Read bariba Esɑi 40 Bible Online

Esɑi 40 - bariba bible

Esɑi 40

¹Yinni Gusunɔ u nɛɛ, i nɛn tɔmbu nukuru yɛmiɑsio.

²I Yerusɑlɛmuɡibu nukuru yɛmiɑsio, i nɛɛ, ben yorɑ kpɑ. Domi nɑ bu ben ɡɔbɑ ye bɑ kuɑ kpuron ɑre wɛ̃. Nɑ bu sɛɛyɑsiɑ ben durum ye bɑ kuɑ kpuron sɔ̃.

³Wee ɡoo u ɡbɑ̃rɑmɔ u mɔ̀, i Yinni Gusunɔ swɑɑ yɑbo ɡbɑburɔ, kpɑ i ye nɔɔ nɛrɑsiɑ.

⁴I yen wɔwɑ kpuro kɔruo yu nɔɔ nɛrɑ. I mɑɑ yen ɡuunun ɡunum kɑwo, kpɑ i yen ɡunɡunu nɔɔ nɛrɑsiɑ nu ko nɡe tem tɛɛrɑ kpɑ swɛɛ yi dɛndɑ.

⁵Sɑɑ yerɑ Yinni Gusunɔ u koo win yiiko sɔ̃ɔsi, kpɑ tɔmbu kpuro bu ye wɑ sɑnnu. Yinni Gusunɔn tiiwɑ u ɡeruɑ mɛ.

⁶Yen biru nɑ ɡoon nɔɔ nuɑ ɡɑ nɛɛ, ɑ kpɑro. Mɑ nɑ bikiɑ nɑ nɛɛ, mbɑ kon kpɑrɑ. U nɛɛ, ɑ kpɑro mɑ tɔmbu kpuro bɑ sɑ̃ɑwɑ nɡe yɑkɑsu, mɑ ben burɑru tɑ sɑ̃ɑ nɡe dɑ̃ɑ wɛ̃su.

⁷Yinni Gusunɔ ù n derɑ woo ɡɑ yɑkɑsu swee, su rɑ ɡberewɑ, kpɑ sin wɛ̃su su dɛllɑ. Kɑ ɡem tɔmbu bɑ sɑ̃ɑwɑ nɡe yɑkɑsu.

⁸Yɑkɑsu rɑ ɡbere kpɑ sin wɛ̃su dɛllɑ. Adɑmɑ Yinni Gusunɔn ɡɑri yi ko n wɑ̃ɑwɑ sere kɑ bɑɑdommɑɔ.

⁹Yerusɑlɛmuɡibu, i yɔɔwo ɡuu te tɑ ɡunun wɔllɔ, i nɔɔɡiru suɑ kɑ dɑm i lɑbɑɑri ɡeɑ kpɑrɑ. I ku bɛrum ko. I Yudɑbɑn wusun tɔmbu sɔ̃ɔwɔ i nɛɛ, Gusunɔ ben Yinni u wee.

¹⁰U wee kɑ dɑm u woodɑ wɛ̃ɛmɔ. U win tɔn be u yɑkiɑmɑ kpɑre win wuswɑɑɔ.

¹¹U koo bu kpɑrɑwɑ nɡe mɛ yɑ̃ɑ kpɑro u rɑ ko, u n binu wuuwɑ, u n kɑ nin mɛrobu kpɑre.

¹²Wɑrɑ u koo kpĩ u nim wɔ̃kun nim kɑ win nɔm wɔɔru sɑkɑ ko. Wɑrɑ u koo kpĩ u kɑ win niki binu wɔllu yĩire. Wɑrɑ u koo kpĩ u tem tuɑ kpuro ɡure nɔrɑ sɔɔ. Wɑrɑ u koo kpĩ u ɡuunu kilo sɔndi.

¹³Wɑrɑ u Gusunɔn bwisikunu yɛ̃. Wɑrɑ u nùn bwisi kɛ̃ɛre.

¹⁴Wɑrɑ u kɑ nùn wesiɑnɔ koore, mɑ yɛ̃ro u nùn bwisi kɑ̃. Nɡe wɑrɑ u nùn ɡem kɑ bwisi kɑ lɑɑkɑrin swɑɑ sɔ̃ɔsire.

¹⁵Win mi, bwesenu kpuro nu sɑ̃ɑwɑ piiminu nɡe nim burɑ ye yɑ dɑ̃ɑre kotoru sɔɔ. Nu sɑ̃ɑwɑ nɡe kpee tɑnɑ ye yɑ wɑ̃ɑ kilo wɔllɔ, ǹ kun mɛ nɡe tuɑ ye woo ɡɑ kɑ doonɑmɔ.

