Read bariba Abudiɑsi 1 Bible Online

Abudiɑsi 1 - bariba bible

Abudiɑsi 1

¹Gɑri wee yi Yinni Gusunɔ u nɛɛ, Abudiɑsi u ɡere Edɔmubɑn sɔ̃. Yinni Gusunɔ u sɔmɔ ɡɔrɑ bwese tukunun suunu sɔɔ u nɛɛ, nu seewo nu Edɔmubɑ tɑbu wɔri.

²Yinni Gusunɔ u Edɔmubɑ sɔ̃ɔwɑ sɑɑ Abudiɑsin nɔɔn di u nɛɛ, bɛɛ Edɔmubɑ, kon bɛɛ ko bwese dɑm sɑriruɡiru bwesenu kpuro sɔɔ. Tɔmbu kpuro bɑ koo bɛɛ ɡɛm.

³Wee bɛɛn tii suɑbu bɛɛ nɔni wɔ̃kuɑ, mɑ i sɔ̃ kpee bɑɑbɑ sɔɔ mì ɡoo kun kpɛ̃ u bɛɛ nɑɑ turi. Mɑ i tii sɔ̃ɔmɔ i mɔ̀, wɑrɑ u koo sun surɑ minin di.

⁴Yen sɔ̃, i n yɛ̃ mɑ bɑɑ ì n dɑ sere mi ɡunɔ bɑkeru tɑ ten sokuru mɔ, ǹ kun mɛ, i duɑ kperiɔ i bɛɛn wɑ̃ɑ yenu kuɑ mi, kon bɛɛ sɑrɑsiɑmɑ. Nɛ, Yinni Gusunɔwɑ nɑ yeni ɡeruɑ.

⁵Gbɛnɔbu bɑ̀ n nɑ bɑ bɛɛ wɔri subɑru sɔɔ wɔ̃kuru, bɑ koo bɛɛn yɑ̃nu ɡurɑwɑ. Bɑ̀ n bɛɛn resɛm ɡbeɑ wɔri, bɑ koo ye sɔriwɑ, kpɑ bu bɛɛ fiiko deriɑ.

⁶Adɑmɑ bɛɛ Esɑun bibun bweseru, yibɛrɛbɑ bɑ koo bɛɛn ɑrumɑni ɡurɑ, bɑɑ kɑ bɛɛn dukiɑ ye yɑ beruɑ.

⁷Be i rɑɑ kɑ nɔɔ tiɑ sɑ̃ɑ, bɑ koo bɛɛ tɔnu kɑndu kuɑ, kpɑ bu bɛɛ ɡirɑ sere bɛɛn tem nɔɔ burɑ yerɔ. Be bɑ rɑɑ sɑ̃ɑ bɛɛn bɔrɔbɑ, bɑ koo bɛɛ dɑm dɔre. Kɑ be i rɑ rɑɑ di sɑnnu, bɑ koo bɛɛ yinɑ bɛriɑ. Adɑmɑ i ǹ ye tubumɔ.

⁸Nɛ, Yinni Gusunɔ nɑ nɛɛ, nɛn mɔrun tɔ̃ru sɔɔ, kon bwisiɡibu kpeerɑsiɑ Edɔmun tem sɔɔ, kpɑ n lɑɑkɑriɡibu ɡo.

⁹Bɛɛ Temɑɡibu, bɛɛn tɑbu kowobu bɑ koo burisinɑ kpɑ bu be kpuro ɡo.

¹⁰Bɛɛ Edɔmubɑ, wee i bɛɛn mɛro bisibu Yɑkɔbun bweseru mwɛɛrɑ i ɡo. Yen sɔ̃, i ko i sekuru wɑ. I ko i kɑm kowɑ sere kɑ bɑɑdommɑɔ.

¹¹Domi i wɑ̃ɑ mi sɑnɑm mɛ yibɛrɛbɑ bɑ Isirelibɑ tɑbu kɑmiɑ mɑ bɑ duɑ ben wusɔ. Mɑ bɑ ben yɑ̃nu ɡurɑ Yerusɑlɛmuɔ bɑ tɛtɛ toosi. Bɛɛn tii i sɑ̃ɑ nɡe yibɛrɛ be.

