Read bariba Swĩi 3 Bible Online

Swĩi 3 - bariba bible

Swĩi 3

¹Nɑ sɑ̃ɑwɑ tɔnu wi u nɔni swɑ̃ɑru yɛ̃ te tɑ nɑ Yinni Gusunɔn mɔrun sɔ̃.

²U derɑ nɑ dɑ yɑm wɔ̃kuru sɔɔ, mi yɑm bururɑm sɑri.

³Nɛ turowɑ u nɔmɑ doke bururu kɑ yokɑ.

⁴U derɑ nɑ woorɑ sɑɑ nɛn wirun di sere kɑ nɛn nɑɑsɔ. N sɑ̃ɑre u nɛn kukunu kɔsukɑ,

⁵u kɑ mɑn nuku sɑnkirɑnu kɑ nɔni swɑ̃ɑru bunɑnɑ nɡe ɡbɑ̃rɑru.

⁶U derɑ nɑ dɑ yɑm wɔ̃kuru sɔɔ nɡe ɡɔri be bɑ ɡu n tɛ.

⁷U mɑn ɡbɑ̃rɑru bunɑnɑ n ku kɑ yɑri, mɑ u mɑn bɔkuɑ kɑ yɔni dɑmɡii.

⁸Mɑ nɑ nɔɔɡiru suɑ nɑ somiru kɑnɑ. Adɑmɑ u ǹ mɑn swɑɑ dɑki u sere nɛn kɑnɑru mwɑ.

⁹U nɛn swɑɑ kɛnuɑ kɑ kpee bɑkɑnu, u ye ɡo.

¹⁰U kukuɑ u mɑn mɑrɑ nɡe ɡbeeku bɔ̃ɔ ɡe ɡɑ yɑɑ mɑrɑ. U mɑn mɑrɑ nɡe ɡbee sunɔ ɡe ɡɑ yɑɑ yɔɔru bwɛ̃ɛyɛ.

¹¹U nɛn swɛɛ bɔɔrɑ, mɑ u mɑn mwɑ u ɡɛ̃ɛkɑ. U mɑn deri biti sɔɔ.

¹²U win tɛndu bɛri mɑ u mɑn kuɑ nɡe yɑɑ ye u koo to.

¹³U nɛn yɛ̃sɑ yɑburɑ kɑ sɛ̃ɛnu.

¹⁴Mɑ tɔmbu kpuro bɑ mɑn yɛ̃ɛmɔ bɑ womusu dokemɔ tɔ̃ɔ bɑɑtere.

¹⁵U derɑ nɑ nɔni swɑ̃ɑru wɑ mɑ nuku sɑnkirɑrɑ mɑn ɡoomɔ nɡe tɑm.

¹⁶U derɑ nɑ kpenu temɑ mɑ nɛn donnu bɔɔkirɑ. Mɑ u mɑn torom wisi.

¹⁷U derɑ nɑ ǹ mɑɑ wɑ̃ɑ bɔri yɛndu sɔɔ, nɑ ǹ mɑɑ nuku dobu mɔ.

¹⁸Mɑ nɑ ɡeruɑ nɑ nɛɛ, nɑ ǹ mɑɑ dɑm mɔ, nɑ ǹ mɑɑ ɡɑ̃ɑnu yĩiyɔ wi, Yinni Gusunɔn mi.

¹⁹Nɑ̀ n nɛn nɔni swɑ̃ɑru yɑɑyɑ, n dɑ n sɑ̃ɑrewɑ nɡe dɑ̃ɑ sosurɑrun nimɑ nɑ nɔrɑ kɑ dɛ̃ɛ.

²⁰Nɑ̀ n yenibɑ kpuro yɑɑyɑ, nɑ rɑ wururewɑ.

²¹Adɑmɑ wee ye yɑ mɑn yĩiyɔbu wɛ̃ɛmɔ. Nɑ kĩ n tii ye yɑɑyɑsiɑ n ɡere.

