Read bariba Esɑi 43 Bible Online

Esɑi 43 - bariba bible

Esɑi 43

¹Yinni Gusunɔ u nɛɛ, Isireli, Yɑkɔbun bweseru, wunɛ wi nɑ mɔmɑ nɑ tɑkɑ kuɑ, ɑ ku bɛrum ko, domi nɛnɑ nɑ nun yɑkiɑ. Nɑ nun sokɑ kɑ wunɛn yĩsiru, ɑ sɑ̃ɑwɑ nɛɡii.

²À n wɑhɑlɑ mɔ̀ nɡe wi u nim bweru tɔburɑmɔ, ko nɑ n kɑ nun wɑ̃ɑ. Wɑhɑlɑ ye, yɑ ǹ nun kɑmiɑmɔ. À n mɑɑ nɔni sɔ̃ɔre nɡe wi u sĩimɔ dɔ̃ɔ sɔɔ, ɑ ǹ wururɑmɔ. Mɛyɑ nɔni swɑ̃ɑ te, tɑ ǹ nun surɑmɔ.

³Domi nɛnɑ nɑ sɑ̃ɑ Gusunɔ wunɛn Yinni Dɛɛro, nɛ wi nɑ nun fɑɑbɑ mɔ̀. Nɑ kon Eɡibiti kɑ Etiopi kɑ Sɑbɑn tem yibɛrɛbɑ wɛ̃ wunɛn ɑyerɔ, kpɑ ɑ yɑkiɑrɑ,

⁴yèn sɔ̃ ɑ sɑ̃ɑ ɡɑ̃ɑ bɑkɑnu nɛn nɔni sɔɔ. A ɡirimɑ mɔ, nɑ mɑɑ nun kĩ. Kon bwese dɑbinu yibɛrɛbɑ nɔmu sɔndiɑ wunɛn ɑyerɔ n kɑ wunɛn wɑ̃ɑru yɑkiɑ.

⁵Yen sɔ̃, ɑ ku bɛrum ko, domi nɑ kɑ nun wɑ̃ɑ. Kon de wunɛɡii be bɑ ɡurɑ bɑ kɑ dɑ sɔ̃ɔ yɑri yeru ɡiɑ mi, bu wurɑmɑ, kpɑ n mɑɑ be bɑ wɑ̃ɑ sɔ̃ɔ duu yeru ɡiɑ mɛnnɑmɑ.

⁶Nɑ ǹ mɑɑ derimɔ sɔ̃ɔ yɛ̃si yɛ̃sikɑn tɔmbu bu mɑɑ bu nɛnɛ. Adɑmɑ bu de nɛn bii be bɑ wɑ̃ɑ hɑnduniɑn ɡoonu nnɛ ye sɔɔ kpuro bu wurɑmɑ,

⁷be, be bɑ nɛn yĩsiru sɔɔwɑ, be nɑ tɑkɑ kuɑ bu kɑ mɑn bɛɛrɛ wɛ̃.

⁸Gusunɔ u nɛɛ, bu de nɛn tɔmbu bu yɑrimɑ, be, be bɑ nɔni mɔ, ɑdɑmɑ bɑ ǹ yɑm wɑɑmɔ, bɑ swɑsu mɔ, ɑdɑmɑ bɑ ǹ ɡɑri nɔɔmɔ.

⁹Bwesenu kpuro nu mɛnnɔ kpɑ n nu bikiɑ, bũu wɑrɑ u yenin ɡɑri ɡeruɑ. Bũu wɑrɑ u ɡbiɑ u ye nɔɔsiɑ yɑ sere koorɑ. U win seedɑɡibu mɛnnɑmɑ, kpɑ bu sɔ̃ɔsi mɑ u ɡem mɔ, kpɑ bu swɑɑ dɑki bu wurɑ mɑ ɡemɑ u ɡeruɑ.

¹⁰Wunɛ Isirelin bweseru, wunɑ ɑ sɑ̃ɑ nɛn seedɑ. Wunɑ nɑ ɡɔsɑ ɑ n sɑ̃ɑ nɛn sɔm kowo, kpɑ ɑ n kɑ yɛ̃ kɑm kɑm mɑ nɛ bɑɑsi, Gusunɔ ɡoo mɑɑ sɑri. Mɛyɑ Gusunɔ ɡoo kun mɑɑ koorɔ.

¹¹Nɛnɑ nɑ Gusunɔ wi u rɑ n wɑ̃ɑ. Nɛ bɑɑsi, fɑɑbɑ kowo ɡoo sɑri.

¹²Nɛnɑ nɑ nun nɔɔsiɑ ye yɑ koo koorɑ. Mɑ nɑ nun fɑɑbɑ kuɑ. Bũu ɡoo kun kpĩɑ u nun ɡɑ̃ɑnu nɔɔsie. Wunɑ ɑ sɑ̃ɑ nɛn seedɑ. Nɛnɑ nɑ sɑ̃ɑ Gusunɔ sɑɑ toren di.

