Read bariba Esɑi 10 Bible Online

Esɑi 10 - bariba bible

Esɑi 10

¹Bɔ̃rurobɑ be bɑ rɑ woodɑ yi ye yɑ ǹ sɑ̃ɑ dee dee. Kpɑ bu ye yore bu yi bu kɑ ben tɔmbu dɑm dɔre,

²bu kɑ yinɑ bu sɑ̃ɑrobu ben ɡem wɛ̃, kpɑ bu bwɛ̃ɛbwɛ̃ɛbu ɡem birɑ, bu ɡɔminibu kɑ ɡobekubɑn ɑrumɑni mwɑ yu ko beɡiɑ.

³Sɑnɑm mɛ Yinni Gusunɔ u koo bɛɛ sɛɛyɑsiɑ, mbɑ i ko i ko. Sɑnɑm mɛ kɑm kobu bu koo bɛɛ wɔri sɑɑ tontonden di, mbɑ i ko i ko. Weren miyɑ i ko i duki dɑ i kɑ fɑɑbɑ wɑ. Mɑ ɡiɑ i ko i bɛɛn ɑrumɑni bere.

⁴Bɑ koo ɡɑbu yoru mwɛɛri kpɑ bu ɡɑbu ɡo. Adɑmɑ kɑ mɛ, Yinni Gusunɔn mɔru kun suremɔ. U koo mɑɑ bu nɔmu doke u sɛɛyɑsiɑ.

⁵Yinni Gusunɔ u nɛɛ, bɔ̃rurobɑ bɛɛ Asiriɡibu. Kon bɛɛ kowɑ nɡe nɛn bokuru te kon kɑ Isirelibɑ sɛɛyɑsiɑ nɛn mɔru yɑ̀ n seewɑ.

⁶Nɑ derɑ i bwese te tɑ ǹ nɛn bɛɛrɛ yɛ̃ wɔri te tɑ rɑ nɛn mɔru seeye, kpɑ i tu tɑɑku nɡe swɑɑn pɔtɔkɔ i ten ɑrumɑni ɡurɑ.

⁷Adɑmɑ n ǹ dɑɑ ye, bɛɛ Asiriɡibu i ɡɔ̃ru doke. I ɡɔ̃ru dokewɑ i bwese dɑbinu kpeerɑsiɑ.

⁸Domi bɛɛn sinɑ boko u nɛɛ, win tɑbu sinɑmbu bɑ sɑ̃ɑwɑ nɡe bwese ni nu tien sinɑmbu.

⁹U mɑɑ wusu nɔmɑ doke si su wɑ̃ɑ win swɛɛ sɔɔ n kɑ ɡirɑri Yerusɑlɛmuɔ. Wuu siyɑ Kɑlinɔ kɑ Kɑɑkemisi kɑ Hɑmɑti kɑ Aɑpɑdi kɑ Sɑmɑri kɑ Dɑmɑsi.

¹⁰U sin sinɑmbu kɑmiɑ sìn bũnu nu Yerusɑlɛmu kɑ Sɑmɑriɡinu dɑbiru kere.

¹¹Nɡe mɛ u Sɑmɑriɡibu kuɑ kɑ ben bũnu, nɡe mɛyɑ u koo Yerusɑlɛmuɡibu kɑ ben bũnu kuɑ.

¹²Adɑmɑ nɛ, Yinni Gusunɔ, nɑ̀ n nɛn himbɑ kpuro yibiɑ Siɔnin ɡuurɔ, kɑ Yerusɑlɛmuɔ, kon Asirin sinɑ boko sɛɛyɑsiɑ, win ɡɔ̃ru bɔbunu kɑ win tii suɑbun sɔ̃.

¹³Domi u ɡerumɔ u mɔ̀, win tiin dɑm kɑ win tiin bwisiyɑ u kɑ nɑsɑrɑ wɑ. U bwese tukunun tem mwɑ, mɑ u ben ɑrumɑni ɡurɑ. U sinɑmbu wɔri nɡe tɑbu durɔ dɑmɡii, mɑ u bu bɑndu yɑrɑ.

¹⁴U ben ɑrumɑni ɡurɑwɑ nɡe mɛ bɑ rɑ sɛ̃ɑ ɡure ɡunɔbun sokurɔ. U ye kpuro ɡurɑwɑ ben tem mɛ sɔɔ nɡe sɛ̃ɑ ye ɡunɔ ɡɑ deri. Goo kun kɑ tii yinɛ ǹ kun mɛ u nɔɔɡiru suɑ u kuukɑ ko. Adɑmɑ nɑ bikiɑmɔ,

¹⁵ɡbɑ̃ɑ, yɑ rɑ tii bɛɛrɛ wɛ̃ wi u kɑ ye sɔmburu mɔ̀n wuswɑɑɔ? Sii, yɑ rɑ tii sue wi u kɑ ye sɔmburu mɔ̀n wuswɑɑɔ? Asirin sinɑ boko wi, u sɑ̃ɑ nɡe dɛkɑ ye tɔnu u suɑ mɑ yɑ nùn sĩikiɑmɔ, ǹ kun mɛ bokuru te tɔnu u nɛni, mɑ tɑ nùn fĩɑmɔ.

¹⁶Yen sɔ̃nɑ nɛ Gusunɔ, wɔllu kɑ tem Yinni, kon de win tɑbu durɔbu bu woorɑ. Kpɑ dɔ̃ɔ u nɑ u bu wukiri sɑnɑm mɛ u wɑ̃ɑ win sinɑndun yiiko sɔɔ.

