Read bariba Yeremi 50 Bible Online

Yeremi 50 - bariba bible

Yeremi 50

¹Wee ɡɑri yi Yinni Gusunɔ u ɡeruɑ Bɑbilonin sɔ̃ kɑ yen tem kpuron sɔ̃, sɑɑ Yeremin min di. U nɛɛ,

²i bwesenu lɑbɑɑri yeni nɔɔsio. I yĩrenu koowo nu kɑ ye ɡiɑ. I ye kpɑro i nɛɛ, Bɑbiloni yɑ wɔrumɑ. Yen bũnu nu sekuru suɑ. Bũu ni bɑ mɔ̀ Bɛli kɑ Mɛrodɑki nu wɑ̃ɑ sekuru sɔɔ. Nin bwɑ̃ɑrokunu nu bɛrum soorɑ.

³Bweseru ɡɑrɑ ye wɔrim wee sɑɑ sɔ̃ɔ yɛ̃sɑn nɔm ɡeu ɡiɑn di. Tɑ koo tem mɛ ɡɔsiɑwɑ bɑnsu. Goo kun ko n mɑɑ wɑ̃ɑ mi. Tɔmbu kɑ yɛɛ kpuro koo yɑrinɑ min di.

⁴Yinni Gusunɔ u nɛɛ, yen tɔ̃ɔ te, Isirelibɑ kɑ Yudɑbɑ bɑ koo wurɑmɑ ben temɔ sɑnnu, bɑ n sumɔ, bɑ n nɛ Gusunɔ, ben Yinni kɑsu.

⁵Bɑ koo Siɔnin swɑɑ bikiɑ, bu wɔrimɑ yen mi, kpɑ bu nɑ bu kɑ mɑn ɑrukɑwɑni bɔke ye bɑ ǹ duɑrimɔ sere kɑ bɑɑdommɑɔ.

⁶Be, nɛn tɔmbu, wee bɑ sɑ̃ɑ nɡe yɑ̃ɑ ɡɔ̃ɔ ɡe ɡɑ rɑɑ kɔ̃ɔre. Ben kpɑrobɑ rɑɑ bu kɔ̃ bɑ derɑ bɑ sirenɛ ɡuunu wɔllɔ bɑ ɡɑsirimɔ ɡee kɑ ɡiɔ, sere bɑ ben wɑ̃ɑ yeru duɑri.

⁷Yibɛrɛ be bɑ bu wɔri ɡesi, bɑ rɑ bu ɡurewɑ. Kpɑ yibɛrɛ be, bu nɛɛ, bɑ ǹ kɔ̃sɑ kue. Be, Isireli ben tiiwɑ bɑ Yinni Gusunɔ torɑri, wi, wi u sɑ̃ɑ ɡemɡii kɑ wi ben sikɑdobɑ bɑ nɑɑnɛ sɑ̃ɑ.

⁸Bɛɛ Isirelibɑ, i yɑrio i duki su Bɑbilonin di, nɡe boo ni nu ɡɔ̃ɔ ɡbiiye.

⁹Domi wee, kon bwesenu seeyɑ wuu wuukɑ kpɑ n de nu Bɑbiloni wɔri. Bɑ koo nɑwɑ sɑɑ sɔ̃ɔ yɛ̃sɑn nɔm ɡeu ɡiɑn di, kpɑ bu ye tɑrusi bu mwɑ. Ben sɛ̃ɛnu nu ǹ kɑm wɔrimɔ. Bɑɑ ben tɑbu durɔ turo kun ɡɔsirɔ nɔm dirɑ.

¹⁰Bɑbiloniɡibu bɑ ǹ kisirɑmɔ kɑm koo bin di. Be bɑ koo ben yɑ̃nu ɡurɑ kpuro, bɑ koo nu ɡurɑwɑ kɑ nuku tiɑ. Nɛ, Yinni Gusunɔwɑ nɑ yeni ɡeruɑ.

¹¹Bɛɛ Bɑbiloniɡibu, bɛɛ be i nɛn ɑrumɑni ɡurɑ, i nuki doro. I n yɔ̃ɔkumɔ nɡe nɑɑ kpɛmi yɑkɑsɔ. I n sumɔ nɡe dum dwɛɛ.

