Read bariba Esɑi 44 Bible Online

Esɑi 44 - bariba bible

Esɑi 44

¹Yinni Gusunɔ u nɛɛ, ɑ swɑɑ dɑkio tɛ̃, wunɛ Yɑkɔbun bweseru, wunɛ wi nɑ ɡɔsɑ nɑ kuɑ nɛn sɔm kowo.

²Nɛnɑ nɑ nun tɑkɑ kuɑ. Nɑ nun mɔmɑ bɑ sere nun mɑrɑ. Mɛyɑ nɑ mɑɑ nun somimɔ. Yen sɔ̃, ɑ ku bɛrum ko, wunɛ nɛn sɔm kowo wi nɑ ɡɔsɑ.

³Kon de nim mu tɛriɑ tem ɡbebum wɔllɔ, kpɑ dɑru koki yi yɑri min di. Kon nɛn Hunde yibie wunɛn bibun bweseru sɔɔ, kpɑ n bu domɑru kuɑ.

⁴Bɑ koo sewɑ nɡe yɑkɑ si su nim wɑɑmɔ. Bɑ ko n sɑ̃ɑwɑ nɡe dɑ̃ɑ ni nu wɑ̃ɑ dɑɑrun bɔkuɔ.

⁵Sɑɑ yerɑ ɡoo u koo ɡere u nɛɛ, wi, Yinni Gusunɔɡiiwɑ, kpɑ wini u nɛɛ, wi, u sɑ̃ɑwɑ Yɑkɔbun bweseru, kpɑ wiɔnɔ u yore win nɔmɑɔ wiyɑ Yinni Gusunɔɡii, kpɑ u tii Isirelibɑn yĩsiru kɛ̃ kɑ nuku dobu.

⁶Nɛ, Yinni Gusunɔ Dɑm kpuroɡii, nɛ wi nɑ Isirelibɑ yɑkiɑ nɑ sɑ̃ɑ ben sinɑ boko nɑ nɛɛ, nɛnɑ nɑ sɑ̃ɑ ɡbiikoo kɑ dɑ̃ɑko. Goo mɑɑ sɑri wi u sɑ̃ɑ Gusunɔ nɛ bɑɑsi.

⁷Wɑrɑ u sɑ̃ɑ nɡe nɛ. Yɛ̃ro u yɑrimɑ u tii tusiɑ, kpɑ u sɔ̃ɔsi nɡe mɛ nɑ kɑ hɑnduniɑ tɑkɑ kuɑ sɑɑ yellun di, kpɑ u ɡere ye yɑ koo koorɑ siɑ.

⁸I ku nɑndɑ bɛɛ Isirelibɑ, i ku mɑɑ diiri. Nɑ ǹ bɛɛ ye sɔ̃ɔwɑ sɑɑ yellun di ro? Bɛɛyɑ i sɑ̃ɑ nɛn seedɑɡibu. Goo mɑɑ wɑ̃ɑ wi u sɑ̃ɑ Gusunɔ nɛ bɑɑsi ro? Aɑwo, ɡoo mɑɑ sɑri wi u dɑm mɔ nɡe nɛ.

⁹Be bɑ bwɑ̃ɑrokunu sekumɔ, bɑ ǹ sɑ̃ɑ ɡɑ̃ɑnu. Ben sɔm ɡeenu nu mɑɑ sɑ̃ɑwɑ kɑm dirum, domi nin tii nu yen seedɑ dimɔ. Nu ǹ yɑm wɑɑmɔ, nu ǹ mɑɑ yɛ̃ru ɡɑru mɔ. Yen sɔ̃nɑ be bɑ nu sɑ̃ɑmɔ bɑ koo sekuru wɑ.

¹⁰Bwɑ̃ɑrokunu nu ǹ ɑrufɑɑni ɡɑɑ mɔ. Be bɑ nu sekumɔ bɑ sɑ̃ɑwɑ ɡɑri bɑkɑsu.

