Read bariba Esɑi 58 Bible Online

Esɑi 58 - bariba bible

Esɑi 58

¹Yinni Gusunɔ u nɛɛ, ɑ nɔɔɡiru suo kɑ dɑm nɡe mɛ kɑɑ kpĩ, kpɑ wunɛn nɔɔ ɡu nɔɔrɑ nɡe kɔbɑ. A nɛn tɔmbu Yɑkɔbun bweseru sɔ̃ɔwɔ mɑ bɑ durum kuɑ.

²Tɔ̃ɔ bɑɑtere bɑ rɑ n mɑn sokuwɑ bɑ n kĩ bu ɡiɑ ye nɑ kĩ bu ko. Bɑ mɔ̀ nɡe tɔn be bɑ ɡem swĩi, be bɑ ǹ nɛn woodɑbɑ deri. Bɑ rɑ mɑn kɑnɛ n bu siriɑ dee dee, kpɑ bɑ n kĩ bɑ n kɑ mɑn wɑ̃ɑ.

³Adɑmɑ bɑ rɑ nɛɛ, mbɑn sɔ̃nɑ bɑ koo mɑɑ nɔɔ bɔke, domi nɑ ǹ bu mɛɛrɑ. Mbɑn sɔ̃nɑ bɑ tii wɑhɑlɑ mɔ̀, domi nɑ bu ɑtɑfiiru sɑ̃ɑ. Kpɑ n bu wisi n nɛɛ, bɑɑ ì n nɔɔ bɔkumɔ, bɛɛn tiin kĩrɑ i rɑ n mɔ̀, kpɑ i n bɛɛn sɔm kowobu dɑm dɔremɔ.

⁴I rɑ n sikirinɑmɔwɑ i n sɑnkinɑmɔ, kpɑ i n nɔm kusenu soonɑmɔ kɑ nuku kɔ̃suru. Ì n nɔɔ bɔkumɔ mɑ i mɔ̀ mɛ, nɛ, Gusunɔ nɑ ǹ bɛɛn ɡɑri nɔɔmɔ.

⁵Nɔɔ bɔku te nɑ kĩ, teyɑ mi? I winu sikɑmɔ nɡe yɑkɑsu, mɑ i sɑɑkibɑ sebuɑ i tii torom wisimɔ. Adɑmɑ i tii kɑwewɑ mi kɑ ɡem? Nɔɔ bɔku ten bweserɑ kun mɑn wɛ̃remɔ.

⁶Wee nɔɔ bɔku te nɑ kĩ. Be i bɔkuɑ nuku kɔ̃surun sɔ̃, i bu yɔ̃suo. Be i rɑɑ dɑm dɔremɔ, i de bu doonɑ. Kpɑ be bɑ yoru dimɔ bɛɛn mi, bu kɑrɑ.

⁷I bɛɛn dĩɑnu bɔnu koowo kɑ wi u kun mɔ u di, kpɑ i be bɑ kun wɑ̃ɑ yeru mɔ nɛnɛ bɛɛn yɛnuɔ. Ì n ɡoo wɑ u sĩimɔ tereru, i nùn yɑ̃nu wɛ̃ɛyɔ u sebe, kpɑ i ku mɑɑ bɛɛn winsim biru kisi.

⁸Sɑɑ yerɑ nɛn durom mu koo bɛɛ nɑɑwɑ nɡe buruku sɔ̃ɔ, kpɑ mi i mɛɛrɑ mɔ yu bɛkurɑ fuuku. Mɛyɑ mɑɑ ɡem mu ko n dɑ n bɛɛ swɑɑ ɡbiiye. Nɛ, Yinni Gusunɔ, nɑ kon kɑ bɛɛ wɑ̃ɑ nɑ n bɛɛ kɔ̃su.

⁹Sɑnɑm mɛyɑ ì n mɑn sokɑ, kon bɛɛ wisi n nɛɛ, nɛ wee. Ì n bɛɛn yobu kɑrɑ, mɑ i murɑfitiru kɑ ɡɑri kɔ̃si deri,

¹⁰ì n ɡɔ̃ɔro dĩɑnu wɛ̃, mɑ i mɑɑ sɑ̃ɑro debiɑ, sɑɑ yerɑ i ko yɑri yɑm wɔ̃kurun di, kpɑ yɑm wɔ̃ku te, tu ko nɡe sɔ̃ɔ sɔɔ.

¹¹Nɛ, Yinni Gusunɔ, kon bɛɛ kpɑrɑ sere kɑ bɑɑdommɑɔ, kpɑ n de i n debɑ bɑɑ mi dĩɑnu ku rɑ kpi. Kon de bɛɛn wɑsi yi dɑm wɑ, kpɑ i n sɑ̃ɑ nɡe ɡbee te tɑ kɑkoru mɔ, ǹ kun mɛ nɡe bwii yìn nim ku rɑ kpe.

¹²Sɑɑ yerɑ i ko bɑnsu seeyɑ si bɑ kɔ̃ n tɛ, kpɑ i mɑɑ bɑni kpɛɛkpɛɛku wɔllɔ ɡe bɑ swĩi sɑɑ yellun di. Sɑnɑm mɛyɑ bɑ koo bɛɛ soku be bɑ rɑ bɑnsu kɑ swɛɛ sɔmɛ, kpɑ bu de tɔmbu bɑ n wɑ̃ɑ mi sɔɔ.

¹³Yinni Gusunɔ u nɛɛ, ì n tii nɛnuɑ i kun sɔmburu kue, mɑ i bɛɛn tiin kĩru deri i kɑ tɔ̃ɔ wɛ̃rɑruɡirun woodɑ mɛm nɔɔwɑ, mɑ i mɑn bɛɛrɛ wɛ̃ i nɛn tɔ̃ɔ dɛɛrɑ te ɡɑrisi tɔ̃ɔ duroru, mɑ i kun ɡɑri bɛkɛ sɑɑre,

¹⁴sɑɑ yerɑ i ko nuku dobu wɑ nɛn sɑ̃ɑru sɔɔ, kpɑ tɔmbu kpuro bu bɛɛ bɛɛrɛ wɛ̃, kpɑ n bɛɛ diisiɑ tem mɛ sɔɔ, mɛ nɑ bɛɛn sikɑdo Yɑkɔbu wɛ̃. Nɛ, Yinni Gusunɔwɑ nɑ yeni ɡeruɑ.