Read bariba Swĩi 4 Bible Online

Swĩi 4 - bariba bible

Swĩi 4

¹Yinni Gusunɔn sɑ̃ɑ yerun wurɑ ɡeɑ ye, yɑ tĩrɑ. Ten kpenu nu yɑri swɛɛ kpuro sɔɔ.

²Yerusɑlɛmun tɔn be bɑ rɑɑ ɡɑrisi nɡe wurɑ ɡeɑ, bɑ ɡisɔ bu ɡɑrisiwɑ nɡe tem mɔnnu.

³Bɑɑ kɑ ɡbeeku bɔ̃nɔ, nu rɑ nin binu bom kɛ̃. Adɑmɑ nɛn tɔmbu bɑ ǹ ben bibun wɔnwɔndu mɔ. Bɑ sɑ̃ɑwɑ nɡe tɑɑtɑɑ niru te tɑ wɑ̃ɑ ɡbɑburɔ.

⁴Bɑ derɑ ben bii wɛ̃ɛnun yɑri mɑni nin dɑrosu sɔɔ nim nɔrun sɔ̃. Bibu bɑ dĩɑnu kɑsu, ɑdɑmɑ ɡoo sɑri wi u koo bu wɛ̃.

⁵Be bɑ rɑ rɑɑ dĩɑ ɡeenu di, bɑ ɡbisukumɔ swɛɛ sɔɔ. Be bɑ seeyɑ doo nɔɔru sɔɔ, bɑ kubɑnu bũurimɔ.

⁶Nɛn tɔmbun sɛɛyɑsiɑbu bu kpɑ̃, bu Sodomuɡibu kere, wuu ɡe Yinni Gusunɔ u kpeerɑsiɑ nɔni kpɑki teeru ɡoon nɔmɑ sɑri mi sɔɔ.

⁷Ben sinɑ bibu bɑ rɑɑ wɛ̃su bururɑm kere. Bɑ mɑm bom bekum bururɑm kere. Ben wɑsin ɡɔnɑ rɑ n sɔ̃riwɑ kpɑ ben wuswɑɑ yɑ n bɑllimɔ nɡe kpee ɡobiɡinu.

⁸Adɑmɑ tɛ̃ bɑ dɔ̃ɔ durom tĩrɑm kere. Bɑ ku rɑ mɑɑ bu tubu swɛɛ sɔɔ. Bɑ woorewɑ sere ben ɡɔnɑ yɑ kukunu mɑni. Mɑ ben wɑsi ɡbere nɡe dɑ̃ɑ ɡbebɑ.

⁹Be bɑ ɡbimɔ tɑbu sɔɔ, ben ɡɔɔ burɑm bo n kere be bɑ rɑ nɔni sɔ̃ɔre bu woorɑ ɡɔ̃ɔrun sɔ̃ bu sere ɡbi.

¹⁰Bɑɑ mɛ bii mɛrobu bɑ ben bibu kĩ too, kɑ mɛ, bɑ bu yikumɔ bɑ dimɔ wɑhɑlɑ ye yɑ be, nɛn tɔmbu deemɑn sɔ̃.

¹¹Yinni Gusunɔ u win mɔru kpuro sɔ̃ɔsi, u Yerusɑlɛmu dɔ̃ɔ sɔ̃re mɑ yɑ dɔ̃ɔ mwɑɑrɑ sere kɑ yen kpɛɛkpɛɛkuɔ.

¹²Sinɑ boko ɡoo ǹ kun mɛ tɔn diro ɡoo sɑri hɑnduniɑ sɔɔ wi u rɑɑ tɑmɑɑ yibɛrɛ u koo kpĩ u du Yerusɑlɛmun ɡbɑ̃rɑrun kɔnnɔn di.

