Read bariba Esekiɛli 27 Bible Online

Esekiɛli 27 - bariba bible

Esekiɛli 27

¹Esekiɛli u nɛɛ, Tiri, Yinni Gusunɔ u mɑn sɔ̃ɔwɑ u nɛɛ,

²n nun ɡɔɔ wuri kuo,

³n nun sɔ̃ n nɛɛ, wunɛ Tiri ɑ wɑ̃ɑwɑ nim wɔ̃kun ɡoorɔ mɑ ɑ kɑ bwese dɑbinu tenkuru mɔ̀. Ye Yinni Gusunɔ u ɡeruɑ wee. U nɛɛ, wunɛ Tiri, ɑ rɑ rɑɑ nɛɛ, ɑ sɑ̃ɑwɑ wuu burɔ.

⁴Wunɛn dɑm mu wɑ̃ɑwɑ sere nim wɔ̃kuɔ. Be bɑ nun bɑnɑ, bɑ nun kuɑwɑ nɡe ɡoo nimkuu burɔ.

⁵Mɑ bɑ wunɛn wɑsi kuɑ kɑ dɑ̃ɑ ye bɑ mɔ̀ sipɛrɛ ye yɑ wee Senirin di. Mɑ bɑ dɑ̃ɑ ye bɑ mɔ̀ sɛduru ye yɑ wee Libɑnin di suɑ bɑ kɑ wunɛn beku sɔretiru kuɑ.

⁶Mɑ bɑ wunɛn sɛsɛnu kuɑ kɑ Bɑsɑnin dɑ̃ɑ ɡeɑ ye bɑ mɔ̀ sɛɛni. Mɑ bɑ wunɛn kitɑnu kuɑ kɑ dɑ̃ɑ ye bɑ mɔ̀ buyi ye bɑ kɑ nɑ sɑɑ Kitimun di mɑ bɑ nu suunu donnu mɑni.

⁷Mɑ bɑ beku ni bɑ koo nun kɑreɑ kuɑ Eɡibitiɔ kɑ wɛ̃ɛ dɑmɡii bɑ sɔmɑ doke. Beku ni, nu sɑ̃ɑwɑ nɡe wunɛn ɡidi bɔrɑ. Mɑ bɑ bekɑ ye yɑ rɑ wunɛn kiɑnu wukiri kuɑ kɑ wɛ̃ɛ ɡɑɑdurɑɡii, kɑ mɑɑ wɛ̃ɛ wunɔmɡii yi yi wee sɑɑ tem bure te bɑ mɔ̀ Sipun di.

⁸Sidoniɡibu kɑ Aɑfɑdibɑ bɑ rɑ wunɛn sɛsɛnu bwie kpɑ wunɛɡii be bɑ yɛ̃ru bo bɑ n bu kpɑre.

⁹Gebɑlin nɔmɑn sɔm kowo be bɑ sɔmɑ ye yɛ̃ sɑ̃ɑ sɑ̃ɑ, berɑ bɑ rɑ wunɛn wɔrusu kɔre. Be bɑ tenkuru mɔ̀ kɑ ɡoo nimkusu kpuro, bɑ rɑ yɔ̃rewɑ wunɛn mi bu wunɛn kiɑru dwe.

¹⁰Pɛɛsibɑ kɑ Ludibɑ kɑ Putiɡibun tii bɑ rɑɑ sɑ̃ɑwɑ wunɛn tɑbu kowobu. Bɑ sɑ̃ɑwɑ tɑbu durɔbu kɑ ɡem. Wunɛn miyɑ bɑ rɑ ben tɛrɛnu kɑ ben sii furɔ kɔkɔnu bwɛ̃ kpɑ ye kpuro yɑ n nun bɛɛrɛ doke.

¹¹Aɑfɑdibɑ kɑ wunɛn tiin tɑbu kowobɑ bɑ rɑ wunɛn ɡbɑ̃rɑru kɔ̃su bu kɑ sikerenɑ. Tɑbu kowo dɑmɡibu ɡɑbɑ bɑ rɑ mɑɑ wunɛn kuku yenu kɔ̃su. Wunɛn ɡbɑ̃rɑrɔwɑ bɑ rɑ ben tɛrɛnu bwɛ̃ kpɑ nu n nun bɛɛrɛ doke.

