Read bariba Esɑi 65 Bible Online

Esɑi 65 - bariba bible

Esɑi 65

¹Yinni Gusunɔ u nɛɛ, nɑ sɔɔru kpeerewɑ n kɑ nɛn tɔmbun kɑnɑru mwɑ, ɑdɑmɑ bɑ ǹ mɑn ɡɑ̃ɑnu bikie. Nɑ sɔɔru sɑ̃ɑ n kɑ bu nɛn tii sɔ̃ɔsi, ɑdɑmɑ bɑ ǹ mɑn kɑsu. Mɑ nɑ nɛɛ, nɛ wee, bɑɑ mɛ bɑ ǹ mɑn sokɑ.

²Nɑ tɔn be bɑ rɑ n mɑn seesimɔ nɔmɑ ɡɑ̃ri sɑɑ kpuro. Tɔn be, swɑɑ kɔ̃sɑ sɔɔrɑ bɑ rɑ n sĩimɔ, kpɑ bɑ n ben tii tiin bwisikunu swĩi.

³Bɑ rɑ n nɛn mɔru seeyɑmɔwɑ kiri kiri. Domi bɑ rɑ n bũu yɑ̃kunu mɔ̀wɑ dɑ̃ɑ konɔ, bɑ n turɑre dɔ̃ɔ dokemɔ yɑ̃ku yenun wɔllɔ ni bɑ kuɑ kɑ biriki.

⁴Kpɑ bɑ n bikiɑru dɑɑmɔ sikɑɔ, bɑ n wɑ̃ɑ mi wɔ̃kuru kpuro. Bɑ rɑ n kurusɔ yɑɑ dimɔ kɑ mɑɑ dĩɑ sesenuɡinu ɡɑnu,

⁵kpɑ bɑ n sere ɡɑbu sɔ̃ɔmɔ bɑ n mɔ̀, bu ɡɛsiro bu ku bu susi, domi bɑ dɛɛre. Adɑmɑ nɑ̀ n yenibɑ kpuro wɑ nɛn mɔru rɑ sewɑ nɡe dɔ̃ɔ wi u ku rɑ ɡbi.

⁶Bɛɛ nɛn tɔmbu, wee ye nɑ ɡɔ̃ru doke n ko tɛ̃. Nɑ ǹ mɑrimɔ. Kon dewɑ i bɛɛn kɔ̃sɑn ɑre kpuro sɔbe.

⁷Kon de i bɛɛn durum sɔbe kɑ mɑɑ bɛɛn sikɑdobɑɡiɑ, be, be bɑ mɑn torɑri bɑ bũnu turɑre dɔ̃ɔ dokeɑ ɡuunu wɔllɔ. Kon bɛɛ bɛɛn kookoo si i kuɑn ɑre kɔsiɑ.

⁸Ì n resɛm swɑɑru wɑ te tɑ nim mɔ, i rɑ nɛɛwɑ, bu ye derio mi, bu ku ye sɑnku, domi yɑ koo tɑm ɡem ko. Nɡe mɛyɑ kon kɑ Isirelibɑ kɑ Yudɑbɑn sukum ko, be bɑ ɡɔ̃ru ɡɔsiɑ bɑ mɑn kɑsu. Kon bu ɡɔsi bu ko nɛn sɔm kowobu, kpɑ n bu domɑru kuɑ bu mɑrurɑ, kpɑ bu tem mɛ tubi di mi ɡuunu wɑ̃ɑ, bu ben wɑ̃ɑ yenu ko mi. Kpɑ Sɑronin wɔwɑ yu ko ben yɑɑ sɑbenun kpɑrɑ yeru, kpɑ Akɔɔn wɔwɑ yu ko nin sɔri yeru.

¹¹Adɑmɑ kon nɑ n bɛɛ deemɑ bɛɛ be i nɛ, Yinni Gusunɔ deri, mɑ i nɛn sɑ̃ɑ yee dɛɛrɑ te duɑri te tɑ wɑ̃ɑ ɡuuru wɔllɔ, i dɑ i dimɔ bũu wi bɑ mɔ̀ Gɑdin nuurɔ, mɑ i bɛɛn nɔri tɑm yibiɑmɔ bũu wi bɑ mɔ̀ Mɛnin sɔ̃.

¹²Wee nɑ kɑ tɑkobi sisi. Kon de i yiirɑ kpɑ bu bɛɛ sɑkiri, domi nɑ bɛɛ sokɑ, ɑdɑmɑ i ǹ mɑn wurɑri. Nɑ kɑ bɛɛ ɡɑri kuɑ, mɑ i ǹ mɑn swɑɑ dɑki. I kuɑ ye yɑ ǹ wɑ̃ nɛn nɔni sɔɔ. Mɑ i swɑɑ ɡɔsɑ ye nɛn ɡɔ̃ru ɡɑ ǹ kĩ.

