Read bariba Esɑi 61 Bible Online

Esɑi 61 - bariba bible

Esɑi 61

¹Yinni Gusunɔn Hunde u kɑ mɑn wɑ̃ɑ. Domi wiyɑ u mɑn ɡɔsɑ n kɑ dɑm sɑriruɡibu lɑbɑɑri ɡeɑ nɔɔsiɑ, kpɑ n be bɑ nuki sɑnkire nukuru yɛmiɑsiɑ, kpɑ n yobu sɔ̃ mɑ bɑ koo bu yɑkiɑ, kpɑ n mɑɑ pirisɔmbɑ sɔ̃ mɑ bɑ koo bu kɑrɑ.

²N kpɑrɑ sɑɑ ye Yinni Gusunɔ u koo tɔmbu durom kuɑ, n ɡere sɑɑ ye u koo win yibɛrɛbɑ mɔru kɔsie, kpɑ n mɑɑ be bɑ ɡɔɔ sɔ̃ kpuro nukuru yɛmiɑsiɑ.

³Bɑ ɡɔɔ sɔ̃ Siɔnin sɔ̃. Adɑmɑ Gusunɔ u mɑn ɡɔsɑ n kɑ ben nuku sɑnkirɑnu ɡɔsiɑ nuku dobu. Bɑ ǹ mɑɑ torom wisimɔ wirɔ, dɑwɑni burɑ bɑ koo bɔke. Ben wuswɑɑ kun mɑɑ burisinɑmɔ, yɑ ko n sɑ̃ɑwɑ nɡe be bɑ ɡum nubu duroruɡim sɑwɑɡiɑ. Bɑ koo ben yɑ̃ɑ wɔnwɔnduɡinu potɑ bu tɔ̃ɔ bɑkɑ yɑ̃nu sebe. Sɑɑ ye sɔɔrɑ bɑ ko n sɑ̃ɑ nɡe dɑ̃ɑ ni nu Gusunɔn bɛɛrɛ sɔ̃ɔsimɔ, ǹ kun mɛ nɡe ɡbee te tɑ win yiiko sɔ̃ɔsimɔ.

⁴Bɑ koo bɑn ɡurusu seeyɑ, kpɑ bu wuu si bɑ rɑɑ kɔsukɑ yellu sɔmɛ.

⁵Bɛɛ Isirelibɑ, sɔbɑ koo nɑ bɛɛn mi, bu bɛɛn yɑɑ sɑbenu kpɑrɑ, kpɑ bu mɑɑ bɛɛ ɡbee sɔmɑ kuɑ.

⁶Adɑmɑ bɑ koo bɛɛn tii sokuwɑ Yinni Gusunɔn yɑ̃ku kowobu kɑ win sɔm kowobu. I ko bwese tukunun ɑrumɑni ɡurɑ, kpɑ i n kɑ woo kɑnɑmɔ.

⁷Yinni Gusunɔ u nɛɛ, bɑ bɛɛ sekuru doke tɑ kpɑ̃. Tɔmbɑ bɛɛ yɑ̃ɑtɑm siemɔ, yen sɔ̃nɑ seku ten ɑyerɔ i ko n bɑɑ mɔ n kpɑ̃ tɔn ben temɔ, kpɑ i n wɑ̃ɑ nuku dobu sɔɔ bi bu ǹ kpeemɔ.

⁸Wi, Yinni Gusunɔ, ɡemɑ u rɑ kɑ̃. U dɑm dɔrebu kɑ kom kɔ̃sum tusɑ. U koo win tɔmbu ben ɑre wɛ̃ dee dee, kpɑ u kɑ bu ɑrukɑwɑni bɔke ye yɑ ko n wɑ̃ɑ sere kɑ bɑɑdommɑɔ.

⁹Bwesenu kpuro nu koo be kɑ ben bibun bweserun ɡɑri nɔ, kpɑ be bɑ bu wɑ kpuro bu ɡiɑ mɑ wiyɑ u bu domɑru kuɑ.

¹⁰Yinni Gusunɔ sɔɔrɑ Yerusɑlɛmu koo nuku dobu ko, kpɑ yen ɡɔ̃ru ɡɑ n do win sɔ̃. Domi wiyɑ u ye fɑɑbɑ kuɑ u ye ɡem wɛ̃. Mɑ win fɑɑbɑ ye kɑ win ɡem mɛ, mu sɑ̃ɑ nɡe burɑ yɑ̃ɑ ni kurɔ kpɑo kɑ win durɔ bɑ doke.

¹¹Nɡe mɛ tem mu rɑ de dĩɑ bweseru tu kpi, nɡe mɛyɑ Yinni Gusunɔ u koo win tɔmbu fɑɑbɑ ko u bu bɛɛrɛ wɛ̃, kpɑ bwesenu kpuro nu ye wɑ.