¹¹Wee bɑ koo sekuru wɑ, domi be kpuro bɑ sɑ̃ɑwɑ tɔmbu nɡe be bɑ tie. Bu mɛnnɑmɑ siri yerɔ. Be kpurowɑ bɑ koo diiri, kpɑ bu sekuru wɑ.

¹²Seko ù n bwɑ̃ɑroku mɔ̀, u rɑ sisu suewɑ u doke dɔ̃ɔ sɔɔ, kpɑ u mɑtɑlɑkɑ suɑ u kɑ su so kɑ win nɔm dɑmɡuu. Adɑmɑ ɡɔ̃ɔru tɑ̀ n nùn mɔ̀, u rɑ dɑm bie. Nim nɔru ɡɑ̀ n mɑɑ nùn mɔ̀, kpɑ u ɡɔmɑ dwiiyɑ.

¹³Dɑ̃ɑ dɑ̃ko ù n mɑɑ bwɑ̃ɑroku mɔ̀, u rɑ win wɛ̃ɛ suewɑ kpɑ u bwɑ̃ɑroku ɡen yĩreru doke dɑ̃ɑ sɔɔ. Kpɑ u sere win dɑ̃kutiɑ suɑ u dɑ̃ɑ ye dɑ̃ku, u bwɑ̃ɑroku ko ɡe ɡɑ kɑ tɔnu weenɛ, kpɑ u ɡu yi bũu dirɔ.

¹⁴Dɑ̃ɑ ɡeɑ u rɑ ɡɔsi dɑ̃ɑ sɔ̃ɔwɔ u kɑ ɡu ko. Yerɑ sɛduru, ǹ kun mɛ sipɛrɛ, ǹ kun mɛ sɛni. Gɑsɔ u koo dɑ̃ɑ ye bɑ mɔ̀ pɛni duure, kpɑ u n mɑrɑ ɡurɑ yu ye kpɛ̃ɑsiɑ.

¹⁵Dɑ̃ɑ yerɑ tɔnu u rɑ kɑ dɔ̃ɔ sɔ̃re, u wɔ̃su. Yerɑ u rɑ mɑɑ kɑ dĩɑnu yeesie. Dɑ̃ɑ tiɑ yerɑ u koo mɑɑ kɑ bwɑ̃ɑroku ko u yiirɑ u sɑ̃.

¹⁶U rɑ dɑ̃ɑ ten bɔnu dɔ̃ɔ doke, u kɑ win yɑɑ sɑ, ǹ kun mɛ u kɑ ye sɛ̃wɛ. Kpɑ u kɑ dĩɑnu yeesiɑ u di u debu, kpɑ u n dɔ̃ɔ wi wɔ̃su u n mɔ̀, ɑnnɑ ɑ dɔ̃ɔn dobu nɔ.

¹⁷Kpɑ u kɑ bɔnu ye yɑ tie bwɑ̃ɑroku ko u n sɑ̃ɑmɔ. Kpɑ u nɔɔɡiru suɑ u n ɡu kɑnɑmɔ u n mɔ̀, ɑ mɑn fɑɑbɑ koowo, domi wunɑ ɑ sɑ̃ɑ nɛn yinni.

¹⁸Adɑmɑ tɔn ben bweseru, bɑ ǹ yɛ̃ru mɔ, bɑ ǹ mɑɑ bwisi mɔ. Domi bɑ tii nɔni wɔ̃kuɑ bu ku kɑ yɑm wɑ. Mɛyɑ bɑ mɑɑ ben tiin bwisikunu sĩiyɑ, kpɑ ɡɑ̃ɑnu nu ku kɑ bu yeeri.

