Read bariba Yeremi 9 Bible Online

Yeremi 9 - bariba bible

Yeremi 9

¹Yeremi u nɛɛ, nɑ̀ n dɑɑ kuru mɔ ɡbɑburɔ, kon dɑɑ dɑwɑ ten mi, n nɛn tɔmbu deri nɑ n kɑ bu tondinɛ. Domi be kpuro bɑ sɑ̃ɑwɑ nɡe sɑkɑrɑ kowobu. Mɑ bɑ kuɑ nɑɑnɛ sɑriruɡibu.

²Yinni Gusunɔ u ɡeruɑ u nɛɛ, bɑ rɑ n nɔɔ dɛ̃ɛrɑwɑ bu kɑ weesu ko. Bɑ ku rɑ tem mɛ kpɑre dee dee ɡem sɔɔ, sere kɑ weesu. Wee siyɑ su kuɑ ben dɑm. Bɑ rɑ n nuku kɔ̃suru mɔ̀wɑ bɑ n dɔɔ. Mɛyɑ bɑ ku rɑ nɛ, Yinni Gusunɔ wure.

³Bɑɑwure u rɑ n win kpɑɑsi tɑki dimɔwɑ. Bɑ ǹ nɑɑnɛ mɔɔsinɛ. Bɑ rɑ n kɔrumɔtɔnu kuɑnɑmmɛwɑ, kpɑ bɑ n weesu sɔ̃ɔnɑmɔ.

⁴Kpɑ bɑ n nɔni wɔ̃kunɑmɔ. Bɑ ku rɑ ɡem sɔ̃ɔnɛ, kpɑ bɑ n ben nɔɔ dɛ̃ɛrimɔ bu kɑ weesu ko. Mɛyɑ bɑ rɑ n mɛɛrimɔ nɡe mɛ bɑ koo kɑ kɔ̃sɑ ko.

⁵Bɑ rɑ tii wɛ̃ kɔ̃sɑn kobu kɑ weesu sɔɔ sere bɑ yinɑ bu mɑn wurɑ.

⁶Nɛ, Gusunɔ, wɔllu kɑ tem Yinni, nɑ nɛɛ, wee, kon bu sɔwɑ n ben lɑɑkɑri mɛɛri. Domi nɑ ǹ yɛ̃ ye kon kɑ nɛn tɔn beni ko ben nuku kɔ̃surun sɔ̃.

⁷Wee, tɔn ben yɑrɑ yɑ sɑ̃ɑwɑ nɡe sɛ̃ɛ dɛ̃ɛɡuu ɡe ɡɑ rɑ ɡo. Weesɑ bɑ rɑ n mɔ̀, kpɑ bɑ n ben berusebu bɔri yɛndun ɡɑri sɔ̃ɔmɔ. Adɑmɑ ben ɡɔ̃ruɔ, yinɑ bɑ rɑ n bu bɛrie.

⁸Yenibɑn sɔ̃, kon bu sɛɛyɑsiɑ kpɑ n bu mɔru kɔsie. Nɛ, Yinni Gusunɔwɑ nɑ yeni ɡeruɑ.

⁹Yeremi u nɛɛ, kon ɡuunu kɑ mi bɑ rɑ rɑɑ yɑɑ sɑbenu kpɑre swĩiyɑ. Domi nu ɡberɑ, ɡoo ku rɑ mɑɑ sɑre mi, bɑ ku rɑ mɑɑ yɑɑ sɑbenun wuri nɔ mi. Mɑ ɡunɔsu kɑ ɡbeeku yɛɛ yi duki yɑkikirɑ min di. Gɑ̃ɑnu kun mɑɑ wɑ̃ɑ mi.

¹⁰Yinni Gusunɔ u nɛɛ, u koo de Yerusɑlɛmu yu ko bɑnsu, kpɑ yu ko ɡbeeku bɔ̃nun wɑ̃ɑ yeru. Mɛyɑ u koo mɑɑ de Yudɑbɑn wusu su ko bɑnsu.

¹¹Wɑrɑ u bwisi mɔ u kɑ ye tubusiɑ. Yinni Gusunɔ ù n kɑ yɛ̃ro ɡɑri kuɑ, u ɡeruo yèn sɔ̃ tem mɛ, mu kuɑ bɑnsu mi ɡoo ku rɑ mɑɑ sɑre.

¹²Yinni Gusunɔ u mɑɑ nɛɛ, yeni yɑ koorɑwɑ yèn sɔ̃ nɛn tɔmbu bɑ nɛn woodɑbɑ deri ye nɑ bu wɛ̃, mɑ bɑ ǹ nɛn ɡere wure, bɑ ǹ kɑ ye sɔmburu kue.

