Read bariba Yeremi 15 Bible Online

Yeremi 15 - bariba bible

Yeremi 15

¹Yinni Gusunɔ u Yeremi sɔ̃ɔwɑ u nɛɛ, nɑ ǹ nɛn tɔmbu Yudɑbɑ wɔnwɔndu kuɑmmɛ, bɑɑ Mɔwisi kɑ Sɑmuɛli bɑ̀ n nɑ nɛn mi, bu kɑ mɑn suuru kɑnɑ ben sɔ̃. Kon bu sɔ̃wɑ n nɛɛ, bu doonɔ nɛn wuswɑɑn di.

²Bɑ̀ n mɑɑ wunɛ Yeremi bikiɑ bɑ nɛɛ, mɑnɑ bɑ koo dɑ, kpɑ ɑ bu wisi ɑ nɛɛ, bɑ koo ɡbiwɑ. Gɑbɑ koo ben yɑron ɡɔɔ ɡbi, ɡɔɔ wiyɑ koo bu suɑ. Gɑbɑ koo ɡbi tɑbu sɔɔ, ɡɔɔ wiyɑ koo bu suɑ. Gɑbɑ koo ɡbi ɡɔ̃ɔrun sɔ̃, ɡɔɔ wiyɑ koo bu suɑ. Kpɑ bu mɑɑ ɡɑbu yoru mwɛɛri, yoo terɑ bɑ koo di.

³Kon de kɛ̃sinu nnɛ yu bu deemɑ. Bɑ koo ɡbi tɑbu sɔɔ, kpɑ bɔ̃nu nu ben ɡonu ɡɛɛri, kpɑ ɡbeeku yɛɛ kɑ ɡunɔsu bu di mɑm mɑm.

⁴Biti kɑ bɛrum koo bwese tukunu mwɑ bɑ̀ n wɑ ye yɑ bu deemɑ, ye Yudɑn sinɑ boko Mɑnɑse Esekiɑsin bii u kuɑn sɔ̃ kpuro Yerusɑlɛmuɔ.

⁵Sɑɑ ye sɔɔ, Yerusɑlɛmu, wɑrɑ u koo wunɛn wɔnwɔndu wɑ. Wɑrɑ u koo nun wɑnyo kuɑ. Wɑrɑ u koo nɑ u bikiɑ ye n nun mɔ̀.

⁶Wee ɑ mɑn deri, mɑ ɑ biru wurɑ. Yen sɔ̃, kon nun nɔmɑ doke n nun kpeerɑsiɑ. Domi nɑ wɑsirɑ kɑ bɑɑdommɑn wɔnwɔn te nɑ nun kuɑmmɛ.

⁷Kon nɛn tɔn be sɑrɑwɑ nɡe dobi wusun ɡbɑ̃rɑ kɔnnɔsɔ. Kon de bu ben bibu biɑ, kpɑ n bu kɑm koosiɑ. Domi bɑ yinɑ bu ben swɛɛ kɔ̃si deri.

⁸Kon de ben ɡɔminibu bu yɑni sɛɛri dɑbiru kerɑ yi yi wɑ̃ɑ nim wɔ̃kun ɡoorɔ. Kon de yibɛrɛbɑ bu nɑ bu ben ɑluwɑɑsibɑn mɛrobu wɔri sɔ̃ɔ sɔɔ ɡbɑ̃ɑrɑ. Kpɑ nuku sɑnkirɑru kɑ bɛrum ben mɛro be deemɑ subɑru sɔɔ.

⁹Wi bɑ rɑɑ bɛɛrɛ wɛ̃ɛmɔ yèn sɔ̃ u bii tɔn durɔbu nɔɔbɑ yiru mɑrɑ u wɑsikirɑmɔ. U koo mɑm ɡbiwɑ sɛkum kɑ seku bɑkɑru. Be bɑ tie, kon de yibɛrɛbɑ bu bu ɡowɑ tɑbu sɔɔ. Nɛ, Yinni Gusunɔwɑ nɑ yeni ɡeruɑ.

¹⁰Yeremi u nɛɛ, nɛn mɛro, mbɑn sɔ̃nɑ ɑ mɑn mɑrɑ. Wee nɑ kuɑ bɔ̃ruro. Domi nɛn sɔ̃nɑ tem mɛn tɔmbu kpuro bɑ sikirinɑmɔ bɑ sɑnnɑmɔ. Nɑ ǹ ɡoon mi ɡɑ̃ɑnu bɔkure, nɑ ǹ mɑɑ ɡoo ɡɑ̃ɑnu bɔkure. Adɑmɑ kɑ mɛ, bɑ mɑn bɔ̃rusimɔwɑ kpuro.

