Read bariba Esɑi 14 Bible Online

Esɑi 14 - bariba bible

Esɑi 14

¹Yinni Gusunɔ u koo Isirelibɑ wɔnwɔndu kuɑ. U koo mɑɑ bu ɡɔsi bu ko wiɡibu, kpɑ u bu swĩi ben temɔ. Sɑɑ yerɑ sɔbɑ koo du ben suunu sɔɔ, kpɑ bu mɛnnɑ bɑ n wɑ̃ɑ kɑ be sɑnnu.

²Bwese dɑbinu nu koo kɑ Isirelibɑ wurɑmɑ ben temɔ, kpɑ bu bwese ni ko yobu tem mɛ Yinni Gusunɔ u bu wɛ̃ sɔɔ. Be bɑ rɑɑ Isirelibɑ yoru mwɛɛrɑ bɑ koo mɑɑ ben tii yoru mwɛɛri. Mɛyɑ be bɑ rɑɑ bu dɑm dɔre, bɑ koo mɑɑ ben tii dɑm dɔre.

³Bɛɛ Isirelibɑ, Yinni Gusunɔ u koo de i yoru yɑri, kpɑ i wɛ̃rɑ bɛɛn wɑsirɑru kɑ nɔni swɑ̃ɑrun sɔ̃.

⁴Ù n kuɑ mɛ, womu ɡeniwɑ i ko i kɑ Bɑbilonin sinɑ boko yɛ̃ɛ i nɛɛ, wi u rɑɑ sun dɑm dɔremɔ, u ǹ mɑɑ wɑ̃ɑ. Dɑm dɔrebu kpɑ.

⁵Yinni Gusunɔ u nuku kɔ̃suruɡii be bɑ sun dɑm dɔremɔn dɑm buɑ, mɛ mu sɑ̃ɑ nɡe bokuru.

⁶Wi u rɑ n dɑɑ tɔmbu soomɔ kɑ mɔru wɔnwɔndu sɑri, kpɑ u n tɔmbu dɑm dɔremɔ, bɑ nùn nɔni sɔ̃ɔwɑ sere kɑ nɔrɔ.

⁷Wee tɛ̃ tɔmbɑ wɛ̃re hɑnduniɑ kpuro sɔɔ, mɑ bɑ nuku dobun kuuki mɔ̀.

⁸Bɑɑ kɑ dɑ̃ɑ ni bɑ mɔ̀ sipɛrɛbɑ kɑ sɛdurubɑ ni nu wɑ̃ɑ Libɑniɔ nu nuku dobu mɔ̀, nu mɔ̀, sɑɑ dɔmɑ tèn di ɑ wɔrumɑ, ɡoo ku rɑ mɑɑ nɛ u sun bɔɔri.

⁹Be bɑ wɑ̃ɑ ɡɔribun wɑ̃ɑ yerɔ bɑ seewɑ bu kɑ nun dɑm koosiɑ, be kɑ ben wiruɡibu kpuro. Mɛyɑ sinɑm be bɑ ɡu bɑ seewɑ ben sinɑ ɡɔnin di.

¹⁰Mɑ be kpuro bɑ nùn nɔɔɡiru sue bɑ nɛɛ, wee wunɛn tii ɑ kuɑ dɑm sɑriruɡii nɡe bɛsɛ. Sɑ kuɑ tiɑ.

¹¹Wunɛn bɛɛrɛ ye bɑ rɑ rɑɑ nun wɛ̃, bɑ n mɔrɔkunu soomɔ, wee ye kpuro yɑ wɔri ɡɔribun wɑ̃ɑ yerɔ. Kɔkɔnu nu kuɑ wunɛn kpin yeru kɑ wunɛn bekuru.

¹²Wunɛ wi ɑ sɑ̃ɑ nɡe buruku kperɑ ye yɑ bɑllimɔ, wee ɑ wɔrumɑ wɔllun di. Wunɛ wi ɑ bwesenu kpuro tɑbu di, wunɛ wee bɑ surɑ temɔ, ɑ kpĩ.

¹³Wunɛ wi ɑ rɑ n ɡerumɔ wunɛn ɡɔ̃ruɔ ɑ n mɔ̀, kɑɑ yɔ wɔllɔ, ɑ wunɛn sinɑ ɡɔnɑ tɛriɑ kperin wɔllɔ, kpɑ ɑ sinɑ ɡuuru wɔllɔ sɔ̃ɔ yɛ̃sɑn nɔm ɡeu ɡiɑ, bũnun suunu sɔɔ.

¹⁴Kɑɑ yɔ ɡuru winu wɔllɔ, kpɑ ɑ kɑ Wɔrukoo weenɑ.

¹⁵Adɑmɑ wunɛ wee, bɑ sure ɡɔribun wɑ̃ɑ yerɔ sere wɔrun sɔɔ sɔɔwɔ.

¹⁶Be bɑ nun wɑ kpɑ bɑ n nun mɛɛrɑ tii kɑ lɑɑkɑri bɑ n mɔ̀, n ǹ durɔ wiyɑ mi, wi u rɑ rɑɑ de tɔmbu bu burisinɑ? Kpɑ u bɑndu suriri?

¹⁷U yinɑ u pirisɔmbɑ kɑrɑ. U wusu kɔsukɑ. Mɑ hɑnduniɑ yɑ ɡɔsiɑ bɑnsu.