²²Yerɑ, Yinni Gusunɔn durom kun kpɑ, win wɔnwɔndɑ kun mɑɑ nɔru kue.

²³Tɑ rɑ n wurɑmɑmɔwɑ bururu bɑɑtere. Win bɔrɔkiniru tɑ kpɑ̃.

²⁴Nɑ nɛɛ, Yinni Gusunɔ u sɑ̃ɑwɑ nɛɡii. Yen sɔ̃nɑ nɑ yĩiyɔbu mɔ wi sɔɔ.

²⁵U rɑ wi u nùn nɑɑnɛ sɑ̃ɑ kĩru sɔ̃ɔsi, kpɑ u wi u nùn kɑsu durom kuɑ.

²⁶Yɑ wɑ̃ tɔnu ù n Gusunɔn somiru mɑrɑ kɑ tɛmɑnɑbu.

²⁷Yɑ wɑ̃ tɔnu u Gusunɔn yoru wurɑ win ɑluwɑɑsiru sɔɔ.

²⁸Ù n lɑɑkɑri mɛɛribu ɡɑbu wɑ, u tii ɡɑwo sɛ̃ɛ u dɑ u n wɑ̃ɑ wi turo, domi Yinni Gusunɔwɑ u nùn bu kpɛ̃ɛ.

²⁹U n nùn wiru kpĩiyɛ win nuku sɑnkirɑnu sɔɔ, kpɑ u n yĩiyɔ mɑ u koo nùn somi.

³⁰U wi u nùn bɑɑrɑ soomɔ bɑɑru tĩiyɔ u sɔmɛ, kpɑ u wurɑ bu nùn wɔmɛ.

³¹Domi Yinni Gusunɔ u ku rɑ tɔnu biru kisi kɑ bɑɑdommɑɔ.

³²Bɑɑ ù n derɑ yɛ̃ro u nɔni swɑ̃ɑru wɑ, kɑ mɛ, u nùn kĩ too, domi win wɔnwɔndɑ kpɑ̃.

³³N ǹ win kĩru u kɑ tɔnu nɔni sɔ̃, kpɑ u nùn nuki sɑnku.

³⁴Yinni Gusunɔ u yɛ̃ sɑnɑm mɛ bɑ yobu nɔni sɔ̃ɔmɔ bɑ tɑɑkumɔ. U yɛ̃ sɑnɑm mɛ bɑ ǹ tɔmbu kuɑmmɛ nɡe mɛ n weenɛ. U yɛ̃ sɑnɑm mɛ bɑ ǹ bu siriɑmmɛ dee dee.

³⁵

³⁶

³⁷Goo kun kpɛ̃ u nɛɛ, ɡɑ̃ɑnu nu kooro, Yinni Gusunɔ ù kun nin woodɑ wɛ̃.

³⁸Wi, Gusunɔ Wɔrukoo wiyɑ u rɑ de ɡeɑ kɑ kɔ̃sɑ yu nɑ.

³⁹Ǹ n mɛn nɑ, mbɑn sɔ̃nɑ tɔnu u ko n weeweenu mɔ̀. U de u weeweenu ko win durum sɔ̃.

⁴⁰Yen sɔ̃, i de su bɛsɛn dɑɑ mɛɛri kpɑ su ye wɛ̃ɛri su wɑ su kɑ ɡɔsirɑmɑ Yinni Gusunɔn mi.

⁴¹Gusunɔ u wɑ̃ɑ wɔllɔ. I de su nɔmɑ yiiyɑ su nùn kɑnɑ.

⁴²Su nɛɛ, Yinni, sɑ durum kuɑ, sɑ nun seesi. A ǹ sun suuru kue.

⁴³A tii beruɑ wunɛn mɔru bɑkɑn sɔ̃, mɑ ɑ sun nɑɑ ɡirɑ ɑ ɡo wɔnwɔndu sɑri.

