Read bariba Osee 5 Bible Online

Osee 5 - bariba bible

Osee 5

¹Yinni Gusunɔ u nɛɛ, bɛɛ yɑ̃ku kowobu, i yenibɑ swɑɑ dɑkio. Bɛɛ Isirelibɑ, i swɑɑ dɑkio i nɔ. Bɛɛ sinɑ kpɑɑruɡibu, i swɑɑ tem kpĩiyɔ i nɔ. Bɛɛyɑ siri bini bu kɑ yɑ̃. Domi i kuɑ tɔmbun yinɑ Misipɑɔ, mɑ i kuɑ ben tɑɑ Tɑboriɔ.

²Mɑ bɑ mɑn biru kisi bɑ numɑ durum sɔɔ. Yen sɔ̃, kon bɛɛ kpuro sɛɛyɑsiɑ.

³Nɑ Isirelibɑ yɛ̃wɑ sɑ̃ɑ sɑ̃ɑ. Ben ɡoo kun mɑn berue. Wee bɑ dɑ bɑ bũnu ɡɑsirɑ bɑ tii disi doke.

⁴Osee u nɛɛ, bɑ ǹ kpɛ̃ bu mɑɑ wurɑmɑ ben Yinnin mi ben kookoosun sɔ̃. Domi bũu sɑ̃ɑrun ɡɑsiribu ɡinɑ wɑ̃ɑ ben ɡɔ̃ru sɔɔ. Mɛyɑ bɑ ǹ mɑɑ wi, Yinni Gusunɔ yɛ̃.

⁵Isirelibɑn tii suɑbu bu sɔ̃ɔsimɔ mɛ bɑ sɑ̃ɑ. Bɑ koo wɔrumɑ ben durum sɔ̃. Yudɑbɑn tii bɑ koo wɔrumɑ kɑ be sɑnnu.

⁶Sɑnɑm ɡɑm sisi mɛ̀ sɔɔ bɑ koo bikiɑru dɑ Yinni Gusunɔn mi, kpɑ bu kɑ nùn yɑ̃ɑnu kɑ kɛtɛbɑ yɑ̃kuru kuɑ. Adɑmɑ bɑ ǹ nùn wɑsi, domi u bu deri.

⁷Beyɑ bɑ nùn tɔnu kɑndu kuɑ. Domi bɑ dɑ bɑ bii seeɡebɑ mɑrɑ be bɑ ǹ nùn yɛ̃. Tɛ̃, n ǹ tɛɛmɔ u kɑ bu kɑm koosiɑ be kɑ ben ɑrumɑni.

⁸Yinni Gusunɔ u nɛɛ, i tɑbun kɔbɑ soowo Gibeɑɔ kɑ Rɑmɑɔ. I tɑbun wurenu koowo Betɛli Afɛniɔ. Bɛɛ Bɛnyɑmɛɛbɑ, tɑbu durɔbɑ wee bɛɛn birun di.

⁹Gɑri ɡeeyɑ nɑ Isirelibɑ sɔ̃ɔmɔ. Dɔmɑ te kon bu sɛɛyɑsiɑ, bɑ koo kɑm kowɑ.

¹⁰Wee Yudɑbɑn wiruɡibu bɑ sɑ̃ɑwɑ nɡe be bɑ rɑ tem ɡbɛni bu kɑ ben tiin tem sosi. Yen sɔ̃, kon bu nɛn mɔru wisi nɡe nim torɑ.

¹¹Siribu bu Isirelibɑ di, mɑ bɑ bu dɑm dɔremɔ yèn sɔ̃ bɑ kɑm nɑɑ ɡire.

¹²Nɑ kon bu di nɡe ɡɛmi. Kpɑ nɑ n Yudɑbɑ wɑhɑlɑ mɔ̀ nɡe bɑrɑ te tɑ kukunu temmɔ.

¹³Mɛyɑ Isirelibɑ bɑ tii bɑrɑru wɑɑsi. Mɑ Yudɑbɑ bɑ ben bosu wɑ. Mɑ Isirelibɑ bɑ ɡɔrɑ Asiriɔ bu kɑ sinɑ boko Yɑrɛbu somiru kɑnɑ. Adɑmɑ u ǹ kpɛ̃ u bu bɛkiɑ u sere nɛɛ, u koo ben bosu kpeesiɑ.

¹⁴Nɑ ko n sɑ̃ɑwɑ nɡe ɡbee sunɔ Isirelibɑ kɑ Yudɑbɑn sɔ̃. Kon bu wɔri n yɑɑku kpɑ n bu suɑ n kɑ doonɑ. Goo sɑri wi u koo bu wɔrɑ sɑɑ nɛn nɔmɑn di.

¹⁵Yinni Gusunɔ u nɛɛ, ǹ n mɛn nɑ, kon bu biru kisi kpɑ n wurɑ nɛn wɑ̃ɑ yerɔ sere bu kɑ tubu mɑ bɑ torɑ. Ben nɔni swɑ̃ɑru tɑ koo de bu mɑn kɑsu kpɑ bu mɑn somiru kɑnɑ.