Read bariba Esɑi 41 Bible Online

Esɑi 41 - bariba bible

Esɑi 41

¹Yinni Gusunɔ u nɛɛ, bɛɛ bèn tem mu tomɑ, i swɑɑ dɑkio i nɔ. I hɑniɑ koowo i tii dɑm kɛ̃. I susimɑ i kɑ ɡɑri ɡere, kpɑ su mɛnnɑ su wesiɑnɑ su ɡem kɑsu.

²Wɑrɑ u tɑbu durɔ ɡoo seeyɑmɑ sɔ̃ɔ yɑri yerun di mɑ u derɑ mi u duɑ kpuro u nɑsɑrɑ wɑ. Wɑrɑ u nùn bwesenu kpuro kɑ nin sinɑmbu nɔmu sɔndiɑ, mɑ u derɑ win tɑkobi yɑ bu munkɑ nɡe tuɑ, mɑ win tɛmɑ yɑ bu yɑrinɑsiɑ nɡe yɑkɑ si woo ɡɑ kɑ doonɑ.

³U bu nɑɑ ɡirɑ u ǹ wɑhɑlɑ wɑ. U dɑ sere mi win nɑɑsu kun yɛ̃.

⁴Wɑrɑ u derɑ yeni kpuro yɑ koorɑ. Nɛnɑ. Nɛ, Yinni Gusunɔ, nɛ, wi nɑ bwesenu kpuro seeyɑ sɑɑ toren di. Nɛnɑ nɑ ɡbiikoo, mɛyɑ nɑ kon mɑɑ wɑ̃ɑ sere kɑ bɑɑdommɑɔ.

⁵Be bɑ wɑ̃ɑ mi n tomɑ bɑ wɑ ye nɑ kuɑ mɑ bɑ nɑndɑ bɑ diirimɔ. Be wee bɑ mɛnnɑ bɑ susimɑmɔ.

⁶Bɑ sominɑmɔ. Ben bɑɑwure u win winsim sɔ̃ɔmɔ u mɔ̀, u hɑniɑ koowo.

⁷Dɑ̃ɑ dɑ̃ko u seko dɑm kɛ̃mɔ. Wi u dɑ̃ɑ wɔriɑsiɑmɔ u mɑtɑlɑkɑɡii dɑm kɛ̃mɔ. Bɑ mɔ̀, sii swɛɛbu bu wɑ̃. Mɑ bɑ bwɑ̃ɑroku ɡirɑmɔ bɑ kulum kpɑremɔ, ɡu ku kɑ wɔrumɑ.

⁸Adɑmɑ bɛɛ Isirelibɑ, bɛɛ be i sɑ̃ɑ Yɑkɔbun bibu, nɛn bɔrɔ Aburɑhɑmun bweseru sɔɔ, bɛɛyɑ nɑ ɡɔsɑ i n kɑ sɑ̃ɑ nɛn sɔm kowobu.

⁹Bɛɛyɑ nɑ sokɑ nɑ yɑrɑmɑ sɑɑ tontonden di. Nɑ ǹ bɛɛ biru kisi. Nɑ bɛɛ ɡɔsɑwɑ i n kɑ sɑ̃ɑ nɛn sɔm kowobu.

¹⁰Yen sɔ̃, i ku nɑndɑ, domi nɑ wɑ̃ɑ kɑ bɛɛ. I ku wururɑ i n yɑm mɛɛrɑ nɡe wɔnwɔndobu, domi nɛnɑ nɑ sɑ̃ɑ bɛɛn Yinni. Kon mɑɑ bɛɛ dɑm kɛ̃. Wee nɑ wee n bɛɛ somi, kpɑ n bɛɛ kɔ̃su kɑ nɛn dɑm.

¹¹Be bɑ kɑ bɛɛ mɔru mɔ̀, bɑ koo burisinɑ bu sekuru wɑ. Be bɑ kɑ bɛɛ sɑnnɑmɔ mi, bɑ koo kɑm ko bu ɡbi.

¹²Bɑɑ ì n bu kɑsu, i ǹ bu wɑsi. Mɛyɑ be bɑ kɑ bɛɛ tɑbu mɔ̀, bɑ koo kɑm ko bu ɡbisuku.

¹³Domi nɛnɑ nɑ Gusunɔ bɛɛn Yinni wi u bɛɛ dɑm wɛ̃ɛmɔ. I ku bɛrum ko, nɑ bɛɛ somiru wee.

¹⁴Yɑkɔbun bweseru, bɛɛ be i tie i ǹ dɑm mɔ mɑ bɑ bɛɛ ɡɑrisi nɡe kɔkɔminu, i ku nɑndɑ. Nɛ, Gusunɔ Isirelibɑn Yinni Dɛɛro, nɑ bɛɛ somiru wee. Nɑ sɑ̃ɑwɑ bɛɛn fɑɑbɑ kowo.