¹²Adɑmɑ i bɛɛn tem mɛɛrio. Wee, mu wɑ̃ɑ sekuru sɔɔ. Wee, mu kuɑ bɑnsu, nɡe tem mi ɡɑ̃ɑnu ku rɑ kpi. Mɑ mu biru wurɑ tem kpuro sɔɔ.

¹³Yinni Gusunɔn mɔrun sɑɑbu, mu kuɑ bɑnsu. Be bɑ koo sɑrɑ Bɑbilonin tem mi, biti koo bu mwɑ kpɑ bu wiɑ ko.

¹⁴Bɛɛ be i rɑ tɛndu to, i nɑ i Bɑbiloni tɑrusi. I ye sɛ̃ɛnu tweeyo. I ku yen wɔnwɔndu ko. Domi yɑ nɛ, Yinni Gusunɔ torɑri.

¹⁵I tɑbun kuuki koowo bɑɑmɑ domi Bɑbilonin ɡɑni yi wɔrukɑ, yen ɡbɑ̃rɑrɑ subɑ. Wee yen tɔmbɑ nɔmɑ yiiye bɑ tii yibɛrɛbɑ wɛ̃. Nɛ, Yinni Gusunɔwɑ nɑ ye mɔru kɔsiemɔ, nɑ mɔ̀, i ye mɔru kɔsieyo. I ye kuo nɡe mɛ yɑ rɑɑ ɡɑbu kuɑ.

¹⁶Tɑbu wee kɑ kɑm kobu sɑnnu. I bu ɡoowo be bɑ duurumɔ kɑ be bɑ ɡɛ̃ɛmɔ. Bɑɑwure u seewo u dɑ win temɔ mi win bweserɑ wɑ̃ɑ.

¹⁷Yinni Gusunɔ u nɛɛ, Isirelibɑ bɑ sɑ̃ɑwɑ nɡe yɑ̃ɑ ni nu kɔ̃ɔrɑ mɑ ɡbee sinɑnsu su nu nɑɑ swĩi. Asirin sinɑ bokowɑ u ɡbiɑ u nu wɔri u ɡurɑ, mɑ Bɑbilonin sinɑ boko u mɑɑ nɑ u nu wɔri u kɔsukɑ.

¹⁸Yen sɔ̃nɑ, nɛ Gusunɔ Isirelibɑn Yinni, wi u wɔllu kɑ tem mɔ, nɑ nɛɛ, kon Bɑbilonin sinɑ boko kɑ win temɡibu sɛɛyɑsiɑ nɡe mɛ nɑ Asirin sunɔ sɛɛyɑsiɑ.

¹⁹Adɑmɑ kon de Isirelibɑ bu wurɑmɑ ben wɑ̃ɑ yerɔ, kpɑ bu ben dĩɑnu yewe ɡuu te bɑ mɔ̀ Kɑɑmɛliɔ kɑ Bɑsɑniɔ kɑ ɡuu te bɑ mɔ̀ Efɑrɑimuɔ, kɑ sere mɑɑ Gɑlɑdin temɔ. Bɑ ǹ mɑɑ ɡɑ̃ɑnun yɑ̃ɑru mɔ̀.

²⁰Yen domɑ te, bɑ koo Isirelibɑ kɑ Yudɑbɑn durum kɑsu bɑ kun wɑ, domi be, be bɑ tie mi, kon bu ben durum wɔkɑ.

²¹Yinni Gusunɔ u nɛɛ, i Mɛrɑtɑimuɡibu kɑ Pekodiɡibu wɔrio. I bu ɡoowo i kɑm koosiɑ mɑm mɑm. I nɛn woodɑbɑ kpuro yibio.

²²Wee, tɑbun wurenu nɔɔrɑmɔ tem mɛ kpuro sɔɔ. Asɔrɔ bɑkɑ yɑ tunumɑ.

²³Bɑbiloni ye yɑ hɑnduniɑ kpuro kɔsukɑ, nɡe mɑtɑlɑkɑ, yen tii wee, yɑ kɔsikirɑ, yɑ kuɑ bɑnsu bwesenu kpuron suunu sɔɔ.

