Read bariba Esɑi 55 Bible Online

Esɑi 55 - bariba bible

Esɑi 55

¹Yinni Gusunɔ u nɛɛ, bɛɛ be nim nɔru ɡɑ mɔ̀, i nɑ i nim nɔ. Bɑɑ bɛɛ be i ǹ ɡobi mɔ, i nɑ i mwɑ i di. I nɑ i tɑm kɑ bom mwɑ i nɔ n kun kɑ ɡobi.

²Mbɑn sɔ̃nɑ i bɛɛn ɡobi dimɔ ye yɑ ǹ ɑrufɑɑni mɔ sɔɔ. Mbɑn sɔ̃nɑ i bɛɛn sɔmburun ɑre dimɔ ye yɑ ǹ bɛɛ debumɔ sɔɔ. I mɑn swɑɑ dɑkio kpɑ i wɑ i di ye yɑ ɡeɑ sɑ̃ɑ, kpɑ bɛɛn bwɛ̃rɑ yu yɛmiɑ dĩɑ duronun sɔ̃.

³I swɑɑ dɑkimɑ, i nɑ nɛn mi, kpɑ i wɑ i n wɑ̃ɑ. Kon kɑ bɛɛ ɑrukɑwɑni bɔke ye yɑ kun kpeemɔ, n kɑ bɛɛ durom sɔ̃ɔsi sere kɑ bɑɑdommɑɔ, mɛ̀n nɔɔ mwɛɛru nɑ Dɑfidi kuɑ.

⁴Wee, nɑ nùn kuɑ nɛn seedɑɡii bwese tukunun mi. Nɑ nùn kuɑ nin sinɑ boko.

⁵Nɛ, Gusunɔ wunɛn Yinnin sɔ̃, kɑɑ bwese tukunu sokusiɑ, kpɑ nu duki nɑ wunɛn mi, bɑɑ mɛ nu ǹ dɑɑ nun yɛ̃. Domi nɛ, Isirelibɑn Yinni Dɛɛrowɑ nɑ nun bɛɛrɛ wɛ̃ɛmɔ.

⁶Ǹ n mɛn nɑ, i Yinni Gusunɔ kɑsuo tɛ̃ sɑɑ ye u wɑ̃ɑ bɛɛn bɔkuɔ. I nùn sokuo sɑnɑm mɛ u wɑ̃ɑ bɛɛn turuku.

⁷Kpɑ durumɡii u win dɑɑ kɔsi, toro u mɑɑ win bwisiku kɔ̃sunu deri, kpɑ u ɡɔsirɑ u wurɑmɑ Yinni Gusunɔn mi. U koo nùn wɔnwɔndu kuɑ, wi, wi u ku rɑ suuru kpɑnɛ.

⁸Yinni Gusunɔ u nɛɛ, nɛn bwisikunu kun sɑ̃ɑ nɡe bɛɛn bwisikunu. Bɛɛn kookoosu su ǹ mɑɑ sɑ̃ɑ nɡe nɛɡisu.

⁹Nɡe mɛ wɔllɑ kɑ tem tomɑ, nɡe mɛyɑ mɑɑ nɛn bwisikunu kɑ nɛn kookoosu kɑ bɛɛɡisu tondinɛ.

¹⁰Nɡe mɛ ɡurɑ kɑ ɡuru kpenu rɑ tem dwiiyɑsie, kpɑ dĩɑnu nu se nu mɑɑ ɡbee wuko bweseru wɛ̃, kɑ ye u koo di,

¹¹nɡe mɛyɑ nɛn ɡɑri yi nɑ ɡeruɑ, yi ku rɑ kɑm wɔri yi kun nɛn kĩru kue, kpɑ yi nɛn himbɑ yibiɑ.

¹²Kɑ ɡem, i ko yɑri yorun di kɑ nuku dobu, kpɑ bu bɛɛ kpɑrɑ ɑlɑfiɑ sɔɔ. Guunu kɑ ɡunɡunu nu koo yɛ̃ɛri bɛɛn wuswɑɑɔ, kpɑ dɑ̃ɑ ni nu wɑ̃ɑ yɑkɑsɔ nu tɑki ko.

¹³Mi sɑ̃ki rɑ kpi, dɑ̃ɑ ye bɑ mɔ̀ sipɛrɛ, kɑ dɑ̃ɑ kiki nubu duroruɡisɑ su koo kpi mi, kpɑ ye kpuro yu ko yĩreru te tɑ nɛn yiiko sɔ̃ɔsimɔ sere kɑ bɑɑdommɑɔ.