¹⁶Yɛɛ yi yi wɑ̃ɑ Libɑnin dɑ̃ɑ sɔ̃ɔwɔ yi ǹ dɑbiru turi bu kɑ nùn yɑ̃kuru kuɑ. Mɛyɑ dɑ̃ɑ nin tii nu ǹ turi bu kɑ yɑ̃ku dɔ̃ɔ sɔ̃re.

¹⁷Bwesenu kpuro nu ǹ sɑ̃ɑ ɡɑ̃ɑnu win mi. Nu sɑ̃ɑwɑ kɑm dirum.

¹⁸Wɑrɑ i ko kɑ Gusunɔ weesinɑ. Mbɑ i ko nɛɛ, u kɑ weenɛ.

¹⁹U ǹ kɑ bwɑ̃ɑrokunu weenɛ, ni bɑ kuɑ bɑ wurɑ pote mɑ bɑ nu sii ɡeesun yɔni sebusiɑ.

²⁰Sɑ̃ɑro wi u ǹ kpɛ̃ u sii ɡeesu kɑ wurɑ dwe, u rɑ dɑ̃ɑ ɡeɑ kɑsu ye kɔkɔnu nu ǹ dimɔ, kpɑ u dɑ̃ɑ dɑ̃ko ɡeo kɑsu u kɑ nùn bwɑ̃ɑroku kuɑ ɡe ɡɑ ǹ wɔrumɑmɔ.

²¹I ǹ yɛ̃ ro? I ǹ nɔɔre ro? Bɑ ǹ bɛɛ nɔɔsie sɑɑ yellun di ro? I ǹ bwisikure nɡe mɛ bɑ kɑ hɑnduniɑn kpɛɛkpɛɛku swĩi ro?

²²Gusunɔwɑ u ɡu swĩi, wi, wi u wɑ̃ɑ wɔllɔ u tɔmbu mɛɛrɑ bɑ sɑ̃ɑ nɡe twee. U wɔllu tɛriɑ nɡe beku te tɑ ǹ bunu. U tu dɛmiɑ nɡe kuu bekuruɡiru u kɑ win wɑ̃ɑ yeru kuɑ.

²³Wiyɑ u rɑ sinɑ bibu kɑwe, kpɑ u wiruɡibu ko tɔn dirobu.

²⁴Be kpuro bɑ sɑ̃ɑ nɡe dɑ̃ɑ ni bɑ ɡirɑ nu ǹ ɡbini mɔ. Gusunɔ ù n derɑ woo ɡɑ bu swee, kpɑ bu ɡberɑ, woo ɡunɑ yu kɑ bu doonɑ nɡe yɑkɑsu.

²⁵Gusunɔ Dɛɛro u nɛɛ, wɑrɑ tɔmbɑ kɑ nùn weesinɑmɔ.

²⁶I nɔni seeyo kpɑ i mɛɛri wɔllɔ. Wɑrɑ u kperi kuɑ yi sĩimɔ nɡe tɑbu kowobu. Yinni Gusunɔwɑ. U mɑɑ yin bɑɑyeren yĩsiru yɛ̃. Yin ɡɑɑ ku rɑ biɑre win dɑm bɑkɑm sɑɑbu.

²⁷Bɛɛ Isirelibɑ, mbɑn sɔ̃nɑ i weeweenu mɔ̀ i mɔ̀, Gusunɔ kun bɛɛn siɑ yɛ̃, u ǹ mɑɑ bɛɛ bɛɛn ɡem wɛ̃ɛmɔ.

²⁸I ǹ yɛ̃? I ǹ nuɑ mɑ Yinni Gusunɔ u rɑ n wɑ̃ɑ? Wiyɑ u tem tɑkɑ kuɑ. U ku rɑ mɑɑ wɑsire. Bɑ ǹ kpɛ̃ bu win bwisikunu ɡiɑ.

²⁹U rɑ be bɑ wɑsire kɑ be bɑ wɑsikirɑmɔ dɑm wɛ̃.

³⁰Bibu bɑ rɑ wɑsire. Aluwɑɑsibɑ bɑ rɑ mɑɑ kpɑnɛ.

³¹Adɑmɑ bèn yĩiyɔbu wɑ̃ɑ Yinni Gusunɔ sɔɔ, u ko n dɑ bu dɑm kpɑm wɛ̃, kpɑ bu se kɑ dɑm nɡe ɡunɔ bɑkeru. Bɑ̀ n duki mɔ̀, bɑ ǹ wɑsirɑmɔ. Bɑ̀ n mɑɑ sĩimɔ, bɑ ǹ kpɑnɑmɔ.