Read bariba Yeremi 49 Bible Online

Yeremi 49 - bariba bible

Yeremi 49

¹Wee ye Yinni Gusunɔ u ɡeruɑ Amɔnibɑn sɔ̃. U nɛɛ, mbɑn sɔ̃nɑ bũu wi bɑ mɔ̀ Mɑlikɔmu u Gɑdin tem mwɑ. Mbɑn sɔ̃nɑ win tɔmbu Amɔnibɑ bɑ Isirelibɑn wusu wɔrɑ. Isirelibɑ bɑ ǹ bibu mɔwɑ be bɑ koo mu tubi di?

²Yen sɔ̃ tɛ̃, kon de tɑbun wurenu nu nɔɔrɑ ben wuu mɑroɔ ɡe bɑ mɔ̀ Rɑbɑ. Rɑbɑ ye, yɑ koo bɑnsu ko, kpɑ yen bɑru kpɑɑnu nu dɔ̃ɔ mwɑɑkirɑ. Nɡe mɛyɑ Isirelibɑ bɑ koo bu ɡirɑ be, be bɑ rɑɑ bu ɡirɑ. Nɛ, Yinni Gusunɔwɑ nɑ yeni ɡeruɑ.

³Bɛɛ, Hɛsiboniɡibu, i ɡɔɔ swĩiyɔ. Domi bɑ koo Ayi kɑm koosiɑ. Rɑbɑn bɑru kpɑɑnuɡibu, i nɔɔɡiru suo i somiru kɑnɑ. I sɑɑki deewo nuku sɑnkirɑnun sɔ̃, kpɑ i n sirenɛ i n ɡɔɔ sumɔ. Domi bɑ koo bɛɛn bũu wi bɑ mɔ̀ Mɑlikɔmu suɑ, kɑ win yɑ̃ku kowobu kɑ win wiruɡibu bu kɑ doonɑ.

⁴Bɛɛ Rɑbɑɡibu, bɛɛ be i ku rɑ mɛm nɔ, wee i tii sue bɛɛn wɔwɑ ye yɑ tem ɡem mɔn sɔ̃. Mɑ i bɛɛn dukiɑ nɑɑnɛ sɑ̃ɑ. Mɑ i mɔ̀, wɑrɑ u koo kpĩ u bɛɛ wɔrimɑ.

⁵Gusunɔ, wɔllu kɑ tem Yinni u nɛɛ, wee kon bɛɛ nɔni swɑ̃ɑru suremɑ. Tɑ koo nɑwɑ sɑɑ bɑɑmɑn di, kpɑ i yɑrinɑ. Goo mɑɑ sɑri wi u koo bɛɛ mɛnnɑ.

⁶Adɑmɑ ɑmɛn biru kon de be bɑ yɑrinɛ mi, bu wurɑmɑ. Nɛ, Yinni Gusunɔwɑ nɑ yeni ɡeruɑ.

⁷Wee ye Gusunɔ, wɔllu kɑ tem Yinni u ɡeruɑ Edɔmubɑn sɔ̃. U nɛɛ, bwisi yi kpɑwɑ Temɑniɔ? Ben bwisiɡibun bwisi yi kpɑwɑ? Mɑnɑ yi kpuro yi doonɑ.

⁸Bɛɛ Dedɑniɡibu, i ɡɔsiro, i duki yɑkuro i dɑ i kuke kpee bɑɑbɑ sɔɔ. Domi kon Esɑuɡibu nɔni swɑ̃ɑru kpɛ̃ɛ sɑnɑm mɛ kon bu sɛɛyɑsiɑ.

⁹Be bɑ rɑ resɛm sɔri bɑ̀ n nɑ bɛɛn mi, bɑ rɑ fiiko deri. Gbɛnɔbu bɑ̀ n tɔmbu wɔri, bɑ rɑ suewɑ ye bɑ koo kpĩ.

¹⁰Adɑmɑ nɛ, Yinni Gusunɔ, kon Esɑun bweseru kpuron yɑ̃nu ɡurɑwɑ. Kon bu sikiɑmɑ ben kuku yenun di. Bɑ ǹ kpɛ̃ bu kuke. Ben bibu kɑ ben dusibu kɑ be bɑ kɑ bu sikerenɛ kpuro bɑ koo ɡbiwɑ. Goo kun tiɑrɑmɔ.

¹¹Bɑɑ bɑ̀ n ben bibu deri bɑ kuɑ ɡobekubɑ, nɛnɑ kon de bɑ n wɑ̃ɑ, kpɑ ben ɡɔminibu bu mɑn nɑɑnɛ ko.

¹²Nɑ mɑɑ nɛɛ, be nɑ ǹ dɑɑ sɛɛyɑsiɑmɔ, kon bu sɛɛyɑsiɑ. Yerɑ bɛɛ, Edɔmubɑ, i tɑmɑɑ i yɑrɑ min di? Aɑwo, kon bɛɛ sɛɛyɑsiɑwɑ.