¹³Goo sɑri wi u koo ɡoo wɔrɑ sɑɑ nɛn nɔmɑn di. Goo mɑɑ sɑri wi u koo yinɑ n ko ye nɑ kĩ.

¹⁴Yinni Gusunɔ u nɛɛ, bɛɛ Isirelibɑ, ɑmɛniwɑ nɛ Gusunɔ, bɛɛn Yinni Dɛɛro, nɛ wi nɑ bɛɛ yɑrɑ, nɑ ɡeruɑ nɑ nɛɛ, kon Bɑbiloniɡibu bɛri yibɛrɛbɑn nɔmɑɔ bɛɛn sɔ̃, kpɑ n ben wuun ɡɑmbobɑ kɔsuku, kpɑ ben nuku dobun kuuki yi ɡɔsirɑ nuku sɑnkirɑnun wuri.

¹⁵Nɛnɑ nɑ sɑ̃ɑ Gusunɔ bɛɛn Yinni Dɛɛro. Nɛnɑ nɑ bɛɛ tɑkɑ kuɑ nɑ mɑɑ sɑ̃ɑ bɛɛn sunɔ.

¹⁶Mɑ Esɑi u nɛɛ, yellu, Yinni Gusunɔ u swɛɛ yɑrɑ nim wɔ̃ku kɑ nim tori dɑmɡii sɔɔ.

¹⁷U tɑbu kɛkɛ be dumi ɡɑwe kɑ tɑbu durɔ wɔruɡɔbɑ tɑbu sure. Be kpuro bɑ wɔrukɑ, bɑ kpɑnɑ bu se, mɑ bɑ kɑm kuɑ bɑ ɡu nɡe fitilɑ.

¹⁸Adɑmɑ tɛ̃, u ɡeruɑ u nɛɛ, i ku mɑɑ ye yɑ koorɑ kɔn bwisikunu ko. I ku mɑɑ ɡɑ̃ɑ ɡurunun lɑɑkɑri ko.

¹⁹Wee kon ɡɑ̃ɑ kpɑɑnu ko. Ni wee nu wee. I ǹ nu tubɑ? Kon swɑɑ yɑrɑ ɡbɑburɔ, kpɑ dɑɑnu nu n wɑ̃ɑ mi tem ɡbere.

²⁰Tɑɑtɑɑnu kɑ ɡbeeku bɔ̃nu, ɡbeeku yɛɛ kpuro ɡesi, yi koo mɑn bɛɛrɛ wɛ̃. Domi kon de nim mu n wɑ̃ɑ ɡbɑburɔ, mi tem ɡbere, kpɑ tɔn be nɑ ɡɔsɑ bu nim wɑ bu nɔ,

²¹be, be nɑ tɑkɑ kuɑ bɑ koo mɑn tɔmɑ.

²²Adɑmɑ bɛɛ Isirelibɑ, bɛɛ be i sɑ̃ɑ Yɑkɔbun bweseru, i kɑ mɑn wɑsirɑ, i ku rɑ mɑɑ mɑn sɑ̃.

²³N ǹ nɛ i yɑ̃ku dɔ̃ɔ mwɑɑrɑruɡinu kuɑmmɛ kɑ bɛɛn yɑ̃ɑnu. Yɑ̃ku ni i rɑ mɑɑ ko mi, nu ǹ mɑn bɛɛrɛ wɛ̃ɛmɔ. N ǹ nɛn sɔ̃ i ɡobi bɛkɛ di i kɑ turɑre dɔ̃ɔ doke. N ǹ mɑɑ nɛ i kɑ yɑɑ ɡum nɑɑwɑmmɛ ì n yɑ̃kuru mɔ̀ mu sere mɑn tusi. N ǹ nɛ nɑ bɛɛ tilɑsi kuɑ i n dɑ kɑ mɑn kɛ̃nu nɑɑwɛ. Mɛyɑ nɑ ǹ mɑɑ bɛɛ tɔ̃yɑ kue i kɑ mɑn turɑre dɔ̃ɔ dokeɑ. Adɑmɑ i mɑn wɑhɑlɑ kpɛ̃ɛwɑ bɛɛn durum sɔ̃, mɑ nɑ wɑsirɑ bɛɛn torɑnun sɔ̃.

²⁵Kɑ mɛ, nɛnɑ nɑ bɛɛn durum wɔkɑmɔ yèn sɔ̃ nɑ sɑ̃ɑ Gusunɔ. Nɑ ǹ mɑɑ ye yɑɑyɑmɔ.

²⁶I seewo i nɑ i mɑn bɛɛn ɡɑri tɛriɑ, kpɑ i kɑ tii yinɑ.

²⁷Bɛɛn sikɑdo ɡbiikoo u durum kuɑ, mɑ bɛɛn sɑ̃ɑ ɡbiobu bɑ mɑn seesi.

²⁸Yen sɔ̃nɑ nɑ yɑ̃ku kowobu yɑrɑ nɛn sɑ̃ɑ yerun di, mɑ nɑ bɛɛ Isirelibɑ, Yɑkɔbun bweseru kɑm koosiɑ, nɑ bɛɛ sekuru doke.