¹³Wɑhɑlɑ bɑkɑ yeni yɑ nɑwɑ Gusunɔn sɔmɔbu kɑ yɑ̃ku kowobun torɑnun sɔ̃. Domi berɑ bɑ be bɑ ǹ torɑnu ɡɑnu kuen yɛm yɑri Yerusɑlɛmun swɛɛ sɔɔ.

¹⁴Bɑ rɑ n sirenɛwɑ swɛɛ sɔɔ bɑ n bɑbi nɡe wɔ̃kobu bɑ n disi sɔɔwɑ tɔmbun yɛm sɔ̃. Goo kun kɑ̃kɔ u mɑm ben yɑ̃nu bɑbɑ.

¹⁵Bɑ̀ n dɑ tɔmbun bɔkuɔ, bɑ rɑ bu ɡirewɑ bu nɛɛ, i doonɔ minin di, bɛɛ disiɡibu. I ku susimɑ i sun bɑbɑ. Yerɑ bɑ rɑ doonɛ min di bɑ kun yɛ̃ mi bɑ dɔɔ. Bɑ̀ n mɑɑ wɑ̃ɑ bwese tukunun suunu sɔɔ, nu rɑ bu sɔ̃wɑ nu nɛɛ, i ku sinɑ bɛsɛn suunu sɔɔ mini n kɑ tɛ.

¹⁶Yinni Gusunɔn tii u bu yɑrinɑsiɑ kɑ mɔru. U ǹ kĩ u bu wɑ. U ǹ ben yɑ̃ku kowo ɡoo doke ɡɑ̃ɑnu. U ǹ mɑɑ ben durɔ tɔkɔnun wɔnwɔndu kue.

¹⁷Sɑ swɑɑ mɛɛrɑ sɑ wɑsirɑ su kɑ wɑ mìn di somirɑ koo sun nɑɑwɑ. Sɑ rɑɑ bweseru ɡɑru mɛɛrɑ te sɑ yĩiyɔ tɑ koo sun fɑɑbɑ ko. Wee, tɑ ǹ sun fɑɑbɑ kue.

¹⁸Yibɛrɛbɑ bɑ bɛsɛn sɑnu sɑnusu mɛɛrɑ, bu kɑ sun yinɑri su dɑ wuun bɑtumɑ sɔɔ. Bɛsɛn ɡɔɔ turuku kuɑ. Bɛsɛn wɑ̃ɑrun tɔ̃rɑ kpɑwɑ mi.

¹⁹Bɛsɛn yibɛrɛ be, bɑ ɡunɔ bɑkeru sɑ̃ɑbu kere. Bɑ sun yɔɔru bwɛ̃ɛyɛ ɡbɑburɔ. Bɑ sun nɑɑ ɡire sere ɡuunu wɔllɔ.

²⁰Bɛsɛn sinɑ boko wi u derɑ sɑ wɑ̃ɑ, wi, wi Yinni Gusunɔ u ɡɔsɑ, wee, bɑ nùn yinɑ mwɑ. N deemɑ sɑ rɑɑ nɛɛ, win sɑɑbuwɑ sɑ kɑ tii mɔ bwesenun suunu sɔɔ.

²¹Bɛɛ mɑɑ Edɔmubɑ, bɛɛ be i wɑ̃ɑ Usiɔ, i ko kpĩ i nuku dobu ko tɛ̃, ɑdɑmɑ i n yɛ̃ mɑ siribu bɛɛ mɑrɑ. I ko i ko nɡe be tɑm mu ɡoomɔ kpɑ i tereru yɔ̃rɑ.

²²Bɛɛ Yerusɑlɛmuɡibu, bɛɛn sɛɛyɑsiɑbu kpɑ. Bɑ ǹ mɑɑ bɛɛ yoru mwɑɑmɔ bu kɑ doonɑ. Adɑmɑ bɛɛ Edɔmubɑ, Yinni Gusunɔ u koo bɛɛ mɔru kɔsiɑ, kpɑ u bɛɛn torɑnu terɑsiɑ.