¹²Bɛɛ Edɔmubɑ, n ǹ dɑɑ weenɛ i bɛɛn mɛro bisibu Yudɑbɑ mɛɛri kɑ nuku dobu sɑnɑm mɛ bɑ nɔni sɔ̃ɔre. N ǹ dɑɑ weenɛ i nuku dobu ko ǹ kun mɛ i bu wɔmɛ sɑnɑm mɛ bɑ nuki sɑnkire.

¹³Bɛɛ Edɔmubɑ, n ǹ dɑɑ weenɛ i du nɛn tɔmbun wuuɔ sɑnɑm mɛ yibɛrɛbɑ bɑ ɡu kpeerɑsiɑ. N ǹ dɑɑ weenɛ i ɡen bɑnsu mɛɛri kɑ nuku dobu. N ǹ dɑɑ weenɛ i ɡen dukiɑ ɡurɑ i tii koosi.

¹⁴N ǹ dɑɑ weenɛ i yɔ̃rɑ swɑɑ yinnɑ yerɔ i ben be bɑ duki mɔ̀ mwɛɛri i ɡo, ǹ kun mɛ i bu mwɑ i yibɛrɛbɑ nɔmu sɔndiɑ nɔni swɑ̃ɑ te sɔɔ.

¹⁵Domi sɑɑ yɑ turuku kuɑ yè sɔɔ Yinni Gusunɔ u koo bwesenu kpuro siri. Sɑɑ ye sɔɔ, bɑ koo bɛɛ kuɑ nɡe mɛ i ɡɑbu kuɑ. Kɔ̃sɑ ye i kuɑ mi, yɑ koo wɔriwɑ bɛɛn wiru wɔllɔ.

¹⁶Bɛɛ Isirelibɑ, i nɛn mɔru ye nɑ kɑ bɛɛ sɛɛyɑsiɑ nɔrɑ nɛn ɡuu dɛɛrɑrun wɔllɔ. Mɛyɑ bwese ni nu tie, nu ǹ kpɛ̃ nu ye nɔ nu kpe. Nu ko n ye nɔrumɔwɑ sere yu kɑ nu ɡo kpɑ nu kpeerɑ mɑm mɑm.

¹⁷Sɑɑ ye sɔɔ, Siɔni koo mɑɑ ko nɛ Gusunɔn ɡuu dɛɛrɑru. Be bɑ yɑrɑ tɑbun di Yɑkɔbun bweseru sɔɔ bɑ koo fɑɑbɑ wɑ mi, kpɑ bu ben tem mwɑ be bɑ rɑɑ mu mwɑn nɔmɑn di.

¹⁸Yɑkɔbun bibun bweseru kɑ Yosɛfun bibun bweserɑ ko n sɑ̃ɑwɑ nɡe dɔ̃ɔ. Bɑ koo Esɑun bweseru dɔ̃ɔ mɛniwɑ nɡe yɑkɑsu. Bɑ koo bu dɔ̃ɔ mɛniwɑ mɑm mɑm, bɑ ǹ ɡoo derimɔ mi. Nɛ, Yinni Gusunɔwɑ nɑ yeni ɡeruɑ.

¹⁹Yudɑ be bɑ wɑ̃ɑ sɔ̃ɔ yɛ̃sɑn nɔm dwɑru ɡiɑ bɑ koo Edɔmubɑn tem mɛ mwɑ. Be bɑ wɑ̃ɑ wɔwɑɔ, bɑ koo Filisitibɑn tem kɑ Sɑmɑriɡim kɑ Efɑrɑimuɡim mwɑ, kpɑ Bɛnyɑmɛɛbɑ bu mɑɑ Gɑlɑdin tem mwɑ.

²⁰Isirelibɑn tɑbu kowo be bɑ rɑɑ kpikiru suɑ sɑɑ sɔ̃ɔ yɛ̃sɑn nɔm ɡeu ɡiɑn di, bɑ koo Kɑnɑnibɑn tem mwɑ sere n kɑ dɑ Sɑrepɑtɑɔ. Yerusɑlɛmuɡii be bɑ mɑɑ kpikiru dɑ Sefɑrɑdiɔ, bɑ koo wuu si su wɑ̃ɑ sɔ̃ɔ yɛ̃sɑn nɔm dwɑru ɡiɑ mwɑ.

²¹Kɑ nɑsɑrɑwɑ bɑ koo Siɔnin ɡuuru yɔ. Min diyɑ bɑ ko n Edɔmubɑ kpɑre. Kpɑ Yinni Gusunɔ u n bɑndu dii!