¹⁹Bwɑ̃ɑroku dɑ̃ko wi, u ǹ lɑɑkɑri mɔ u kɑ tubu u sere nɛɛ, dɑ̃ɑ ten sukumɑ u dɔ̃ɔ doke u kɑ pɛ̃ɛ wɔ̃ɔwɑ mɑ u kɑ yɑɑ sɛ̃ɛwɑ u di. Ten sukum mɛ mu tie, mɑ u kɑ bwɑ̃ɑroku kuɑ. Wi wee u dɑ̃ɑ kpiriru yiirɑmmɛ.

²⁰Dɑ̃ko wi, u sɑ̃ɑ nɡe wi u torom dimɔ. U tore yèn sɔ̃ win bwisikunu ɡɔsiɑ. U ǹ mɑɑ kpɛ̃ u win hunden fɑɑbɑ wɑ u sere nɛɛ, ɑse bwɑ̃ɑroku ɡe nɑ nɛnusi mini, ɡɑ ǹ sɑ̃ɑ Gusunɔ.

²¹Nɛ, Yinni Gusunɔ nɑ nɛɛ, wunɛ Yɑkɔbun bweseru, ɑ yɑɑyo mɑ nɛnɑ nɑ nun mɔmɑ nɑ kuɑ nɛn sɔm kowo, nɑ ǹ nun duɑrimɔ.

²²Nɑ wunɛn torɑnu kɑ wunɛn durum kpeesiɑ nɡe ɡuru wiru. Yen sɔ̃, ɑ wurɑmɑ nɛn mi, domi nɑ nun yɑkiɑ.

²³Wɔllu, ɑ yɛ̃ɛrio ye Yinni Gusunɔ u kuɑn sɔ̃. Gɔribun wɑ̃ɑ yeru, ɑ ɡɔ̃ru doro. Bɛɛ ɡuunu i kuuki koowo kɑ nuku dobu. Bɛɛ mɑɑ dɑ̃ɑ sɔ̃su, i nuku dobu koowo. Domi Yinni Gusunɔ u win yiiko sɔ̃ɔsi Isireliɔ. U be, Yɑkɔbun bweseru yɑkiɑ.

²⁴Nɛ, Yinni Gusunɔ, nɑ sɑ̃ɑwɑ wunɛn fɑɑbɑ koowo. Nɛnɑ nɑ nun mɔmɑ bɑ sere nun mɑrɑ. Amɛniwɑ nɑ ɡeruɑ. Nɑ nɛɛ, nɛnɑ nɑ ɡɑ̃ɑnu kpuro kuɑ. Nɛ turowɑ nɑ mɑɑ wɔllu kɑ tem tɛriɑ.

²⁵Nɑ rɑ sɔmɔ weesuɡibun ɡɑri tɛɛsi, kpɑ n sɔrobu yɑɑkoru ko. Nɑ rɑ de bwisiɡibu bu biru wurɑ, kpɑ n ben sɔ̃ɔsinu ɡɔsiɑ wiirɑ ɡɑri.

²⁶Adɑmɑ nɑ rɑ nɛn sɔm kowon ɡɑri dɑm sire, kpɑ n de nɛn sɔmɔn ɡɑri yi u ɡeruɑ yi koorɑ. Nɑ nɛɛ, tɔmbɑ koo kpɑm sinɑ Yerusɑlɛmuɔ. Bɑ koo mɑ wure bu Yudɑbɑn bɑnsu seeyɑ, kpɑ bu sin wusu bɑni.

²⁷Nɑ nim wɔ̃ku sɔ̃ɔmɔ ɡu ɡbero, domi kon ɡen nim kpeerɑsiɑ.

²⁸Wee ye nɑ ɡeruɑ Sirusin sɔ̃. U sɑ̃ɑwɑ kpɑro wi nɑ ɡɔsɑ. U koo mɑɑ nɛn kĩru kpuro yibiɑ. Kpɑ u de bu wure bu Yerusɑlɛmu bɑni, kpɑ bu nɛn sɑ̃ɑ yee ten kpɛɛkpɛɛku swĩi.