⁴⁴A duɑ ɡuru wiru sɔɔ ɑ ku kɑ bɛsɛn kɑnɑru nɔn sɔ̃.

⁴⁵A derɑ bɑ sun ɡɑrisi nɡe kubɑnu bwesenun suunu sɔɔ.

⁴⁶Bɛsɛn yibɛrɛbɑ kpuro bɑ sun nɔɔ kuurimɔ.

⁴⁷Ye yɑ sun tie, yerɑ nɑndɑbu kɑ bɛrum, domi bɑ bɛsɛn yɑ̃nu ɡurɑ, bɛsɛn tem mu kuɑ bɑnsu.

⁴⁸Wee nɑ nɔni yĩresu kokumɔ yèn sɔ̃ nɛn tɔmbɑ kɑm kuɑ.

⁴⁹Nɛn nɔni yĩresu kokumɔ, su ǹ yɔ̃re,

⁵⁰nɑ kɑ mɑrɑ Yinni Gusunɔ u nɛn lɑɑkɑri koomɑ wɔllun di,

⁵¹kpɑ u wɑ mɑ ye yɑ Yerusɑlɛmuɡibu deemɑmɔ, yɑ nɛn nuki sɑnkɑ.

⁵²Be bɑ mɑn tusɑ kɑm sɔɔ bɑ mɑn nɑɑ ɡirɑ nɡe ɡunɔ.

⁵³Bɑ kĩ bu nɛn wɑ̃ɑru kpeesiɑ wɔru sɔɔ. Bɑ mɑn kpenu kɑsukɑ.

⁵⁴Nim mu mɑn mwɛɛmɔ, mɑ nɑ nɛɛ, nɑ kɑm kuɑwɑ.

⁵⁵Sɑɑ ye sɔɔ, nɑ kɑnɑru kuɑ nɑ nɛɛ, Yinni Gusunɔ, nɑ nun sokɑ sɑɑ wɔru ɡe sɔɔn di,

⁵⁶mɑ ɑ nɛn nɔɔ nuɑ. A ku wunɛn swɑɑ kɔre. A nɛn wuri kɑ nɛn weeweenu nɔɔwɔ.

⁵⁷Dɔmɑ te, ɑ mɑn susi, ɑ mɑn sɔ̃ɔwɑ ɑ nɛɛ, n ku bɛrum ko.

⁵⁸Yinni ɑ mɑn siriɑ mɑ ɑ nɛn wɑ̃ɑru yɑkiɑ.

⁵⁹A wɑ kɔ̃sɑ ye bɑ mɑn kuɑ, ɑ mɑn sirio.

⁶⁰A wɑ mɔru ye bɑ mɑn kɔsiemɔ kɑ nɔɔ tiɑ ye bɑ mɔ̀ bu kɑ mɑn seesi.

⁶¹Yinni Gusunɔ, ɑ ben wɔmɑ nuɑ ye bɑ mɑn koosimɔ.

⁶²A ben nɔɔ tiɑ wɑ ye bɑ mɑn koosi bɑ kɑ mɑn ɡerusimɔ tɔ̃ɔ bɑɑtere.

⁶³Ye bɑ mɔ̀ kpuro sɔɔ ɡesi, nɛnɑ bɑ rɑ n womu dokemɔ.

⁶⁴Yinni Gusunɔ, nɑ yɛ̃ mɑ kɑɑ bu kɔsie nɡe mɛ ben kookoosu nɛ.

⁶⁵Kɑɑ ben ɡɔ̃run nɔni wɔ̃ke kpɑ ɑ de wunɛn bɔ̃ri yi n sɑ̃ɑ ben bɑɑ.

⁶⁶Kɑɑ bu nɑɑ ɡirɑ kɑ mɔru bɑkɑ kpɑ ɑ bu kpeerɑsiɑ bɑ kun mɑɑ wɑ̃ɑ tem mɛ sɔɔ.