¹⁸Bwesenu kpuron sinɑ boko bɑɑwure u wɑ̃ɑ u wɛ̃re kɑ bɛɛrɛ win sikirɔ.

¹⁹Adɑmɑ wunɛ, bɑ nun kɑsɑ kuɑ ɑ kɑ wunɛn sikiru tondɑ nɡe dɑ̃ɑ kɑ̃ɑsɑ ye bɑ ǹ kĩ, ǹ kun mɛ nɡe wi bɑ tɑkobi sɔkurɑ bɑ ɡo bɑ sure wɔru sɔɔ ɡe ɡɑ kpenu mɔ, ǹ kun mɛ nɡe ɡoo te bɑ tɑɑkɑ.

²⁰Bɑ ǹ nun sikɑ nɡe sinɑm be, domi ɑ wunɛn tem ɡo, mɑ ɑ wunɛn tɔmbu kpeerɑsiɑ. Bɑ ǹ mɑɑ wunɛn bwese kɔ̃surun ɡɑri mɔ̀.

²¹I sɔɔru koowo i win bibu ɡo kɔ̃sɑ ye ben sikɑdobɑ bɑ kuɑn sɔ̃, kpɑ bu ku rɑɑ se bu mɑɑ hɑnduniɑ tɑbu di, kpɑ bu mɑɑ wusu seeyɑ bu yibu si sɔɔ.

²²Nɛ Gusunɔ, wɔllu kɑ tem Yinni, nɑ nɛɛ, kon Bɑbiloniɡibu seesi n ben bweseru kɑ ben wuun yĩsiru ɡo. Bɑ ǹ mɑɑ ben yirɑ wɑsi.

²³Kon de wuu ɡe, ɡu ko nɡe dɑru bwɑ̃ɑrɑ mi ɡunɔ sɑrenu nu rɑ n wɑ̃ɑ, kpɑ n ɡu kurɑ kɑ yii te tɑ ǹ bu ɡɑ̃ɑnu ɡɑnu deriɑmmɛ. Nɛ Gusunɔ, wɔllu kɑ tem Yinniwɑ nɑ yeni ɡeruɑ.

²⁴Nɛ, Yinni Gusunɔ Dɑm kpuroɡii nɑ bɔ̃ruɑ nɑ nɛɛ, ye nɑ yi, yɑ koo mɑɑ nɑ. Ye nɑ mɑɑ ɡɔ̃ru doke yɑ koo koorɑ.

²⁵Kon Asiriɡibu kɔsuku nɛn tɔmbu Isirelibɑn temɔ. Kon bu tɑɑku nɛn ɡuunu wɔllɔ, kpɑ n nɛn tɔmbu yɑrɑ ben yorun di, bɑ kun ben suɡu kɑ ben sɔmunu sɔɔwɑ.

²⁶Yeniwɑ nɛn himbɑ tɔmbu kpuron sɔ̃. Wee nɑ nɔmu dɛmiɛ n kɑ bwesenu kpuro sɛɛyɑsiɑ.

²⁷Nɛ Gusunɔ, wɔllu kɑ tem Yinni, nɑ̀ n ɡɑ̃ɑnu yi wɑrɑ koo ye yinɑ. Nɑ̀ n nɔmɑ dɛmiɛ wɑrɑ u koo ye kure.

²⁸Wɔ̃ɔ ɡè sɔɔ sinɑ boko Akɑsi u ɡu, wɔ̃ɔ ɡe sɔɔrɑ Yinni Gusunɔ u Filisitibɑ ɡɑri yini sɔ̃ɔwɑ sɑɑ Esɑin nɔɔn di u nɛɛ,

²⁹bɛɛ Filisitibɑ kpuro i ku nuku dobu ko yèn sɔ̃ boku te tɑ rɑɑ bɛɛ soomɔ tɑ bɔɔrɑ. I n yɛ̃ mɑ ì n wɑɑ ɡɔsɔbu sɑrɑri, i ko i surɔkɔru ɡirɑri.

³⁰Sɑɑ ɡɑɑ sisi yè sɔɔ be bɑ sɑ̃ɑru bo bɑ koo wɑ bu di, kpɑ wɔnwɔndobu bɑ n wɑ̃ɑ bɔri yɛndu sɔɔ. Adɑmɑ bɛɛ Filisitibɑ kon de bɛɛn nuuru tu ɡbi ɡɔ̃ɔrun sɔ̃. Be bɑ koo mɑɑ tiɑrɑ, bɑ koo bu ɡowɑ.

³¹Bɛɛ be i wɑ̃ɑ wuun ɡbɑ̃rɑ kɔnnɔwɔ i weeweenu koowo bɛrum sɔ̃. Bɛɛ Filisitibɑ kpuro ɡesi i diirio, domi yibɛrɛbɑ bɑ tuɑ seeye nɡe dɔ̃ɔ wiiru. Bɑ wee sɔ̃ɔ yɛ̃sɑn nɔm ɡeu ɡiɑn di, mɑ ben tɑbu sĩi yi bɑɑsinɛ.

³²Esɑi u nɛɛ, mbɑ sɑ ko Filisitibɑn ɡɔrobu wisi. Sɑ ko nɛɛ, Yinni Gusunɔwɑ u Siɔni swĩi. Miyɑ win tɔn be bɑ sɑ̃ɑ wɔnwɔndobu bɑ koo kuke kɑ bɔri yɛndu.