Read bariba Esɑi 15 Bible Online

Esɑi 15 - bariba bible

Esɑi 15

¹Gɑri yiniwɑ bɑ ɡeruɑ Mɔɑbubɑn sɔ̃. Mɔɑbun tem kpuro mu koo kɑm ko, kpɑ bu Ari Mɔɑbu kɑ Kiri Mɔɑbu kɔsuku wɔ̃ku teeru.

²Diboniɡibu bɑ dɑ bũu sɑ̃ɑ yerɔ kɑ ɡuunu wɔllɔ bu kɑ swĩ. Mɔɑbubɑ bɑ weeweenu mɔ̀ wuu si bɑ mɔ̀ Nɛbo kɑ Mɛdebɑn sɔ̃. Mɑ bɑ ben winu kɑ ben tobunu kɔnɑ nuku sɑnkirɑnun sɔ̃.

³Mɑ bɑ sɑɑkibɑ sebuɑ bɑ wɑ̃ɑ swɛɛ sɔɔ kɑ dii tɛɛriɔ kɑ dii yɑɑriɔ nuku sɑnkirɑnun sɔ̃. Mɑ bɑ weeweenu mɔ̀ bɑ sumɔ kɑ nɔni yĩresu.

⁴Hɛsiboniɡibu kɑ Eleɑleɡibu bɑ fɑɑbɑ kɑnɑmɔ mɑ bɑ ben nɔɔ nɔɔmɔ sere Yɑhɑsiɔ. Bɑɑ Mɔɑbun tɑbu kowobun tii bɑ wuri mɔ̀wɑ bɛrum sɔ̃.

⁵Nɑ fɑɑbɑ kɑnɑmɔ Mɔɑbubɑn sɔ̃ be bɑ kpikiru suɔ bɑ dɔɔ Soɑriɔ kɑ Eɡɑlɑti Selisiyɑɔ. Domi bɑ sumɔ bɑ kɑ Lusitin ɡuunu yɔɔmɔ, bɑ wuri mɔ̀ Koronɑimun swɑɑɔ nuku sɑnkirɑnun sɔ̃.

⁶Dɑɑ te bɑ mɔ̀ Nimurimu ten nim mu ɡberɑ. Yɑkɑ si su wɑ̃ɑ ten ɡɑ̃ɑrɔ su ɡberɑ. Gɑ̃ɑnu kun mɑɑ kpiɑ mi.

⁷Yen sɔ̃nɑ bɑ ben ɑrumɑni ɡurɑ ye yɑ bu tie bɑ kɑ tɔburɑmɔ nim torɑn ɡuru ɡiɔ mi dɑ̃nu wɑ̃ɑ.

⁸Mɔɑbubɑn tem nɔɔ burɑ yenu kpuro sɔɔ, wuri nɔɔrɑmɔ. Ben weeweenu nu nɔɔrɑmɔ sere Eɡɑlɑimuɔ, kɑ mɑɑ Elimun dɔkɔwɔ.

⁹Dɑɑ te tɑ wɑ̃ɑ Dimɔniɔ ten nim mu yɛm yibɑ tɔn be bɑ ɡon sɔ̃. Adɑmɑ Yinni Gusunɔ u koo kpɑm Dimɔni ye nɔni swɑ̃ɑru kpɛ̃ɛ. U koo de yibɛrɛbɑ bu Mɔɑbun kpikobu, kɑ be bɑ tie tem mɛ sɔɔ wɔri nɡe ɡbee sinɑnsu.