¹¹Mɑ Yinni Gusunɔ u nɛɛ, kon nun yɑkiɑ wunɛn ɡeɑn sɔ̃, kpɑ n nun wunɛn yibɛrɛbɑ kɑmiɑ wɑhɑlɑ kɑ nuku sɑnkirɑnun sɑɑ.

¹²Goo kun kpɛ̃ u sisu bɔɔku, si su wee sɔ̃ɔ yɛ̃sɑn nɔm ɡeu ɡiɑn di kɑ sere mɑɑ sii ɡɑndu.

¹³Kon de yibɛrɛbɑ bu nɑ bu tem mɛn ɑrumɑni kpuro ɡurɑ nɛn tɔmbun durum sɔ̃ ye bɑ kuɑ tem mɛ kpuro sɔɔ.

¹⁴Kon de bu ben yibɛrɛbɑ sɑ̃ tem tukumɔ mi bɑ ǹ yɛ̃. Domi nɛn mɔru seewɑwɑ be sɔɔ nɡe dɔ̃ɔ.

¹⁵Yerɑ Yeremi u Yinni Gusunɔ wisɑ u nɛɛ, ɑ kpuro yɛ̃. A mɑn yɑɑyo. A ku mɑn duɑri. A be bɑ mɑn nɔni sɔ̃ɔmɔ mɔru kɔsio. A ku mɑn ɡo, wunɛ wi ɑ suuru mɔ. A yɛ̃ mɑ wunɛn sɔ̃nɑ nɑ sekuru sɔɔwɑ.

¹⁶Wunɛn ɡɑri kpurowɑ nɑ swɑɑ dɑki. Mɑ nɑ yi doke ɡɔ̃ruɔ. Yiyɑ yi mɑn nuku dobu wɛ̃. Gusunɔ wɔllu kɑ tem Yinni, ɑ n yɛ̃ mɑ wunɛn yĩsirɑ nɑ sɔɔwɑ.

¹⁷Mɛyɑ nɑ ǹ wure n sinɑ kɑ tɔn yɑɑ kɑsikiobu su kɑ nuku dobu ko sɑnnu. Nɑ tii ɡɔwɑwɑ nɑ sɔ̃ nɛ turo, domi ɑ derɑ nɛn mɔru seewɑ.

¹⁸Yinni Gusunɔ, mbɑn sɔ̃nɑ nɑ wɑhɑlɑ mɔ̀ sere kɑ tɛ̃. Mbɑn sɔ̃nɑ yɑ sɑ̃ɑ nɡe boo wi u ku rɑ kpe. Yinni, kɑɑ n mɑn sɑ̃ɑwɛwɑ nɡe bwiɑ ye yɑ ǹ nɑɑnɛ mɔ, ǹ kun mɛ nɡe dɑɑ te tɑ rɑ nim kpe?

¹⁹Mɑ Yinni Gusunɔ u Yeremi wisɑ u nɛɛ, ɑ̀ n ɡɔsirɑmɑ nɛn mi, kon de ɑ mɑɑ ko nɛn sɔm kowo. À n wurɑ ɑ mɛm sɑɑrinu deri kpɑ ɑ ɡɑri ɑrufɑɑniɡii ɡere, kon mɑɑ nɛn ɡɑri doke wunɛn nɔɔwɔ. N ǹ mɔ wunɑ kɑɑ ɡɔsirɑ ben mi, beyɑ n weenɛ bu wurɑmɑ wunɛn mi.

²⁰Kon de ɑ n dɑm mɔ nɡe ɡbɑ̃rɑ te bɑ kuɑ kɑ sii ɡɑndu. Bɑ koo kɑ nun tɑbu ko, ɑdɑmɑ bɑ ǹ nun kɑmiɑmɔ. Domi ko nɑ n kɑ nun wɑ̃ɑ n nun fɑɑbɑ ko.

²¹Kon nun yɑkiɑ tɔn kɔ̃sobun nɔmɑn di. Kpɑ n nun wɔrɑ be bɑ nuki sosun nɔmɑn di. Nɛ, Yinni Gusunɔwɑ nɑ yeni ɡeruɑ.