¹²Tiri, wunɛn ɑrumɑni bɑkɑn sɔ̃nɑ Tɑɑsisiɡibu bɑ rɑ tenkuru nɛ wunɛn mi. Beyɑ bɑ rɑ n kɑ kiɑnu nɑɑmɔ wunɛn yɑburɔ. Niyɑ sii ɡeesu, kɑ sii wɔ̃kusu, kɑ sii kpikisu, kɑ sii pɛɛrum.

¹³Wunɛ kɑ Gɛrɛkibɑ, kɑ Tubɑliɡibu, kɑ Mɛsɛkiɡibun tii i rɑ tenkuru koosinɛ. Bɑ rɑ kɑ nun yobu kɑ ɡɑ̃ɑ ni bɑ sekɑ kɑ sii ɡɑndu kiɑru dweeri.

¹⁴Toɡɑɑmɑɡibu bɑ rɑ mɑɑ dumi yi bɑ rɑ kɑ sɔmburu ko kɑ yi bɑ rɑ kɑ tɑbu de kɑ kɛtɛkunu dɔrɑm nɛ wunɛn yɑburɔ.

¹⁵Wunɛ kɑ Dedɑniɡibu kɑ be bɑ wɑ̃ɑ tem bureru ɡiɑ kpuro i rɑ mɑɑ tenkuru koosinɛ. Bɑ rɑ nun wunɛn dibu kɔsie kɑ suunu donnu kɑ dɑ̃ɑ ye bɑ mɔ̀ ebɛni.

¹⁶Wunɛ mɑɑ kɑ Siriɡibu i rɑ tenkuru koosinɛ. Gɑ̃ɑ dɑbinɑ bɑ rɑ nun dweeri kpɑ bu kɑ nun kpee ɡobiɡinu nɑɑwɑ ni nu sɑ̃ɑ nɡe yɑkɑ bekusu, kɑ beku ɡɑɑdurɑɡinu, kɑ beku ni bɑ sɔmɑ dokeɑ, kɑ beku ni bɑ kuɑ kɑ wɛ̃ɛ dɑmɡii, kɑ nim wɔ̃kun kpee burɑnu [3], kɑ kpee ɡobiɡii ni nu sɔ̃ri.

¹⁷Wunɛ kɑ Yudɑbɑ kɑ Isirelibɑ i rɑ tenkuru koosinɛ. Bɑ rɑ kɑ nun ɑlikɑmɑ ye yɑ wee Minitin di kɑ pɛ̃ɛ bwese bwesekɑ kɑ tim kɑ ɡum kɑ sere ɡum sɑwɑrɑm kiɑru dweeri.

¹⁸Wunɛ kɑ Dɑmɑsiɡibu i rɑ tenkuru koosinɛ wunɛn ɑrumɑni bɑkɑn sɔ̃. Bɑ rɑ kɑ nun tɑm mɛ mu wee Hɛlubonin di kɑ wɛ̃ɛ kpiki yi bɑ kuɑ kɑ yɑ̃ɑ sɑnsu kiɑru dweeri.

¹⁹Sɑɑ Usɑlin di, Yɑfɑniɡibu kɑ Gɛrɛkibɑ bɑ rɑ kɑ kiɑnu nɛ wunɛn yɑburɔ. Niyɑ, sisu kɑ dɑ̃ɑ ɡɑɑ kɑ sere dɑ̃ɑ kiki nubu duroruɡisu kpɑ bu kɑ nun ye kpuro kiɑru dweeri.

²⁰Wunɛ kɑ Dedɑniɡibu i rɑ tenkuru koosinɛ kpɑ bu nun ɡɑɑri bekɑ dɔre.

²¹Wunɛ kɑ Dɑɑrububɑ kɑ Kedɑɑn wiruɡibu i tenkuru koosinɑmɔ. Bɑ rɑ nun kiɑru dweeriwɑ kɑ yɑ̃ɑ kpɛmminu kɑ yɑ̃ɑ kinɛnu kɑ sere mɑɑ bonu.

²²Wunɛ kɑ Sebɑn tenkubɑ kɑ Rɑmɑɡibu i rɑ tenkuru koosinɛ. Bɑ rɑ kɑ turɑre ye yɑ ɡeɑ bo nɛ wunɛn yɑburɔ kɑ kpee ɡobiɡinu bwese bwesekɑ kɑ sere mɑɑ wurɑ.

