Read bariba Yeremi 18 Bible Online

Yeremi 18 - bariba bible

Yeremi 18

¹Yinni Gusunɔ u Yeremi sɔ̃ɔwɑ u nɛɛ,

²ɑ seewo kpɑ ɑ dɑ mɔmɔn yɛnuɔ. Miyɑ kon nun ɡɑri sɔ̃.

³Mɑ u seewɑ u dɑ mɔmɔn yɛnu mi. U deemɑ wee u wekeru mɔ̀.

⁴Weke te u mɔ̀ mi, tɑ ǹ ɡeɑ kue. Mɑ u ten sɔn te suɑ u kɑ weke kpɑɑru kuɑ te tɑ nùn wɛ̃re.

⁵Yerɑ Yinni Gusunɔ u nɛɛ,

⁶mbɑn sɔ̃nɑ nɑ ǹ kpɛ̃ n kɑ bɛɛ Isirelibɑ ko nɡe mɛ. Wee nɡe mɛ mɔmɔ wi, u sɔndu suɑ u nɛni win nɔmuɔ, nɡe mɛyɑ i mɑɑ wɑ̃ɑ nɛn nɔmuɔ.

⁷Gɑsɔ, nɑ rɑ ɡere bweseru ɡɑrun sɔ̃ n nɛɛ, kon tu wukɑ n surɑ nɡe dɑ̃ɑ, kpɑ n tu kɑm koosiɑ.

⁸Adɑmɑ bwese te, tɑ̀ n ten dɑɑ kɔsɑ tɑ nuku kɔ̃suru deri, nɑ rɑ tu deriwɑ nɑ kun mɑɑ tu kɔ̃sɑ kue.

⁹Mɛyɑ ɡɑsɔ, nɑ rɑ mɑɑ ɡere bweseru ɡɑrun sɔ̃ n nɛɛ, kon tu seeyɑ.

¹⁰Adɑmɑ bwese te, tɑ̀ n kɔ̃sɑ mɔ̀ mɑ tɑ ǹ nɛn ɡere swɑɑ sue, nɑ ku rɑ mɑɑ tu ɡeɑ ye kue ye nɑ rɑɑ ɡɔ̃ru doke mi.

¹¹Yen sɔ̃, ɑ Yudɑbɑ kɑ Yerusɑlɛmuɡibu sɔ̃ɔwɔ ɑ nɛɛ, nɛ, Yinni Gusunɔ nɑ sɔɔru mɔ̀ n kɑ bu kɔ̃sɑ kuɑ. Nɑ yen kpunɑɑ yi. Ǹ n mɛn nɑ, ben bɑɑwure u win dɑɑ kɔ̃sɑ derio u wurɑmɑ nɛn mi.

¹²Adɑmɑ bɑ koo ɡere bu nɛɛ, mbɑn sɔ̃nɑ bɑ koo kɔsi. Ben bɑɑwure u koo win bwisiku kɔ̃sunu swĩiwɑ u ko ye u kĩ.

¹³Yinni Gusunɔ u nɛɛ, Isirelibɑ bɑ ɡɑ̃ɑ kɔ̃sunu kuɑ n sɑrɑ. I bwesenu kpuro bikio, wɑrɑ u yenin bweseru nɔɔre.

¹⁴Nim mu rɑ kokubu kpe Libɑnin ɡuunu wɔllun di? Dɑɑ te tɑ kokumɔ, tɑ rɑ nim ɡem kpe?

¹⁵Adɑmɑ nɛn tɔmbu bɑ mɑn duɑri bɑ dɑ bɑ bũnu turɑre dɔ̃ɔ dokeɑmmɛ. Yɑ derɑ bɑ ǹ yɛ̃ ye bɑ mɔ̀ ben swɛɛ sɔɔ. Bɑ ben yellun swɑɑ dosu derimɔ, mɑ bɑ swɑɑ kisi swĩi.

¹⁶Bɑ derɑ ben tem mu sɑnkirɑ. Mɑ tɔmbu bɑ bu yɛ̃ɛmɔ bɑɑdommɑ. Wi u sɑrɔ mi ɡesi, ù n mu wɑ, u rɑ wiru kpɑrewɑ.

¹⁷Yen sɔ̃nɑ kon de bu yɑrinɑ yibɛrɛbɑn wuswɑɑɔ nɡe tuɑ ye sɔ̃ɔ yɑri yerun woo ɡɑ yɑrinɑsiɑ. Kon bu biru kisi. Nɑ ǹ bu mɛɛrimɔ sɑnɑm mɛ bɑ nɔni sɔ̃ɔre.

¹⁸Yerɑ tɔn be, bɑ nɛɛ, su Yeremi nɔɔ tiɑ kuɑ su nùn mwɑ. Domi woodɑ kun ɡbimɔ bɑɑ yɑ̃ku kowobu bɑ̀ kun wɑ̃ɑ. Bwisi kun kpeemɔ bɑɑ bwisiɡibu bɑ̀ kun wɑ̃ɑ. Gusunɔn ɡɑri kun ɡbimɔ yèn sɔ̃ win sɔmɔbɑ sɑri. Ǹ n mɛn nɑ, i nɑ su nùn wɔri su yɑɑ kɑsiki, kpɑ su ku mɑɑ win ɡɑri nɔ su sere yi lɑɑkɑri ko.

¹⁹Sɑɑ yerɑ Yeremi u Yinni Gusunɔ kɑnɑ u nɛɛ, Yinni Gusunɔ, ɑ mɑn swɑɑ dɑkio. A nɛn yibɛrɛbɑn ɡɑri yi nɔɔwɔ.

²⁰Kɑɑ de ɡeɑ yu ɡɔsirɑ kɔ̃sɑ? Wee bɑ dɔkɔ kpiriru ɡbɑ bu kɑ mɑn kpɛ̃ɛ sɔɔ. A yɑɑyo mɑ nɑ yɔ̃rɑ wunɛn wuswɑɑɔ ben sɔ̃, nɑ kɑ nun ɡɑri kuɑ kpɑ ɑ ku mɑɑ kɑ bu mɔru ko.

²¹Yen sɔ̃, ɑ de ɡɔ̃ɔru tu ben bibu ɡo. A de bu ɡbisuku tɑbu sɔɔ, kpɑ kurɔbu bu durɔbu kɑ bibu biɑ, kpɑ bu ko ɡɔminibu. A de bɑrɑnu nu durɔ be ɡo, kpɑ bu ben ɑluwɑɑsibɑ ɡo tɑbu sɔɔ.

²²A de tɑbu kowo wuunu nu bu wɔri. Kpɑ wuri yi nɔɔrɑ ben yɛnusɔ. Domi bɑ dɔkɔ kpiriru ɡbɑ bu kɑ mɑn kpɛ̃ɛ te sɔɔ. Bɑ mɑn yinɑ bɛriɑ nɛn swɑɑ sɔɔ.

²³Adɑmɑ wunɛ, Yinni Gusunɔ, ɑ ben nɔɔsinɑɑ kpuro yɛ̃, ye bɑ kuɑ bu kɑ mɑn ɡo. Yen sɔ̃, ɑ ku bu ben torɑnu wɔkɑ. A ku ben durum ye duɑri. A de bu fukurɑ wunɛn wuswɑɑɔ. A bu sɛɛyɑsio wunɛn mɔrun sɑɑ sɔɔ.