Read bariba Osee 13 Bible Online

Osee 13 - bariba bible

Osee 13

¹Yellu Efɑrɑimubɑrɑ bɑ dɑm bo Isirelibɑ sɔɔ. Bɑ̀ n bwese kɛri yi yi tie ɡɑri sɔ̃ɔwɑ, bɑ rɑ nɑndewɑ. Adɑmɑ bɑ bũu wi bɑ mɔ̀ Bɑɑli sɑ̃wɑ, mɑ bɑ ɡu.

²Wee sere kɑ tɛ̃, bɑ durum mɔ̀ bɑ dɔɔ. Bɑ tii bwɑ̃ɑroku sii ɡeesuɡinu kuɑ. Ben tiiwɑ bɑ bwisikɑ mɑ bɑ nu sekɑ kɑ ben nɔmɑ nu kɑ nɑɑ binu weenɛ. Mɑ bɑ ɡerumɔ nin sɔ̃ bɑ mɔ̀, be bɑ yɑ̃kuru nɑ, bu yiiro bu nɑɑ bii ni sɔ̃su.

³Yen sɔ̃nɑ bɑ koo doonɑ nɡe bururun kɑkoru ǹ kun mɛ nɡe dirum. Bɑ sɑ̃ɑ nɡe yɑkɑ si bɑ ɡurɑ bɑ yɑri doo soo yerun di su kɑ woo doonɔ ǹ kun mɛ nɡe wii si su yɑrimɔ ɡbɑburun di.

⁴Adɑmɑ nɛ, nɑ sɑ̃ɑwɑ Gusunɔ ben Yinni sɑɑ mìn di nɑ bu yɑrɑmɑ Eɡibitin di. Bɑ ǹ mɑɑ Yinni ɡoo mɔ mɑ n kun mɔ nɛ. Fɑɑbɑ kowo mɑɑ sɑri nɛ bɑɑsi.

⁵Nɑ bu kpɑrɑ sɑɑ mìn di bɑ wɑ̃ɑ ɡbɑburɔ mi ɡɑ̃ɑnu ku rɑ kpi.

⁶Sɑnɑm mɛ bɑ duɑ tem mɛ sɔɔ, bɑ di bɑ debɑ nɡe yɑɑ sɑbe ni bɑ kpɑre, mɑ bɑ tii suɑbu toruɑ bɑ mɑn duɑri.

⁷Tɛ̃, ko nɑ n sɑ̃ɑwɑ nɡe ɡbee sunɔ nɑ n bu mɑrɑ swɑɑɔ nɡe musuku ɡbeeku.

⁸Kon bu wɔrimɑwɑ nɡe ɡbeeku yɑɑ ɡɔbɑ yèn binu bɑ mwɑ. Kpɑ n ben toronu bɛsuku. Mɛyɑ kon bu kɑsuku nɡe mɛ ɡbeeku yɛɛ yi rɑ yɑɑ kɑsuku, kpɑ ɡbee sunɔ niu ɡu bu tem.

⁹Isirelibɑ, wee i kɑm kuɑ yèn sɔ̃ i mɑn seesi nɛ wi kon kpĩ n bɛɛ somi.

¹⁰Mɑnɑ bɛɛn sinɑ boko u wɑ̃ɑ. I de u bɛɛ fɑɑbɑ ko bɛɛn wusu kpuro sɔɔ. Mɑnɑ bɛɛn kpɑrobɑ wɑ̃ɑ be i bikiɑ i nɛɛ, bu bɛɛ sinɑmbu kuɑ.

¹¹Nɑ rɑɑ bɛɛ sinɑ boko wɛ̃ kɑ mɔru. Mɛyɑ kon mɑɑ bɛɛ nùn mwɑɑri kɑ mɔru.

¹²Nɑ Isirelibɑn durum yoruɑ nɑ yii sere sɑɑ ɡɑɑ.

¹³Isirelin bweseru tɑ sɑ̃ɑwɑ nɡe bii wìn mɑrubun sɑɑ yɑ turɑ mɑ u kpɑsɑ wɔri mɔ̀, ɑdɑmɑ bii wi, u yinɑ u yɑrimɑ.

¹⁴Kon bu wunɑ sɑɑ ɡɔribun wɑ̃ɑ yerun dɑm di. Kpɑ n bu yɑkiɑ ɡɔɔn nɔmɑn di. Gɔɔ, ɑ nɑ kɑ wunɛn bɑrɑ te ɑ rɑ kɑ tɔnu ɡo. Gɔribun wɑ̃ɑ yeru, ɑ nɑ kɑ wunɛn kɑm kootiɑ. Domi nɑ ǹ mɑɑ ben wɔnwɔndu mɔ̀.

¹⁵Bɑɑ Isirelibɑ bɑ̀ n kuurɑ ɑmɔ, beɡibun suunu sɔɔ, yibɛrɛbɑ bɑ koo nɑ nɡe woo sum sɑɑ sɔ̃ɔ yɑri yerun di. Nɛ, Yinni Gusunɔ nɑ kon bu seeyɑmɑwɑ ɡbɑburun di, kpɑ bu dɔkɔbɑ ɡberɑsiɑ. Kpɑ bwii yi nim kpe. Gɑ̃ɑ ni nu ɡeɑ sɑ̃ɑ kpurowɑ bɑ koo ɡurɑ bu kɑ doonɑ.