Read bariba Esɑi 13 Bible Online

Esɑi 13 - bariba bible

Esɑi 13

¹Wee, ye Yinni Gusunɔ u Esɑi, Amɔtin bii sɔ̃ɔsi kɑ̃siru sɔɔ Bɑbilonin sɔ̃.

²U nɛɛ, i ɡidi bɔrɑ yɔ̃rɑsio ɡuuru wɔllɔ mi ɡɑ̃ɑnu sɑri. I tɑbu kowobu nɔɔɡiru sueyo, kpɑ i bu yĩreru kuɑ kɑ nɔmɑ, kpɑ bu duki nɑ bu du Bɑbilonin kɔnnɔsun di.

³Wee, nɑ nɛn tɑbu kowo be nɑ ɡɔsɑ woodɑ wɛ̃. Nɑ tɑbu durɔ wɔruɡɔ be sokɑ bu kɑ nɛn mɔru suresiɑ, be, be bɑ rɑ n nuku dobu mɔ nɛn kpɑ̃ɑrun sɔ̃.

⁴Mɑ Esɑi u mɛɛrɑ u nɛɛ, i tɔn dɑbinun wurenu swɑɑ dɑkio i nɔ ɡuunun berɑ ɡiɑ. Bwese dɑbinu kɑ sinɑmbu dɑbinɑ nu mɛnnɛ mi, Gusunɔ, wɔllu kɑ tem Yinnin tɑbu kowobɑ be bɑ tɑbun sɔɔru kpɑ. Mɑ u bu mɛɛrɑ mɛɛrɑ u kɑ dɑ.

⁵Be wee bɑ wee sɑnnu sɑɑ mi n tomɑn di bu kɑ tem mɛ kɑm koosiɑ, win mɔrun sɑɑbu.

⁶I ɡɔɔ swĩiyɔ domi Yinni Gusunɔn tɔ̃ɔ te, tɑ turuku kuɑ. Tɑ sɑ̃ɑwɑ kɑm koo bi bu wee wi, Dɑm kpuroɡiin min di.

⁷Yen sɔ̃nɑ tɔmbu kpuron ɡɔmɑ koo dwiiyɑ kpɑ ben wɔruɡɔru tu kpe.

⁸Bɑbiloniɡibɑ koo bɛrum soorɑ, kpɑ ben wɑsi yi dwiiyɑ wuriribun sɔ̃. Bɑ koo tii tɛmɑ nɡe tɔn kurɔ wi u yiire u kĩ u mɑ. Bɑ ko n mɛɛrinɛ ben wuswɑɑ yɑ n burisinɛ.

⁹Wee Yinni Gusunɔn tɔ̃ru tɑ sisi. Tɔ̃ɔ te, tɑ sɑ̃ɑwɑ nɔni swɑ̃ɑruɡiru tè sɔɔ u koo win mɔru bɑkɑ sɔ̃ɔsi. U koo durumɡibu kpeerɑsiɑ, kpɑ tem mɛ, mu ko bɑnsu.

¹⁰Wɔllun kperi kun mɑɑ yɑm dɛɛrɑsiɑmɔ. Sɔ̃ɔ ù n yɑriɔ, min diyɑ u ko n yɑm tĩrɑmɔ. Mɛyɑ suru kun mɑɑ yɑm bururɑsiɑmɔ.

¹¹Yinni Gusunɔ u nɛɛ, kon hɑnduniɑɡibu sɛɛyɑsiɑ ben kɔ̃sɑ ye bɑ mɔ̀n sɔ̃, kɑ mɑɑ nuku kɔ̃suruɡibu ben nuku kɔ̃surun sɔ̃. Kon de be bɑ tii sue bu kɑm ko, kpɑ n be bɑ tɔmbu dɑm dɔremɔ kpeerɑsiɑ.

¹²Kon de bu tɔmbu kɑsu nɡe mɛ bɑ rɑ wurɑ ɡeɑ kɑso de tontondeɔ.

¹³Nɛ Gusunɔ, wɔllu kɑ tem Yinnin mɔrun tɔ̃ru sɔɔ, kon wɔllu yĩiri, kpɑ tem mu diiri sere mɛn sɔɔwɔ.

¹⁴Kpɑ be bɑ rɑɑ yoru dimɔ Bɑbiloniɔ bu duki wurɑ ben temɔ nɡe nɛmu ɡe bɑ ɡire. Bɑ koo duki yɑrinɑ bu dɑ ben tɔmbun mi nɡe yɑɑ sɑbe ni nu kun kpɑro mɔ.

¹⁵Ben wi bɑ nɔmɑ turɑ kpuro wuu ɡe sɔɔ, bɑ koo nùn tweewɑ bu ɡo. Wi bɑ mɑɑ nɑɑ ɡirɑ bɑ mwɑ, bɑ koo nùn ɡowɑ kɑ tɑkobi.

¹⁶Bɑ koo ɑrumɑni ɡurɑ ben yɛnusɔ bu ben bibu munku ben wuswɑɑɔ. Kpɑ bu kɑ ben kurɔbu kpunɑ kɑ dɑm.

¹⁷Kon de Mɛdibɑ bu bu wɔri be, be bɑ ǹ sii ɡeesu kɑ wurɑn binɛ mɔ.

¹⁸Bɑ koo ɑluwɑɑsibɑ tweewɑ bu ɡo. Mɛyɑ bɑ ǹ bii wɛ̃ɛnu buremɔ. Bɑ ǹ mɑɑ bibun wɔnwɔndu mɔ̀.

¹⁹Bɑbiloniwɑ sinɑmbu kpuro bɑ mɛɛrɑ wuu burɔ, mɑ yen tɔmbu bɑ tii sue. Adɑmɑ nɛ, Yinni Gusunɔ, kon ye kpeerɑsiɑ nɡe mɛ nɑ Sodomu kɑ Gomɔrɑ kuɑ.

²⁰Tɔmbu bɑ ǹ mɑɑ sinɑmɔ ye sɔɔ. Yɑ ko n sɑ̃ɑwɑ bɑnsu sere kɑ bɑɑdommɑɔ. Goo kun mɑɑ win kuu bekuruɡiru ɡirɑmɔ mi. Bɑɑ be bɑ yɑɑ sɑbenu kpɑrɑmɔ, bɑ ǹ yɔ̃rɑmɔ mi.

²¹Miyɑ ɡbeeku yɛɛ yi koo wɑ̃ɑ yeru ko. Boorosu su koo yibu yen bɑn si sɔɔ, kpɑ tɑɑtɑɑnu nu mɑɑ nin wɑ̃ɑ yeru ko mi, kpɑ boo kinɛnu nu n yɔ̃ɔkumɔ mi.

²²Purukɑnu kɑ ɡbeeku bɔ̃nu koo kuuki ko yen sinɑ kpɑɑ burɑnu sɔɔ. Wee yen sɑɑ yɑ turuku kuɑ, bɑ ǹ mɑɑ yen tɔ̃ru sosimɔ.