¹⁵Wee, kon bɛɛ dɑm wɛ̃ nɡe nɑɑ tebo kpɔɔ ɡe ɡɑ sɔkiɑ mɔ, kpɑ i ɡuunu kɔsuku, i ɡunɡunu muniɑ muku muku nu ko nɡe yɑkɑ bii.

¹⁶I ko nu sɑrɑwɑ nɡe dobi, woo ɡu kɑ nu doonɑ, kpɑ woo ɡunɑ yu nu yɑrinɑsiɑ, kpɑ i nuku dobu wɑ nɛn min di, nɛ, wi nɑ sɑ̃ɑ bɛɛn Yinni Dɛɛro, kpɑ i mɑn bɛɛrɛ wɛ̃.

¹⁷Sɑnɑm mɛ bɛɛ nɛn tɔmbu i wɔnwɔndu soore i nim kɑsu i ǹ wɑ, mɑ bɛɛn yɑri yi ɡbere nim nɔrun sɔ̃, nɛ, Gusunɔ bɛɛn Yinni, kon bɛɛ nɔɔri. Nɑ ǹ bɛɛ derimɔ.

¹⁸Kon de dɑɑnu nu yɑri sɑɑ ɡuunun di, kpɑ bwii yi yɑri wɔwi sɔɔ, kpɑ nim bwenu kɑ dɑɑ koki yi koorɑ mi tem mu ɡbere, ɡɑ̃ɑnu ku rɑ kpi.

¹⁹Kpɑ dɑ̃ɑ ye bɑ mɔ̀ sɛduru kɑ ɑkɑsiɑ yu kpi mi, kɑ sere mɑɑ dɑ̃ɑ kikisu ɡɑsu kɑ dɑ̃ɑ ye bɑ mɔ̀ olifi, kɑ mɑɑ dɑ̃ɑ bɑkɑnu ɡɑnu,

²⁰kpɑ tɔmbu bu wɑ kɑ nɔni, bu ɡiɑ mɑ nɛ, Gusunɔ Isirelibɑn Yinni Dɛɛrowɑ nɑ yeni kuɑ.

²¹Gusunɔ Isirelibɑn Yinni u nɛɛ, bɛɛ bũnu i kɑsuo nɡe mɛ i ko kɑ tii yinɑ. I sɔ̃ɔsimɑ nɡe mɛ i ko kɑ tii wɔrɑ.

²²I nɑ i sun sɔ̃ ɡɑri yi i rɑɑ ɡeruɑ yellu, kpɑ sɑ n yɛ̃ yì n koorɑ, kpɑ su yin lɑɑkɑri ko. Ǹ kun mɛ, i sun sɔ̃ɔwɔ ye yɑ koo nɑ siɑ, kpɑ su ɡiɑ ì n dɑm mɔn nɑ nɡe nɛ Gusunɔ. I ɡeɑ ɡɑɑ koowo ǹ kun mɛ kɔ̃sɑ ɡɑɑ, kpɑ su wɑ su nɑndɑ.

²⁴Adɑmɑ i ǹ kpɛ̃ i ɡɑ̃ɑnu ko. Bɛɛ kɑ bɛɛn sɔmɑ kpuro i sɑ̃ɑwɑ kɑm dirum. Wi u mɑɑ bɛɛ sɑ̃ɑmɔ ɡoo kun win mɛm kĩ.

²⁵Wee nɑ ɡoo seeyɑ sɑɑ sɔ̃ɔ yɛ̃sɑn nɔm ɡeun di, mɑ u nɑ sɑɑ sɔ̃ɔ yɑri yerun di u sĩimɔ kɑ nɛn yĩsiru. U wiruɡibu tɑɑkumɔ nɡe pɔtɔkɔ, nɡe mɛ weke kowo u rɑ sɔndu suni.

²⁶Wɑrɑ u yenin ɡɑri ɡeruɑ sɑɑ yellun di, su kɑ ɡere mɑ ɡɑri ɡeeyɑ. Goo kun yen ɡɑri ɡerure su sere nɔ.

²⁷Nɛ, Yinni Gusunɔ, nɛnɑ nɑ ɡbiɑ nɑ sɔmɔ ɡɔrɑ u Yerusɑlɛmuɡibu lɑbɑɑri ɡeɑ sɔ̃.

²⁸Nɑ mɛɛrɑ bũu ni sɔɔ, nɑ ǹ bũu ɡoo wɑ wi u nɛn ɡɑri ɡerumɔ. Nɑ̀ n ɡɑri bikiɑ, bũu ɡoo sɑri wi u koo kpĩ u mɑn wisi.

²⁹Domi ni kɑ nin sɔmɑ nu sɑ̃ɑwɑ kɑm dirum. Nin bwɑ̃ɑrokunu nu mɑɑ sɑ̃ɑwɑ wom dirum.