¹³Yen sɔ̃nɑ nɑ nɛɛ, nɛn sɔm kowobu bɑ koo wɑ bu di kpɑ bu nɔ. Adɑmɑ bɛɛ, ɡɔ̃ɔru kɑ nim nɔru sɔɔrɑ i ko i n wɑ̃ɑ. Nɛn sɔm kowobu bɑ koo nuku dobu ko. Adɑmɑ bɛɛ, i ko n wɑ̃ɑwɑ sekuru sɔɔ.

¹⁴Wee, nɛn sɔm kowo be, bɑ koo womusu ko kɑ nuku dobu. Adɑmɑ bɛɛ, i ko kuuki kowɑ nuku sɑnkirɑnun sɔ̃, kpɑ i n weeweenu mɔ̀.

¹⁵Bɛɛn ɡɔɔn biru, bɛɛn yĩsɑ nɛn sɔm kowobu bɑ ko n dɑ kɑ ɡɑbu bɔ̃rusi, bu nɛɛ, Yinni Gusunɔ u de ɑ ɡbi nɡe wɑɑnɛ kɑsɑ. Adɑmɑ yĩsiru ɡɑrɑ bɑ koo kɑ tɔmbu domɑru kuɑ. Bɑ koo tu kowɑ kɑ nɛ, Yinni Gusunɔn yĩsiru, nɛ wi nɑ sɑ̃ɑ ɡemɡii. Bɑ̀ n mɑɑ bɔ̃rumɔ bu kɑ ben ɡɑri sire, kɑ nɛn yĩsi terɑ bɑ koo kɑ bɔ̃re. Mɛyɑ yellun wɑhɑlɑ yɑ koo doonɑ. Kpɑ tɔmbu bu yen ɡɑri duɑri.

¹⁷Domi Yinni Gusunɔ u nɛɛ, wee kon tem kpɑm kɑ wɔn kpɑɑru ko. Bɑ ǹ mɑɑ yɑɑyɑmɔ ye yɑ rɑɑ koorɑ yellu. Tɔmbɑ kun mɑɑ ye bwisikumɔ.

¹⁸I yɛ̃ɛrio, kpɑ i n wɑ̃ɑ nuku dobu sɔɔ sere kɑ bɑɑdommɑɔ ye kon tɑkɑ kon sɔ̃. Wee, nɑ Yerusɑlɛmu kpɑɑ bɑnimɔ yè sɔɔ nuku dobu ko n wɑ̃ɑ, kpɑ yen tɔmbu bu yɛ̃ɛri.

¹⁹Nɛn tii kon yɛ̃ɛri Yerusɑlɛmu yen sɔ̃ kɑ nɛn tɔmbun sɔ̃. Bɑ ǹ mɑɑ wuri kɑ weeweenu nɔɔmɔ mi.

²⁰Biin ɡɔɔ kun ko n mɑɑ wɑ̃ɑ mi, ǹ kun mɛ durɔ tɔkɔ wi u kun win wɑ̃ɑrun tɔ̃ru yibɑ. Wi u wɔ̃ɔ wunɔbu (100) turɑ u kɑ ɡu, bɑ koo nùn ɡɑrisiwɑ ɑluwɑɑsi. Wi u mɑɑ ɡu u ǹ wɔ̃ɔ wunɔbu (100) ye turɑ, bɑ koo nɛɛwɑ, nɑ yɛ̃ro bɔ̃rusi.

²¹Bɑ koo diɑ bɑni bɑ n wɑ̃ɑ ye sɔɔ. Goo kun diru bɑnimɔ u kun wure te sɔɔ u sere ɡbi. Bɑ koo resɛm dɑ̃ɑ duure kpɑ bu yen mɑrum di. Goo kun dɑ̃ɑ duurumɔ u kun yen mɑrum di u sere ɡbi. Domi nɛn tɔn be nɑ ɡɔsɑn wɑ̃ɑru tɑ koo dɛnyɑ nɡe dɑ̃ruɡiru, kpɑ bu ben nɔmɑn sɔmburun ɑre di.

²³Bɑ ǹ koo sɔmburu ko kɑm. Ben bibɑ kun mɑɑ ɡbimɔ, domi be kɑ ben bibu, bɑ sɑ̃ɑwɑ bwese te nɛ, Yinni Gusunɔ nɑ domɑru kuɑ.

²⁴Bu sere kɑnɑru ko bu kpe, ko nɑ n dɑ bu wisiwɑ.

²⁵Sɑɑ ye sɔɔ, purukɑnu kɑ yɑ̃ɑnu koo yɑkɑsu di yɑm tem. Mɛyɑ ɡbee sinɑnsu koo mɑɑ yɑkɑsu di nɡe kɛtɛbɑ, kpɑ wɑɑ yɑ kun mɑɑ ɡɔbu. Kɔ̃sɑ ɡɑɑ, ǹ kun mɛ ɑsɔrɔ ɡɑɑ kun ko n mɑɑ wɑ̃ɑ Siɔniɔ nɛn ɡuu dɛɛrɑ ten wɔllɔ. Nɛ, Yinni Gusunɔwɑ nɑ ɡeruɑ mɛ.