Read bariba Yeremi 8 Bible Online

Yeremi 8 - bariba bible

Yeremi 8

¹Yinni Gusunɔ u nɛɛ, yen tɔ̃ɔ te, bɑ koo Yudɑbɑn sinɑmbu kɑ ben ɑsɑkpɔbun kukunu sikiɑ sikirun di kɑ ben yɑ̃ku kowobuɡinu kɑ ben sɔmɔbuɡinu kɑ sere mɑɑ Yerusɑlɛmun tɔmbuɡinu.

²Sɔ̃ɔ sɔɔ, nu ko n sɔ̃ɔ soore. Wɔ̃kuru kpɑ nu n wɑ̃ɑ suru kɑ kperin tɑrum sɔɔ. Bɑ ǹ mɑɑ nu ɡurɑmɔ bu sike. Nu koo kowɑ tɑɑki tem sɔɔ. Domi sɔ̃ɔ kɑ suru kɑ kperi yiyɑ bɑ rɑɑ kĩɑ mɑ bɑ yiirɑ bɑ yi sɑ̃wɑ.

³Be bɑ koo tiɑrɑ be, Yudɑ dɑɑ kɔ̃sɑɡii be sɔɔ, mi nɑ bu yɑrinɑsiɑ kpuro, ɡɔɔwɑ bɑ ko n kĩ n kere wɑ̃ɑru. Nɛ, Yinni Gusunɔwɑ nɑ yeni ɡeruɑ.

⁴Yinni Gusunɔ u Yeremi sɔ̃ɔwɑ u nɛɛ, ɑ nɛn tɔmbu bikio ɑ nɛɛ, tɔnu ù n wɔrumɑ, u ku rɑ se? Goo ù n ɡɛrɑ win swɑɑn di, u ku rɑ wurɑmɛ?

⁵Ǹ n mɛn nɑ, mbɑn sɔ̃nɑ nɛn tɔmbu Yudɑbɑ bɑ swɑɑ kɔ̃sɑ swĩi bɑ dɔɔ. Bɑ yɔ̃rɑriwɑ dim dim ben weesu sɔɔ bɑ n bũnu sɑ̃ɑmɔ. Bɑ ǹ kĩ bu ɡɔsirɑmɑ nɛn mi.

⁶Nɑ yɔ̃ sɛ̃ɛ nɑ bu swɑɑ dɑki kɑ lɑɑkɑri. Bɑ ɡɑri ɡerumɔ yi yi ǹ ɑsɑnsi ɡɑɑ mɔ. Ben ɡoo kun ɡɔ̃ru ɡɔsiɑmɔ win nuku kɔ̃surun di, u nɛɛ, mbɑn sɔ̃nɑ u yeni mɔ̀. Be kpuro bɑ ben tiin swɑɑ swĩiwɑ nɡe dumɑ ye yɑ wɑ̃ɑ tɑbu sɔɔ.

⁷Bɑɑ tionko kɑ kpurɑbu kɑ kpɑɑru bɑniku nu yɛ̃ sɑɑ ye n weenɛ nu sĩ kɑ sɑɑ ye n weenɛ nu wurɑmɑ nin wɑ̃ɑ yerɔ. Adɑmɑ nɛn tɔmbu bɑ ǹ nɛn woodɑ yɛ̃ ye nɑ kɑ bu kpɑre.

⁸Yinni Gusunɔ u mɑɑ nɛɛ, ɑmɔnɑ bɑ koo kɑ kpĩ bu nɛɛ bɑ bwisi mɔ. Beyɑ bɑ nɛ Gusunɔn woodɑ mɔ. Domi be bɑ woodɑ ye yoruɑ, bɑ ye ɡɔsiɑwɑ.

⁹Wee bwisiɡibɑ nɛ, Yinni Gusunɔn ɡɑri ɡɛmɑ. Mɑ bɑ yibɛrɛbɑn yinɑ mwɑɑrɑ bɑ wɑ̃ɑ biti kɑ sekuru sɔɔ. Ǹ n mɛn nɑ, bwisi yirɑ̀ bɑ mɑɑ mɔ.

¹⁰Yen sɔ̃nɑ nɛ, Yinni Gusunɔ, kon de yibɛrɛbɑ bu ben kurɔbu kɑ ben ɡbeɑ mwɛɛri. Domi sɑɑ ben bwɛ̃ɛbwɛ̃ɛbun di n kɑ ɡirɑri ben dɑmɡibɔ, ben tii tiin ɑrufɑɑniwɑ bɑ rɑ n nɑɑ ɡire kɑ tɑki. Nɛn sɔmɔbu kɑ yɑ̃ku kowobu, weesɑ bɑ rɑ n mɔ̀.

¹¹Bɑ rɑ n nɛn tɔmbun wɑhɑlɑ ɑtɑfiiru sɑ̃ɑwɑ, bɑ n mɔ̀, ɑlɑfiɑ wɑ̃ɑ, ɑdɑmɑ ɑlɑfiɑ ɡɑɑ sɑri.

