɑ, ɡɔɔ mɑɑ kɑ win sɑɑ. Duurubu kɑ bin sɑɑ, wukɑbu mɑɑ kɑ bin sɑɑ.

³Goberu kɑ ten sɑɑ, bɛkiɑbu mɑɑ kɑ bin sɑɑ. Kɔsukubu kɑ bin sɑɑ, bɑnɑ mɑɑ kɑ yen sɑɑ.

⁴Swĩi kɑ yin sɑɑ, yɛ̃ɛsu mɑɑ kɑ sin sɑɑ. Weeweenu kɑ nin sɑɑ, yɑɑbu mɑɑ kɑ bin sɑɑ.

⁵Kɔ̃ɔ mɛnnɑbu kɑ bin sɑɑ, kɔ̃ɔ mɛnnɑbun deribu kɑ bin sɑɑ. Bɔkɑsinɑɑ kɑ yen sɑɑ, bɔkɑsinɑɑn deribu mɑɑ kɑ bin sɑɑ.

⁶Gɑ̃ɑnun kɑso kɑ ɡen sɑɑ, nin kɔ̃ɔrɑbu kɑ mɑɑ bin sɑɑ. Gɑ̃ɑnun yiibu kɑ bin sɑɑ, nin kɔ̃ɔbu mɑɑ kɑ bin sɑɑ.

⁷Gɛ̃ɛkubu kɑ bin sɑɑ, yinɑ mɑɑ kɑ yen sɑɑ. Mɑribu kɑ bin sɑɑ, ɡɑri ɡerubu mɑɑ kɑ bin sɑɑ.

⁸Kĩɑnɑɑ kɑ yen sɑɑ, tusinɑɑ mɑɑ kɑ yen sɑɑ. Tɑbu kɑ bin sɑɑ, bɔri yɛndu mɑɑ kɑ ten sɑɑ.

⁹Arufɑɑni yerɑ̀ tɔnu u rɑ wɑ win sɔmburu sɔɔ.

¹⁰Nɑ wɑ sɔmɑ ye Gusunɔ u rɑ tɔnu sure.

¹¹Yinni Gusunɔ u rɑ ɡɑ̃ɑnu kpuro kowɑ nin sɑɑ sɔɔ nu n wɑ̃. U mɑm doke tɔnun bwisikunu sɔɔ mɑ ɡɑ̃ɑnu wɑ̃ɑ ni nu ku rɑ kpe, bɑɑ mɛ tɔnu kun kpɛ̃ u tubu sɔmɑ ye Gusunɔ u mɔ̀ sɑɑ toren di sere kɑ hɑnduniɑn kpeerɔ.

¹²Nɑ tubɑ mɑ ɡɑ̃ɑnu sɑri ni nu wɑ̃ mɑ kun mɔ tɔnu u nuku dobu ko kpɑ u wɑ̃ɑ ɡeeru di win wɑ̃ɑrun tɔ̃ru kpuro sɔɔ.

¹³Adɑmɑ tɔnu ù n wɑɑmɔ u dimɔ u nɔrumɔ mɑ u nuku dobu mɔ win sɔmɑn ɑren sɔ̃, ye, yɑ sɑ̃ɑwɑ Gusunɔn kɛ̃ru.

¹⁴Nɑ ɡiɑ mɑ ye Gusunɔ u kuɑ kpuro, yɑ koo tɛwɑ. Bɑ ǹ ɡɑ̃ɑnu ɡɑnu sosimɔ ye sɔɔ, bɑ ǹ mɑɑ ɡɑ̃ɑnu ɡɑnu kɑwɑmɔ ye sɔɔ. Nɡe mɛyɑ Gusunɔ u rɑ ko kpɑ tɔmbu bu kɑ nùn nɑsiɑ.

¹⁵Ye yɑ wɑ̃ɑ tɛ̃, kɑ ye yɑ ko n wɑ̃ɑ siɑ, yɑ rɑɑ wɑ̃ɑ kɔ. Gusunɔ u rɑ dewɑ ye kpuro yu mɑɑ wure yɑ n koorɑmɔ.

¹⁶Yen biru, nɑ wɑ siri ɡbɑburɔ mɑ kɔ̃sɑ kowo u ɡemɡii siribu di hɑnduniɑ ye sɔɔ.

¹⁷Mɑ nɑ tii sɔ̃ɔwɑ nɑ nɛɛ, Gusunɔ u koo ɡemɡii kɑ tɔn kɔ̃so siri. Domi ɡɑ̃ɑnu bɑɑnire kɑ nin sɑɑwɑ. Nɡe mɛyɑ bɑ koo mɑɑ kookoosu bɑɑsire siri.

¹⁸Nɑ mɑɑ tii sɔ̃ɔwɑ nɑ nɛɛ, sɔ̃ɔ teeru, Gusunɔ u koo tɔmbun lɑɑkɑri mɛɛri kpɑ ben tii bu ɡiɑ mɑ bɑ ǹ yɛɛ sɑnɔ kere.

¹⁹Domi tɔnun kɔkɔrɔ kɑ yɛɛɡiɑ yɑ sɑ̃ɑwɑ tiɑ. Be kpuro bɑ rɑ ɡbiwɑ. Sɑɑ ye sɔɔ, tɔnu u ǹ yɛɛ sɑnɔ kere. Yeni yɑ tubum sɛ̃.

²⁰Gɑ̃ɑnu kpuro nu dɔɔwɑ yɑm tem. Tuɑ bɑ kɑ ni kpuro kuɑ. Tuɑ ye sɔɔrɑ ni kpuro nu mɑɑ wurɔ.

²¹Wɑrɑ koo kpĩ u nɛɛ, tɔnun hundewɑ yɑ rɑ yɔ wɔllɔ kpɑ yɛɛɡiɑ yɑ n wɑ̃ɑ temɔ.

²²Ye nɑ wɑ n burɑm bo tɔnun sɔ̃, yerɑ u nuku dobu ko kɑ win sɔmburun ɑre. Yerɑ u mɔ mi. Domi wɑrɑ u koo mɑɑ de u nuku dobu ko kɑ ye yɑ wee win biru.