Read bariba Womu Duro 1 Bible Online

Womu Duro 1 - bariba bible

Womu Duro 1

¹Womu ɡe ɡɑ dobu bo wee. Sɑlomɔɔwɑ ɡɑ kɑ yɑ̃.

²ɑ mɑn sɔ̃suo kɑ wunɛn tiin nɔɔ. Domi wunɛn kĩrun kookoosu su tɑm dobu kere.

³Wunɛn wɑni yi nuburu do. A sɑ̃ɑwɑ nɡe turɑre ye yɑ pusɑ. Yen sɔ̃nɑ wɔndiɑbɑ bɑ nun kĩ.

⁴A mɑn tii ɡɑwemɑ kpɑ su nun nɑɑ swĩi kɑ dukɑ. A sɑ̃ɑwɑ nɛn sunɔ, ɑ kɑ mɑn doo wunɛn wɑ̃ɑ yerɔ. Wunɛn sɑɑbuwɑ sɑ nuku dobu mɔ. Wunɛn kĩru tɑ tɑm dobu kere. Bɑ ɡem mɔ be bɑ nun kĩ.

⁵Yerusɑlɛmun wɔndiɑbɑ, i swɑɑ dɑkio i nɔ. Nɑ tĩri, ɑdɑmɑ nɑ sɑ̃ɑ kurɔ burɔ. Nɑ tĩri nɡe Kedɑɑn kuu bekuruɡinu, ɑdɑmɑ nɑ wɑ̃wɑ nɡe beku kɑrenu ni nu wɑ̃ɑ Sɑlomɔɔn sinɑ kpɑɑrɔ.

⁶I ku mɑn ɡɛm yèn sɔ̃ nɑ tĩri. Sɔ̃ɔwɑ u mɑn kuɑ mɛ. Nɛn sesubu bɑ kɑ mɑn mɔru kuɑ. Bɑ mɑn kuɑ ben reseɛm dɑ̃ɑ ɡbɑɑrun kɔ̃so. Adɑmɑ nɑ ǹ nɛn tiiɡiru kɔ̃su.

⁷A mɑn sɔ̃ɔwɔ nɛn kĩnɑsi mi ɑ rɑ wunɛn sɑbenu kpɑre, kɑ mi ɑ rɑ de nu sɔ̃ɔ sure. Kpɑ nɑ kun mɑɑ sirenɛ wunɛn berusebun sɑbenun suunu sɔɔ.

⁸wunɛ wi ɑ tɔn kurɔbu kpuro burɑm kere, ɑ̀ kun yɑm mi yɛ̃, ɑ doo ɑ yɑ̃ɑ ɡɔ̃ɔn yirɑ swĩi. Kpɑ ɑ wunɛn bonu kpɑrɑ kpɑrobun wɑ̃ɑ yerun bɔkuɔ.

⁹nɛn kĩnɑsi, ɑ kɑ dum niɑ weenɛ ye yɑ Eɡibitin sunɔn tɑbu kɛkɛ ɡɑwɑmɔ.

¹⁰Wunɛn burɑ yɑ̃nu nu rɑ de wunɛn bɑɑnu nu mɑn wɛ̃re. Wunɛn wĩirɑ kɑ ɡoonu wɑ̃.

¹¹sɑ ko nun sɑbɑ kuɑ ye yɑ wurɑ kɑ sii ɡeesu mɛnnɛ.

¹²sɑnɑm mɛ sinɑ boko u sɔ̃ kɑ wiɡibu, nɛn turɑren nuburɑ pusɑ.

¹³Nɛn kĩnɑsi u nuburu dowɑ nɡe turɑre ye bɑ mɔ̀ miru, ye yɑ sure nɛn tororɔ.

¹⁴Nɛn kĩnɑsi u sɑ̃ɑwɑ nɡe dɑ̃ɑ wɛ̃ɛ burɑsu. Su rɑ kpiwɑ resɛm dɑ̃ɑ ɡbɑɑrɔ Enɡɛdiɔ.

¹⁵nɛn kĩnɑsi, ɑ sɑ̃ɑwɑ kurɔ burɔ. Wunɛn nɔni yi bɑllimɔ nɡe wɑɑ bɑkɑɡii.

¹⁶nɛn kĩnɑsi, ɑ sɑ̃ɑwɑ durɔ burɔ, wunɑ ɑ mɑn wɛ̃re. Bɛsɛn kpin yeru tɑ ko n nɔɔ nɛ nɡe yɑkɑ bekusu.

¹⁷Dɑ̃ɑ ye bɑ mɔ̀ sɛduru, yerɑ bɑ kɑ bɛsɛn dirun dɑ̃ɑ mwɑɑnɑtiɑ kuɑ. Mɑ bɑ ten yɑri kuɑ kɑ dɑ̃ɑ ye bɑ mɔ sipɛrɛ.