¹³Mɑ bɑ ben tiin kĩru swĩi bɑ bũu wi bɑ mɔ̀ Bɑɑli sɑ̃wɑ nɡe mɛ ben bɑɑbɑbɑ bɑ bu sɔ̃ɔsi.

¹⁴Yen sɔ̃nɑ nɛ, Gusunɔ Isirelibɑn Yinni, nɛ wi nɑ wɔllu kɑ tem mɔ, nɑ nɛɛ, wee, kon bu dɑ̃ɑ kiku ɡɑɡu [1] ɡe ɡɑ sosu diisiɑ, kpɑ n bu nim mɛ mu dɛ̃ɛ mɔ nɔrusiɑ.

¹⁵Kpɑ n de bu yɑrinɑ bu dɑ bwese tukunun suunu sɔɔ, mi be kɑ ben bɑɑbɑbɑ bɑ ǹ dɑɑ yɛ̃. Kon de bu bu ɡo kɑ tɑkobi, kpɑ bu bu kɑm koosiɑ mɑm mɑm.

¹⁶Nɛ, Gusunɔ wɔllu kɑ tem Yinniwɑ nɑ yeni ɡeruɑ. Yeremi u nɛɛ, i doo i tɔn kurɔ be bɑ rɑ ɡɔɔ swĩ kɑsumɑ. I doo i yen ɡonibɑ sokumɑ

¹⁷bu nɑ fuuku bu sun ɡɔɔ wuri kuɑ, kpɑ bɛsɛn nɔni yĩresu su koku.

¹⁸Domi wuri nɔɔrɑ Siɔniɔ. Bɑ mɔ̀, wee, bɑ sun ɡurɑ, seku bɑkɑrɑ sun deemɑ. N kuɑ tilɑsi su kɑ bɛsɛn tem deri. Wee bɑ bɛsɛn yɛnusu kɔsukɑ.

¹⁹Bɛɛ kurɔbu, i Yinni Gusunɔn ɡɑri nɔɔwɔ. Kpɑ i swɑɑ dɑki i nɔ ye u ɡerumɔ. I bɛɛn wɔndiɑbɑ wuri sɔ̃ɔsio, i ɡɔɔ wuri sɔ̃ɔsinɔ.

²⁰Domi ɡɔɔ u sun kɑ̃ɑsi sɑɑ fɛnɛntin di, mɑ u duɑ sere sinɑ kpɑɑrɔ. Mɛyɑ u mɑɑ bii be bɑ bɔsu swɛɛ sɔɔ ɡoomɔ, kɑ sere mɑɑ ɑluwɑɑsibɑ mi bɑ rɑ ɡesi mɛnnɛ kpuro.

²¹Yinni Gusunɔ u nɛɛ, tɔmbɑ koo wɔruku bu ɡbisuku, kpɑ ben ɡonu nu n tɛrie yɑkɑsɔ nɡe nɑɑ bisu, ǹ kun mɛ nɡe dobi yi yi ɡeɑ yinɑ bɑ deri ɡberɔ. Bɑ ǹ mɑɑ yi suɑmɔ.

²²Yen sɔ̃, bwisiɡii u ku woo kɑnɑ win bwisin sɔ̃. Dɑmɡii u ku mɑɑ woo kɑnɑ win dɑm sɔ̃. Mɛyɑ dukiɑɡii u ku woo kɑnɑ win dukiɑn sɔ̃.

²³Adɑmɑ wi u kĩ u woo kɑnɑ, u woo kɑnɔ yèn sɔ̃ u bwisi mɔ u kɑ mɑn tubu, mɑ u yɛ̃ mɑ nɛnɑ nɑ sɑ̃ɑ Yinni Gusunɔ. Nɑ sɑ̃ɑwɑ nɑɑnɛɡii wi u rɑ siri dee dee, kpɑ u de durom mu n wɑ̃ɑ tem sɔɔ. Tɔn benin bweserɑ bɑ rɑ mɑn wɛ̃re. Nɛ, Yinni Gusunɔwɑ nɑ yeni ɡeruɑ.

²⁴Wee tɔ̃ru ɡɑrɑ sisi tè sɔɔ kon bu kɑm koosiɑ be bɑ bɑnɡo mɔ wɑsi sɔɔ mɑ bɑ ku rɑ nɛn ɑrukɑwɑni yibie.

²⁵Beyɑ Eɡibitiɡibu, kɑ Yudɑbɑ, kɑ Edɔmubɑ, kɑ Amɔnibɑ, kɑ Mɔɑbubɑ, kɑ be bɑ rɑ ben wii bɑɑrun seri kɔni, kɑ sere be bɑ wɑ̃ɑ ɡbɑburɔ. Domi bwese tuku ni kpuro kɑ mɑm Isirelibɑn tii, bɑ sɑ̃ɑwɑ bɑnɡo sɑribɑ ben ɡɔ̃rusɔ.