¹³Nɑ bɔ̃rumɔ sere kɑ nɛn wɑ̃ɑru mɑ bɛɛn wuu mɑro Bɔtisirɑ ɡɑ koo bɑnsu ko kpɑ n sɑ̃ɑ sekuru, kpɑ tɔmbu bɑ n dɑ ɡu sie bɑ̀ n ɡoo bɔ̃rusimɔ. Mɛyɑ mɑɑ bɛɛn wuu si su tie su koo ko bɑnsu sere kɑ bɑɑdommɑɔ. Nɛ, Yinni Gusunɔwɑ nɑ yeni ɡeruɑ.

¹⁴Yinni Gusunɔ u Yeremi lɑbɑɑri yeni sɔ̃ɔwɑ u nɛɛ, bɑ sɔmɔ ɡoo ɡɔrɑ bwesenun suunu sɔɔ u nu sɔ̃ u nɛɛ, nu mɛnnɑmɑ nu Edɔmubɑ wɔri, nu seewo nu bu tɑbu wɔri.

¹⁵Domi nɛ, Yinni Gusunɔ, kon bu ko dɑ̃ɑkobu bwesenu kpuro sɔɔ, be tɔmbɑ ko n ɡɛmɑ.

¹⁶Ben tii suɑbu kɑ ben nɔniɡiru tɑ derɑ bɑ kɔ̃ɔrɑ. Be bɑ wɑ̃ɑ kpee bɑɑbɑ sɔɔ, kɑ sere ɡunɡunun wii kpiinɔ, bɑɑ bɑ̀ n wɑ̃ɑ yenu kuɑ sere wɔllun sɔɔ sɔɔwɔ, nɡe ɡunɔ bɑkeru, kon bu surɑmɑ min di. Nɛ, Yinni Gusunɔwɑ nɑ yeni ɡeruɑ.

¹⁷Edɔmu yɑ koo kowɑ bɑnsu. Be bɑ sɑrɔ mi, bɑ̀ n ye wɑ, biti yɑ koo bu mwɑ kpɑ bu wiɑ ko ɑsɔrɔ yen sɔ̃.

¹⁸Domi yɑ ko n sɑ̃ɑwɑ nɡe mɛ bɑ Sodomu kɑ Gomɔrɑ kpeerɑsiɑ kɑ yen bɑru kpɑɑnɔ. Goo kun mɑɑ sinɑmɔ mi.

¹⁹Ko nɑ n sɑ̃ɑwɑ nɡe ɡbee sunɔ ɡe ɡɑ yɑrimɑ Yuudɛnin ɡbee surorun di ɡɑ dɔɔ ɡu nim nɔ. Kpɑ n tɔmbu kpuro yɑrinɑsiɑ subɑru sɔɔ. Sɑɑ ye sɔɔrɑ kon Edɔmubɑ sunɔ kpɑo wɛ̃ wi nɛn tii nɑ ɡɔsɑ. Nɡe wɑrɑ u kɑ mɑn nɛ. Wɑrɑ u koo kpĩ u mɑn woodɑ wɛ̃. Sinɑ boko wɑrɑ u koo kpĩ u yɔ̃rɑ nɛn wuswɑɑɔ.

²⁰Yen sɔ̃, i swɑɑ dɑkio i nɔ himbɑ ye nɑ kuɑ Edɔmubɑn sɔ̃, kɑ sere kpunɑɑ ye nɑ yi Temɑniɡibun sɔ̃. Nɑ nɛɛ, kɑm kɑm, kon de bu be kpuro mwɛɛriwɑ nɡe yɑ̃ɑnu bu kɑ dɑ tem tukumɔ. Bɑ koo ben tem kpuro kɑm koosiɑwɑ.

²¹Kɑm koo bin wurenu sɔɔ, tem mu koo yĩiri. Tɔmbɑ koo nɔɔɡiru suɑ bu somiru kɑnɑ, kpɑ ben nɔsu su nɔɔrɑ sere nim wɔ̃kuɔ, ɡe bɑ mɔ̀ Sɔ̃ɔ.

²²Wee, yibɛrɛbɑ bɑ koo Botisirɑ wukiri nɡe mɛ yɑberekunu nu rɑ yɑɑ ɡonu kunisi. Yen dɔmɑ te, Edɔmun tɑbu durɔ dɑmɡibu bɑ ko n kpɑsɑ wɔri mɔ̀wɑ nɡe tɔn kurɔ wi u yiire u kĩ u mɑ.

²³Wee ye Yinni Gusunɔ u ɡeruɑ Dɑmɑsin sɔ̃. U nɛɛ, yen wuu sini, Hɑmɑti kɑ Aɑpɑdi, sin tɔmbɑ wɑ̃ɑ sekuru sɔɔ. Bɑ lɑbɑɑri kɔ̃sɑ nuɑ, mɑ bɑ diirimɔ. Ben lɑɑkɑri yɑ burisinɑ nɡe nim wɔ̃kun nim, sere yɑ ǹ kpĩɑ yɑ wurɑmɛ.

²⁴Dɑmɑsiɡibu bɑ mwiɑ kpɑnɑ bɑ ɡɔsirɑ bu kɑ duki su, ɑdɑmɑ bɑ bɛrum soore. Mɑ nuku sɑnkirɑnu kɑ wuriribu bu nɛni nɡe tɔn kurɔ wi u yiire u kĩ u mɑ.

