Read bariba Esɑi 31 Bible Online

Esɑi 31 - bariba bible

Esɑi 31

¹Bɔ̃rurobɑ Yudɑ be bɑ kpikiru dɔɔ Eɡibitiɔ bu kɑ somiru wɑ. Bɑ ben nɑɑnɛ doke dumi sɔɔ, kɑ tɑbu kɛkɛ dɑbi ni dumi ɡɑwe sɔɔ kɑ sere mɑɑsɔ dɑmɡibu sɔɔ. Adɑmɑ bɑ ǹ Gusunɔ ben Yinni Dɛɛro kɑsu, bu nùn nɑɑnɛ ko.

²Yen sɔ̃nɑ win tii u yɛ̃ ye u mɔ̀. U koo de kɔ̃sɑ yu nɑ. U ǹ mɑɑ win ɡɑri kɔbiɑmɔ. U koo tɔn kɔ̃sobu seesi, kɑ mɑɑ be bɑ bu somimɔ.

³Eɡibitiɡibu bɑ ǹ sɑ̃ɑ Gusunɔ, bɑ sɑ̃ɑwɑ tɔmbu. Mɛyɑ mɑɑ ben dumi yi ǹ dɑm tukum ɡɑm mɔ, yi sɑ̃ɑwɑ yɛɛ diri. Yinni Gusunɔ ù n win dɑm sɔ̃ɔsimɑ, be bɑ somiru kɑsu kɑ be bɑ bu somiru wee, bɑ koo sokurɑ bu wɔruku, kpɑ be kpuro bu mɛnnɑ bu ɡbi.

⁴Amɛniwɑ Yinni Gusunɔ u mɑn sɔ̃ɔwɑ u nɛɛ, ɡbee sunɔ ɡe ɡɑ yɑɑ mwɑ ɡɑ wuri koosimɔ ɡɑ ku rɑ yɑ̃ɑ kpɑrobun bɛrum ko, bɑɑ bɑ̀ n dɑbi mɑ bɑ ɡu tɑrusi bɑ ɡbɑ̃sukumɔ. Nɡe mɛyɑ wi, wɔllu kɑ tem Yinni, u ko n sɑ̃ɑ ù n sɑrɑmɑ u kɑ Siɔnin ɡuuru kɔ̃su, u tu sɑnnɑ.

⁵Nɡe mɛ ɡue yi rɑ n yin binu kɔ̃su, nɡe mɛyɑ wi, wɔllu kɑ tem Yinni, u koo Yerusɑlɛmu yɑkiɑ u ye kɔ̃su.

⁶Yen sɔ̃, bɛɛ Isirelibɑ, bɛɛ be i kɑ Yinni Gusunɔ wi tondɑ n kpɑ̃, i ɡɔ̃ru ɡɔsio kpɑ i wurɑmɑ win mi.

⁷Domi sɑɑ yɑ sisi yè sɔɔ bɛɛn bɑɑwure u koo win bwɑ̃ɑroku ni u sekɑ kɑ sii ɡeesu kɑ wurɑ wunɑ u kɔ̃ ni nu nùn durum koosiɑmɔ.

⁸Mɛyɑ bɑ koo Asiriɡibu kɑm koosiɑ, ɑdɑmɑ n ǹ kɑ tɔnun dɑm. Bɑ koo duki yɑrinɑ tɑbu sɔɔ kpɑ bu ben ɑluwɑɑsibɑ mwɛɛri bu yoo sɔmɑ koosiɑ.

⁹Ben sinɑ boko u koo dukɑ yɑkurɑ bɛrum sɔ̃. Kpɑ ben tɑbu sinɑmbu bu bɛrum soorɑ bu ben ɡidi bɔrɑ biru kisi bu doonɑ. Yeniwɑ Yinni Gusunɔ u ɡeruɑ wi bɑ rɑ sɑ̃ Yerusɑlɛmuɔ kɑ yɑ̃ku dɔ̃ɔ mwɑɑrɑruɡinu.