²³Wunɛ kɑ Hɑrɑniɡibu kɑ Kɑnnɛɡibu kɑ Edɛniɡibu kɑ Sebɑn tenkubɑ kɑ Asiriɡibu kɑ Kilimɑdiɡibu i rɑ tenkuru koosinɛ.

²⁴Yɑ̃ɑ ɡobiɡinɑ bɑ rɑ kɑ nun kiɑru dweeri. Yɑ̃ɑ ni bɑ rɑ kɑ nɛ wunɛn yɑburɔ niyɑ, yɑbe ɡɑɑdurɑɡinu kɑ yɑbe ni bɑ sɔmɑ doke kɑ bekɑ ye bɑ sɔmɑ doke kɑ sere mɑɑ wɛ̃ɛ dɑmɡii yi bɑ tɑrɑ.

²⁵Tɑɑsisin ɡoo nimkusɑ su rɑ n wunɛn kiɑnu sɔɔwɑ. Mɑ wunɛn dukiɑ kɑ wunɛn bɛɛrɛ yɑ kpɛ̃ɑ nim wɔ̃kun berɑ mi ɡiɑ.

²⁶Goo tɛmɔbu bɑ kɑ nun bɔsu nim bɑkɑm sɔɔ. Adɑmɑ woo ɡɑɡɑ koo nɑ sɑɑ sɔ̃ɔ yɑri yerun di ɡu nun kɔsuku nim wɔ̃ku ɡen suunu sɔɔ.

²⁷Wunɛn dukiɑ kɑ wunɛn kiɑnu kɑ be bɑ rɑ wunɛn sɛsɛnu bwie kɑ be bɑ rɑ bu kpɑre kɑ be bɑ rɑ wunɛn wɔrusu kɔre kɑ wunɛn kiɑ dɔrobu kɑ wunɛn tɑbu kowobu kɑ sere be kpuro be bɑ wɑ̃ɑ wunɛn tii sɔɔ bɑ koo num nim wɔ̃kun sɔɔwɔ dɔmɑ te ɑ wɔrumɑ.

²⁸Be bɑ rɑ nun kpɑre bɑ koo kuuki ko kpɑ nim wɔ̃kun ɡoonu nu diiri.

²⁹Be bɑ wunɛn sɛsɛnu bwiɑmɔ kɑ be bɑ bu kpɑre, be kpuro bɑ koo sɑrɑwɑ wunɛn min di bu nɑ tem dirɑɔ.

³⁰Bɑ koo nɔɔɡiru suɑ bu nun wuri kɔ̃si koosi kpɑ bu tii tuɑ wisi winɔ bu bindi torom sɔɔ nuku sɑnkirɑnun sɔ̃.

³¹Bɑ koo ben winu kɔni wunɛn sɔ̃, kpɑ bu sɑɑkibɑ dewe bu nun ɡɔɔ swĩiyɑ nuku sɑnkirɑnun sɔ̃.

³²Ben nuku sɑnkirɑ ni sɔɔ, bɑ koo nun womu koosi bu nɛɛ, wunɛ Tiri, ɑ ǹ kɑ wuu ɡɑɡu weenɛ. Wee ɑ kɑm kuɑ nim wɔ̃kun suunu sɔɔ.

³³Sɑnɑm mɛ ɑ wunɛn tenkuru mɔ̀ tɔn dɑbirɑ ɑ rɑ diisie. Wunɛn dukiɑ kɑ wunɛn kiɑnun kpɑ̃ɑrun sɔ̃, ɑ derɑ sinɑmbɑ kuɑ dukiɑɡibu.

³⁴Adɑmɑ ɑ kɔsikirɑ ɑ wɔri nim wɔ̃kun sɔɔwɔ mɑ wunɛ kɑ wunɛn kiɑnu kɑ wunɛn tɔn dɑbi te kpuro i nim diirɑ.

³⁵Be bɑ wɑ̃ɑ tem burenu sɔɔ bɑ nuki sɑnkire wunɛn sɔ̃. Mɑ ben sinɑmbu bɑ bɛrum soore bɑ wuswɑɑ burisinɛ.

³⁶Tem tukum tenku be bɑ koo sɑrɑ mi, biti koo bu mwɑ kpɑ bu nun wiɑ koosi. Domi ɑ kɑm kuɑ. A ǹ kɑɑ n mɑɑ wɑ̃ɑ sere kɑ bɑɑdommɑ.