²⁵Wuu ɡèn sɔ̃ nɑ rɑ n nuku dobu mɔ, mbɑn sɔ̃nɑ ɡen tɔmbu bɑ ǹ kpikiru suɑ. Wuu bɔkɔ ɡe, ɡe ɡɑ yĩsiru yɑrɑ mi, mbɑn sɔ̃nɑ ɡen tɔmbu bɑ ǹ ɡu deri.

²⁶Sɔ̃ɔ teeru bɑ koo ɡen ɑluwɑɑsibɑ ɡo ɡen swɛɛ sɔɔ. Bɑ koo mɑɑ ɡen tɑbu kowobu kpuro kpeerɑsiɑ, kpɑ n de bu ɡu dɔ̃ɔ mɛni kɑ Bɛni Hɑdɑdin sinɑ kpɑɑru. Nɛ, Gusunɔ, wɔllu kɑ tem Yinniwɑ nɑ yeni ɡeruɑ.

²⁸Wee ye Yinni Gusunɔ u ɡeruɑ Kedɑɑɡibun sɔ̃ kɑ bwese ni nu wɑ̃ɑ Hɑsoriɔn sɔ̃, ni Bɑbilonin sinɑ boko Nɛbukɑnɛsɑɑ u kɑmiɑ. U nɛɛ, i seewo i Kedɑɑɡibu wɔri. I be, sɔ̃ɔ yɑri yeruɡii be kpuro ɡoowo.

²⁹I ben kuu bekunuɡinu kɑ ben yɑɑ sɑbenu kpuro ɡuro, kɑ ben bekɑ kɑ ben sɔmunu kɑ ben yooyoosu, kpɑ i kuuki ko bɑɑmɑ i bu bɛrum tiɑ.

³⁰Bɛɛ Hɑsoriɡibu i seewo i duki su fuuku, kpɑ i dɑ i kuke wɔrusu sɔɔ. Domi Bɑbilonin sinɑ boko Nɛbukɑnɛsɑɑ u kpunɑɑ kuɑ u kɑ bɛɛ wɔri. Nɛ, Yinni Gusunɔwɑ nɑ yeni ɡeruɑ.

³¹U mɑɑ nɛɛ, i doo i bu wɔri be, be bɑ wɑ̃ɑ bɔri yɛndu sɔɔ, bɑ sɔ̃ sɛ̃ɛ ben yɛnusɔ. Ben wusu su ǹ ɡɑmbobɑ kɑ kɔkɔrɔbɑ mɔ, mɑ bɑ kɑ tɔmbu dɛsire.

³²Yibɛrɛbɑ bɑ koo ben yooyoosu mwɛɛri kɑ sere mɑɑ ben yɑɑ sɑbenu yɑ n dɑbi. Kon bu yɑrinɑsiɑ bɑɑmɑ, be, be bɑ rɑ ben wii bɑɑnu kɔni beri berikɑ. Kon de yibɛrɛbɑ bu nɑ bɑɑmɑn di bu bu kɑm koosiɑ. Nɛ, Yinni Gusunɔwɑ nɑ yeni ɡeruɑ.

³³Hɑsorin wuu ɡɑ koo ko bɑnsu, kpɑ ɡɑ n sɑ̃ɑ ɡbeeku bɔ̃nun wɑ̃ɑ yeru sere kɑ bɑɑdommɑɔ. Goo kun mɑɑ sinɑmɔ mi.

³⁴Wee ye Yinni Gusunɔ u win sɔmɔ Yeremi sɔ̃ɔwɑ Elɑmun sɔ̃. Sɑɑ ye sɔɔ, Sedesiɑsi, Yudɑbɑn sinɑ bokon bɑndun torewɑ mi.

³⁵Gusunɔ, wɔllu kɑ tem Yinni u nɛɛ, wee, kon Elɑmuɡibun tɛnnu bɔɔku ni nu sɑ̃ɑ ben dɑm nuuru.

³⁶Kon bu hɑnduniɑn ɡoonu nnɛ kpuron woo kpɑremɑ, kpɑ n bu yɑrinɑsiɑ bɑɑmɑ. Tem ɡɑm sɑri mi bɑ ǹ ko n wɑ̃ɑ.

³⁷Kon de Elɑmuɡibu bu diiri ben yibɛrɛbɑ kɑ be bɑ kɑsu bu bu ɡon wuswɑɑɔ. Nɛn mɔrun sɑɑbu kon bu nɔni swɑ̃ɑ bɑkɑru kpɛ̃ɛ. Tɑbɑ kon kɑ bu ɡo n kpe,

³⁸kpɑ n ben sinɑmbu kɑ ben wiruɡibu ɡo kpɑ n nɛn tiin bɑndu swĩi. Nɛ, Yinni Gusunɔwɑ nɑ yeni ɡeruɑ.

³⁹Adɑmɑ tɔ̃ru ɡɑrɑ wee tè sɔɔ kon de be bɑ rɑɑ yɑrinɑ mi, bu wurɑmɑ.