¹²N weenɛwɑ sekuru tu bu mwɑ kɔ̃sɑ ye bɑ mɔ̀n sɔ̃. Adɑmɑ sekurɑ ku rɑ bu mwɛ bu tukɑ. Bɑ ku rɑ mɑɑ ben torɑnu tubu. Yen sɔ̃nɑ bɑ koo wɔrumɑ bu ɡbi dɔmɑ te kon bu sɛɛyɑsiɑ. Nɛ, Yinni Gusunɔwɑ nɑ yeni ɡeruɑ.

¹³Yinni Gusunɔ u nɛɛ, ɡbɑɑ wuko u rɑ win dĩɑnu ɡɛ̃wɑ u mɛnnɑ. Adɑmɑ wee, nɑ kĩ n nɛn dĩɑnu mɛnnɑ Isirelibɑn mi, mɑ nɑ deemɑ bɑ sɑ̃ɑwɑ nɡe resɛm ǹ kun mɛ nɡe fiɡie ye yɑ wurusu dɛllɑ yɑ ǹ binu mɔ. Yen sɔ̃nɑ kon bu deri swɑɑ sɑrobun sɔ̃.

¹⁴Yudɑbɑ bɑ nɛɛ, mbɑn sɔ̃nɑ sɑ sɔ̃ mini. I de su mɛnnɑ kpɑ su dɑ wuu si su ɡbɑ̃rɑnu mɔn mi, sɑ n ɡɔɔ mɑrɑ. Domi Gusunɔ bɛsɛn Yinni u yiwɑ su ɡbi. U koo sun nim dɛ̃ɛɡim nɔrusiɑ, yèn sɔ̃ sɑ nùn torɑri.

¹⁵Wee, sɑ tɑmɑɑ wɑ̃ɑrɑ koo kɔsi, ɑdɑmɑ yɑ ǹ koore. Sɑ tɑmɑɑ sɑɑ ɡɑɑ wee yè sɔɔ bɛsɛn nɔni swɑ̃ɑru tɑ koo kpe, ɑdɑmɑ nɑndɑbɑ bu sun deemɑ.

¹⁶Wee sɑ yibɛrɛbɑn dumin wɔkinu nɔɔmɔ Dɑnun berɑ ɡiɑ. Mɑ yi wuri mɔ̀, yi tem kpuro nɛni mu diirimɔ. Yibɛrɛ be, bɑ dĩɑnu ɡurɑmɔ bɑ ɡbeɑ mwɑɑmɔ, kɑ sere Yerusɑlɛmu kɑ yen tɔmbu.

¹⁷Adɑmɑ Yinni Gusunɔ u wisɑ u nɛɛ, nɑ ǹ dɑɑ bɛɛ sɔ̃ɔwɑ mɛ ro? Wee kon bɛɛ wɛɛ dɛ̃ɛɡii kpɑremɑ yi yi ǹ dobo doboɡibun ɡɑri nɔɔmɔ. Yi koo bɛɛ dwɛ̃ɛwɑ.

¹⁸Yeremi u nɛɛ, nɛn nuki sɑnkirɑ nɛn tɔmbun wɑhɑlɑn sɔ̃. Nɑ kĩ n tii nukuru yɛmiɑsiɑ, ɑdɑmɑ yɑ ǹ koorɔ.

¹⁹Wee, nɑ nɛn tɔmbun weeweenu nɔɔmɔ bɑɑmɑn di. Bɑ mɔ̀, Yinni Gusunɔ u sɑriwɑ Siɔniɔ? Yen sunɔ u ǹ mɑɑ wɑ̃ɑwɑ mi? Mɑ Yinni Gusunɔ u wisɑ u nɛɛ, mbɑn sɔ̃nɑ bɑ nɛn mɔru seeyɑ bɑ bũnu sɑ̃ɑmɔ nìn bwɑ̃ɑrokunu bɑ wɑɑmɑ tɔn tukobun min di.

²⁰Mɑ Yeremi u nɛɛ, sɑɑ ye sɑ rɑɑ yĩiyɔ su fɑɑbɑ wɑ, yɑ doonɑ nɡe ɡɛ̃ɛbun sɑɑ. Wee, sɑ ǹ fɑɑbɑ wɑ.

²¹Nɛn tɔmbu bɑ nɔni sɔ̃ɔre. Ben nɔni swɑ̃ɑ te, tɑ mɑn bɔkɑnɑ. Nɑ nɑnde, nɑ nuki sɑnkire.

²²Tibu sɑriwɑ Gɑlɑdiɔ? Dokotoro ɡoo sɑriwɑ mi? Nɡe mbɑn sɔ̃nɑ Isirelibɑn bosu kun kpeemɔ.

²³Nɛn wiru tɑ̀ n dɑɑ nim yibɑ mɑ nɛn nɔni yi sɑ̃ɑ nɡe bwii, kon dɑɑ wuri kowɑ sɔ̃ɔ sɔɔ kɑ wɔ̃kuru nɛn tɔn be bɑ ɡun sɔ̃.