²⁴Bɑbiloni, nɑ nun yinɑ bɛriɑ, mɑ yɑ nun mwɑ ɑ ǹ kɑ bɑɑru. Wee, tɛ̃, ɑ kuɑ pirisɔm, domi ɑ nɛ, Yinni Gusunɔ wɔri.

²⁵Mɑ nɑ nɛn tɑbu yɑ̃nun beru yeru wukiɑ. Mɑ nɑ nɛn mɔru sɔ̃ɔsi kɑ tɑbu yɑ̃ɑ ni. Domi nɛ Gusunɔ, wɔllu kɑ tem Yinni, nɑ sɔmburu mɔ te kon ko Bɑbiloniɔ.

²⁶Bɛɛ hɑnduniɑɡibu kpuro, i nɑ i Bɑbiloniɡibun birɑnu suriri, kpɑ i ben yɑ̃nu ɡurɑ i subu subu nɡe yɑkɑsu, i ye kɑm koosiɑ. Gɑ̃ɑnu nu ku mɑɑ tiɑrɑ mi.

²⁷I ben tɑbu durɔ dɑmɡibu ɡoowo. I bu sɑkirio nɡe yɑɑ sɑbenu. Bɑ kɑm kuɑ, domi ben tɔ̃rɑ tunumɑ, tè sɔɔ bɑ koo bu sɛɛyɑsiɑ.

²⁸Yerɑ Isirelibɑ be bɑ kpikiru suumɑ bɑ nɑ Yerusɑlɛmuɔ bɑ mɔ̀, Yerusɑlɛmu, Yinni Gusunɔ u nun mɔru kɔsiɑ. U win sɑ̃ɑ yee dɛɛrɑru mɔru kɔsiɑ.

²⁹I tɛn towobu mɛnnɔ bu Bɑbiloni wɔri, kpɑ bu ben sɑnsɑni ɡirɑ bu kɑ ye sikerenɑ, kpɑ bu ku rɑɑ de ɡoo u kisirɑ min di. Bu bu kɔsieyo nɡe mɛ ben dɑɑ yɑ nɛ. Bu bu kuo nɡe mɛ bɑ rɑɑ ɡɑbu kuɑ. Domi bɑ tii wɔlle suɑ nɛ, Yinni Gusunɔn wuswɑɑɔ, nɛ wi nɑ sɑ̃ɑ Isirelibɑn Yinni Dɛɛro.

³⁰Yen sɔ̃, mi ben ɑluwɑɑsibɑ bɑ wɑ̃ɑ kpuro, bɑ koo ɡbisukuwɑ, kpɑ ben tɑbu kowobun tii bu ɡbisuku tɔ̃ɔ te.

³¹Nɛ, Gusunɔ, wɔllu kɑ tem Yinni, nɑ nɛɛ, wunɛ Bɑbiloni, wunɛ wi ɑ tii sue, nɑ kɑ nun mɔru sɑ̃ɑ. Wunɛn tɔ̃rɑ tunumɑ tè sɔɔ kon nun sɛɛyɑsiɑ.

³²Wunɛ wi ɑ tii sue mi, kɑɑ fukurɑ ɑ wɔrumɑ. Goo sɑri wi u koo nun seeyɑ. Kon wuu si su kɑ nun sikerenɛ dɔ̃ɔ doke kpɑ u sin tem kpuro di.

³³Nɛ, Gusunɔ, Isirelibɑn Yinni, nɛ wi nɑ wɔllu kɑ tem mɔ, nɑ mɑɑ nɛɛ, wee bɑ Isirelibɑ kɑ Yudɑbɑ dɑm dɔre bɑ bu yoru nɛnusi, mɑ bɑ yinɑmɔ bu bu yɔ̃su.

³⁴Adɑmɑ nɛ, ben yɑkio, nɑ dɑm mɔ. Nɛn yĩsirɑ Gusunɔ, wɔllu kɑ tem Yinni. Kon kɑ bu yinɑ kpɑ n ben tem bɔri yɛndu wɛ̃, kpɑ n Bɑbiloniɡibu burisinɑ.

³⁵Yinni Gusunɔ u mɑɑ nɛɛ, i Bɑbiloniɡibu tɑbu wɔrio kɑ sere ben wuu bɔkɔ ɡen tɔmbu kɑ ben sinɑ ɑsɑkpɔbu kɑ ben bwisiɡibu.

