Read bariba Esɑi 51 Bible Online

Esɑi 51 - bariba bible

Esɑi 51

¹I mɑn swɑɑ dɑkio bɛɛ be i ɡem nɑɑ ɡire, mɑ i nɛ, Yinni Gusunɔ kɑsu. I kpee te mɛɛrio tèn min di bɑ bɛɛ dɑ̃kɑ. I wɔru ɡe yɑɑyo mìn di bɑ bɛɛ yɑrɑ.

²I bɛɛn lɑɑkɑri wesio Aburɑhɑmu bɛɛn tundon mi, kɑ Sɑɑrɑɑn mi, wi u bɛɛ mɑrɑ. Sɑnɑm mɛ nɑ nùn sokɑ u sɑ̃ɑwɑ wi turo. Mɑ nɑ nùn domɑru kuɑ, nɑ win bweseru dɑbiɑsiɑ.

³Nɑ Siɔnin bɑnsun wɔnwɔndu wɑ. Kon bɑn si seeyɑ, kpɑ n yen tem ɡbebum ɡɔsiɑ nɡe nɛn kɑrɑ Edɛni. Nuku dobu kɑ yɛ̃ɛribu ko n wɑ̃ɑ mi, kpɑ bu siɑrɑbun womusu ko.

⁴Bɛɛ nɛn tɔmbu, i lɑɑkɑri koowo, kpɑ i swɑɑ tem kpĩ i mɑn swɑɑ dɑki. Domi nɛn min diyɑ woodɑ yɑ koo yɑri, kpɑ yɑ n sɑ̃ɑ bwesenu kpuron yɑm bururɑm.

⁵Nɑ kɑ fɑɑbɑ wee, kpɑ n siri dee dee bwesenu kpuro sɔɔ, kɑ nɛn nɔm dɑmɡuu. Sɑɑ yerɑ be bɑ wɑ̃ɑ n tomɑ bɑ ko n yĩiyɔbu mɔ nɛ sɔɔ, kpɑ bɑ n nɛn dɑm nɑɑnɛ sɑ̃ɑ.

⁶I nɔni seeyo wɔllɔ, kpɑ i mɑɑ mɛɛri temɔ. Domi wɔllɑ koo doonɑ nɡe wiisu, kpɑ tem mu munkirɑ mu ko yɑki yɑki nɡe yɑbe tɔkɔru. Mɛn tɔmbu bɑ koo ɡbi nɡe sɔnsu. Adɑmɑ nɛn fɑɑbɑ yɑ ǹ kpeemɔ. Nɛn ɡem mu ko n wɑ̃ɑwɑ sere kɑ bɑɑdommɑɔ.

⁷I mɑn swɑɑ dɑkio bɛɛ bwese te i ɡem yɛ̃, mɑ i nɛn woodɑbɑ nɛni bɛɛn ɡɔ̃ruɔ. I ku nɑndɑ tɔmbu bɑ̀ n bɛɛ funɛ wunɑmɔ. I ku mɑɑ diiri bɛrum sɔ̃ bɑ̀ n bɛɛ wɔmmɔ.

⁸Domi bɑ ko n sɑ̃ɑwɑ nɡe yɑ̃ɑ ni ɡɛmi yi di. Adɑmɑ nɛn ɡem mu ko n wɑ̃ɑwɑ sere kɑ bɑɑdommɑɔ. Nɛn fɑɑbɑ yɑ ǹ mɑɑ nɔru mɔ.

⁹A dom yɑndo kpɑ ɑ wunɛn nɔmun dɑm sɔ̃ɔsi, nɡe yellu sɑnɑm mɛ ɑ Eɡibitiɡibu tɑbu di, mɑ ɑ ben sunɔ wi u sɑ̃ɑ nɡe yɑɑ ɡɔbɑ ɡo.

¹⁰Mɑ ɑ derɑ nim wɔ̃kun nim mu ɡberɑ, mɑ ɑ swɑɑ yɑrɑ. Be ɑ yɑkiɑ, bɑ kɑ tɔburɑ.

¹¹Nɡe mɛyɑ tɛ̃, be ɑ yɑkiɑ bɑ koo kpɑm ɡɔsirɑmɑ, bu wurɑmɑ Siɔniɔ kɑ nɑsɑrɑn womusu, kpɑ nuku doo bi bu ku rɑ kpe bu n sɔ̃ɔsire ben wuswɑɑɔ. Yɛ̃ɛribu kɑ nuku dobu ko n bu wɑ̃ɑsi, kpɑ nɔni swɑ̃ɑru kɑ weeweenu nu doonɑ.