¹⁷Nɛ, Isirelibɑn yɑm bururɑm, kon ɡɔsiɑ dɔ̃ɔ. Kpɑ nɛn dɛɛrɑru tu ko dɔ̃ɔ yɑrɑ yu ben sɑ̃ki kɑ ɑwĩi kpuro mwɑ sɔ̃ɔ teeru.

¹⁸Yɑ koo ben dɑ̃ɑ sɔ̃ɔ kɑ ben tem bɛɛrɛ kpuro mwɑ mɑm mɑm. Kpɑ mu n sɑ̃ɑ nɡe bɑrɔ wi u ɡɔɔ dɔɔ.

¹⁹Dɑ̃ɑ ni nu koo tiɑ mi, nu ǹ ko n dɑbi. Bɑɑ bii u koo kpĩ u nin ɡeeru yore.

²⁰Tɔ̃ɔ te sɔɔ, Isireli be bɑ tie bɑ yɑrɑ tɑbun di, bɑ ǹ mɑɑ somiru kɑsumɔ bwese ni nu bu kpeerɑsiɑmɔn mi. Adɑmɑ bɑ koo ben nɑɑnɛ dokewɑ nɛ, Gusunɔ, ben Yinni Dɛɛron mi.

²¹Kpɑ bu wurɑmɑ nɛ, Gusunɔ Dɑm kpuroɡiin mi.

²²Bɑɑ bɑ̀ n dɑɑ dɑbi nɡe nim wɔ̃kun yɑni sɛɛri, ben sukum tɔnɑwɑ mu koo wurɑmɑ. Domi nɛ, Yinni Gusunɔ, wɔllu kɑ tem Yinni, nɑ yen himbɑ yi kɔ n kɑ bu kpeerɑsiɑ. Nɛn ɡem mu koo sɔ̃ɔsirɑ n bɑndɑ. Tem mɛ kpurowɑ kon kpeerɑsiɑ nɡe mɛ nɑ yi.

²⁴Nɛ Gusunɔ, wɔllu kɑ tem Yinni, nɑ ɡeruɑ nɑ nɛɛ, bɛɛ nɛn tɔmbu, bɛɛ be i wɑ̃ɑ Siɔniɔ, i ku Asiriɡibun bɛrum ko, be bɑ bɛɛ soomɔ kɑ bokuru nɡe mɛ Eɡibitiɡibɑ rɑɑ bɛɛ kuɑ.

²⁵Adɑmɑ, n tie fiiko sɛɛyɑsiɑ bi nɑ bɛɛ mɔ̀ n kɑ kpe, kpɑ nɛn mɔru yu wurɑ ben mi, n bu kpeerɑsiɑ.

²⁶Nɛ Gusunɔ, wɔllu kɑ tem Yinni, kon ɡoo dendi nɡe bokuru u bɛɛ sɛɛyɑsiɑ nɡe mɛ nɑ Mɑdiɑnibɑ kuɑ Horɛbun ɡuurɔ. Kon nɛn dɛkɑ tĩi nim wɔ̃kun berɑ ɡiɑ n bu sɛɛyɑsiɑ nɡe mɛ nɑ Eɡibitiɡibu kuɑ.

²⁷Tɔ̃ɔ te sɔɔ, kon bɛɛ nɛn tɔmbu yɑrɑ yorun di kpɑ i bɛɛn sɔmunu sɔbiɑ kpɑ i suɡu potɑ bɛɛn wĩinun di. I ǹ mɑɑ suɡu dokemɔ yèn sɔ̃ nɑ bɛɛ ɡɔsɑ nɑ ɡum tɑ̃re.

²⁸Yibɛrɛbɑ bɑ Ayɑti wɔri bɑ mwɑ, mɑ bɑ Miɡoroni tɔburɑ bɑ ben sɔmunu yi Mikimɑsiɔ.

²⁹Bɑ kokɑ bɑ doonɑ mɑ bɑ dɑ bɑ kpunɑ Gebɑɔ. Yerɑ Rɑmɑ yɑ diirumɔ. Mɑ Sɔɔlu Isirelibɑn sinɑ boko yerukoon wuu ɡe bɑ mɔ̀ Gebɑn tɔmbu bɑ duki yɑkikirɑ.

³⁰Bɛɛ Gɑlimuɡibu i wuri koowo. Bɛɛ Lɑisiɡibu i n tii sɛ. Bɛɛ mɑɑ Anɑtɔtuɡibu i ko i kɑm ko.

³¹Mɑdimɛnɑɡibu bɑ yɑrinɑ. Mɑ Gebimun tɔmbɑ yɑkikirɑ bɑ kuku yenu kɑsu.

³²Gisɔ mɑm yibɛrɛ be, bɑ wɑ̃ɑ Nɔbuɔ bɑ ɡɑ̃senu kpɑrɑmɔ Siɔnin ɡuurɔ bu kɑ Yerusɑlɛmun tɔmbu nɑndɑsiɑ.

³³Wee Gusunɔ, wɔllu kɑ tem Yinni, u koo bu bɔɔri nɡe dɑ̃ɑ kɑ̃ɑsi. U koo yi yi kpɑ̃ɑru bo burɑ u kɑwɑ.

³⁴U koo bu bɔɔriwɑ u suriri nɡe mɛ bɑ rɑ dɑ̃nu bɔɔri kɑ ɡbɑ̃ɑ Libɑnin dɑ̃ɑ sɔ̃ɔwɔ, kpɑ ben ɡirimɑ yu kpe.