³⁶I ben sɔmɔ tii suo be tɑbu wɔrio kpɑ bu ɡɔsirɑ wiirobu. I ben tɑbu durɔ dɑmɡibu wɔrio kpɑ bu nɑndɑ.

³⁷I ben dumi kɑ ben tɑbu kɛkɛ yi dumi ɡɑwe tɑbu wɔrio. I tɔn be bɑ kɑnɑ bɑ bu somimɔ tɑbu sɔɔ, tɑbu wɔrio, kpɑ bu bɛrum soorɑ nɡe tɔn kurɔbu. I ben dukiɑ wɔrio i ɡurɑ.

³⁸Ben dɑɑnun nim mu ɡbero. Domi tem mi, bũnɑ bɑ rɑ sɑ̃, mɑ nu derɑ bɑ wiru bie.

³⁹Yen sɔ̃nɑ kon de Bɑbiloni yu ko bɑnsu sere kɑ bɑɑdommɑɔ, kpɑ purukɑnu kɑ tɑɑtɑɑnu nu nɑ nu n wɑ̃ɑ mi.

⁴⁰Kon Bɑbiloni ye kɔsukuwɑ nɡe Sodomu kɑ Gomɔrɑ kɑ sin wuu si nɛ, Yinni Gusunɔ nɑ kɑm koosiɑ. Goo kun mɑɑ sinɑmɔ mi. Nɛ, Yinni Gusunɔwɑ nɑ yeni ɡeruɑ.

⁴¹Wee, bweseru ɡɑrɑ wee sɑɑ sɔ̃ɔ yɛ̃sɑn nɔm ɡeu ɡiɑn di. Bwese te, tɑ kpɑ̃. Ten sinɑmbu bɑ dɑm mɔ. Be wee, bɑ swɑɑ mɔ̀ bɑ wee sɑɑ tontonden di.

⁴²Ben tɑbu kowobu bɑ tɑkobi kɑ tɛmɑ nɛni. Bɑ ǹ wɔnwɔndu mɔ, bɑ bɔɔbu. Bɑ wɔki nɡe nim wɔ̃kun nim. Bɑ dumi yɔɔwɑ bɑ swĩinɛ swɛɛ swɛɛ. Bɑ tɑbun sɔɔru sɑ̃ɑ bu kɑ Bɑbiloniɡibu wɔri.

⁴³Ye Bɑbilonin sinɑ boko u lɑbɑɑri ye nuɑ, yerɑ win ɡɔmɑ dwiiyɑ. Bɛrum kɑ wuriribu nùn mwɑ nɡe tɔn kurɔ wi u yiire u kĩ u mɑ.

⁴⁴Nɛ, Yinni Gusunɔ, kon wuu ɡbɑ̃rɑruɡuu wɔri nɡe ɡbee sunɔ ɡe ɡɑ yɑrimɑ sɑɑ Yuudɛnin ɡbee surorun di, kpɑ n ɡen tɔmbu kpuro yɑrinɑsiɑ subɑru sɔɔ. Sɑɑ ye sɔɔ, kon bu sunɔ kpɑo wɛ̃ wi nɛn tii nɑ ɡɔsɑ. Nɡe wɑrɑ u kɑ mɑn nɛ. Wɑrɑ u koo kpĩ u mɑn woodɑ wɛ̃. Sinɑ boko wɑrɑ u koo kpĩ u yɔ̃rɑ nɛn wuswɑɑɔ.

⁴⁵Yen sɔ̃, i swɑɑ dɑkio i nɔ himbɑ ye nɑ yi Bɑbiloni kɑ yen tɔmbun sɔ̃. Nɑ nɛɛ, kɑm kɑm kon de bu be kpuro ɡurɑ nɡe yɑ̃ɑnu bu kɑ dɑ tem tukumɔ. Bɑ koo ben wɑ̃ɑ yeru kpuro kɑm koosiɑwɑ.

⁴⁶Bɑbilonin kɑm koo bin wurenu sɔɔ, tem mu koo yĩiri, kpɑ wɔki bɑkɑnu nu se sɑɑ hɑnduniɑn bɑɑmɑ kpuron di.