¹²Gusunɔ u nɛɛ, nɛnɑ mi, nɛ wi nɑ bɛɛ nukuru yɛmiɑsiɑmɔ. Tɔnu u sɑ̃ɑwɑ nɡe yɑkɑsu. Mbɑn sɔ̃nɑ i ko i win bɛrum ko, wi, wi u rɑ ɡbi.

¹³Kpɑ i nɛ, Yinni Gusunɔ duɑri, nɛ wi nɑ bɛɛ tɑkɑ kuɑ. Nɑ wɔllu tɛriɑ, mɑ nɑ tem kuɑ. I diirumɔ kpeetim sɑri tɔ̃ru bɑɑtere, be bɑ bɛɛ dɑm dɔremɔn wuswɑɑɔ, be, be bɑ kɑsu bu bɛɛ kpeerɑsiɑ. Adɑmɑ ben mɔru kun mɑɑ ɡɑ̃ɑnu mɔ̀.

¹⁴Domi n ǹ tɛɛmɔ bu kɑ be bɑ yoru mwɛɛrɑ bɑ bɔkuɑn yɔni kusiɑ. Bɑ ǹ ɡbimɔ wɔru sɔɔ. Bɑ ǹ mɑɑ dĩɑnu biɑmɔ.

¹⁵Nɛnɑ Gusunɔ bɛɛn Yinni, nɛ wi nɑ rɑ de nim wɔ̃kun nim mu se kpɑ mu kukiri. Nɛn yĩsirɑ Gusunɔ, wɔllu kɑ tem Yinni.

¹⁶Nɑ kon wɔn kpɑɑru tɛriɑ kpɑ n tem kpɑm swĩi, kpɑ n bɛɛ Siɔniɡibu sɔ̃ n nɛɛ, i sɑ̃ɑwɑ nɛn tɔmbu. Nɑ nɛn ɡɑri doke bɛɛn nɔɔwɔ, mɑ nɑ bɛɛ nɛn nɔmɑn sɑɑru wukiri.

¹⁷Wunɛ Yerusɑlɛmu, ɑ dom yɑndo, ɑ seewo, wunɛ wi ɑ nɔrɑ suɑ Yinni Gusunɔn nɔmun di ye yɑ win mɔru yibɑ, mɑ ɑ ye nɔrɑ sere kɑ yen kɔrɔnɔ. Wee, yɑ nun ɡoomɔ.

¹⁸Wunɛn bibu kpuro sɔɔ, be ɑ mɑrɑ ɑ seeyɑ, ɡoo sɑri wi u koo nun swɑɑ ɡbiiyɑ. Goo mɑɑ sɑri wi u koo nun nɔmɑ nɛnɛ.

¹⁹Wee, ɡɑ̃ɑnu yiru yɑ nun deemɑ, tɑbu kɑ ɡɔ̃ɔru kɑ kpeerɑbu kɑ bɑnsu. Wɑrɑ koo nun duurɑ. Wɑrɑ koo nun nukuru yɛmiɑsiɑ.

²⁰Wunɛn bibu bɑ dɑm biɑ nɛ Gusunɔ, wunɛn Yinnin mɔrun sɔ̃. Mɑ bɑ kpĩ kpĩ swɛɛ sɔɔ nɡe nɛm ni bɑ tɑɑ mwɑ.

²¹Yen sɔ̃, ɑ yeni swɑɑ dɑkio ɑ nɔ, wunɛ wi ɑ wɔnwɔndu soore, mɑ ɑ sɑ̃ɑ nɡe ɑ tɑm ɡoore ɑdɑmɑ ɑ ǹ tɑm nɔrɑ.

²²Amɛniwɑ nɛ Gusunɔ, wunɛn Yinni, nɛ wi nɑ nɛn tɔmbu fɑɑbɑ mɔ̀, nɑ ɡeruɑ. Nɑ nɛɛ, kon nɔrɑ ye mwɑ wunɛn nɔmun di, ye yɑ nɛn mɔru yibɑ mɑ yɑ derɑ ɑ bɑ̃ɑrimɔ. A ǹ mɑɑ ye nɔrumɔ.

²³Kon ye dokewɑ be bɑ nun dɑm dɔremɔn nɔmɑɔ, be, be bɑ nun sɔ̃ɔmɔ bɑ mɔ̀, ɑ kpunɔ, kpɑ bu sĩ wunɛn wɔllɔ. Mɑ ɑ kpunɑ ɑ kɑ tem nɛrɑ. A kuɑ nɡe swɑɑ yè sɔɔ bɑ sĩimɔ.