Read bariba Yonɑsi 2 Bible Online

Yonɑsi 2 - bariba bible

Yonɑsi 2

¹Yinni Gusunɔ u derɑ swɑ̃ɑ bɑkɑ yɑ Yonɑsi mwɛ. Mɑ u kuɑ wɔ̃kuru itɑ kɑ sɔ̃ɔ sɔɔ itɑ swɑ̃ɑ yen nukurɔ.

²Swɑ̃ɑ yen nukurun diyɑ Yonɑsi u Gusunɔ win Yinni kɑnɑ.

³U nɛɛ, Yinni Gusunɔ, sɑnɑm mɛ nɑ wɑ̃ɑ nuku sɑnkirɑru sɔɔ, nɑ nun nɔɔɡiru sue, mɑ ɑ mɑn wisɑ. Sɑɑ ɡɔribun wɑ̃ɑ yerun di nɑ nun sokɑ. Mɑ ɑ nɛn nɔɔ nuɑ.

⁴Wee ɑ mɑn kpɛ̃ɛ sere nim wɔ̃kun sɔɔwɔ. Mɑ nim mɑn mwɛ. Nim kurenu kpuro mɑn tɑɑre.

⁵Nɑ rɑɑ tii sɔ̃ɔmɔ nɑ mɔ̀, wee ɑ mɑn ɡirɑ wunɛn wuswɑɑn di, nɑ dɑ sere mi n tomɑ. Adɑmɑ wee tɛ̃, kon mɑɑ wunɛn sɑ̃ɑ yee dɛɛrɑru wɑ.

⁶Nim mɑn mwɛ sere nɑ kĩ n ɡbi. Mu mɑn wukiri, mɑ yɑkɑ si su wɑ̃ɑ mɛn sɔɔwɔ su mɑn tɛ̃kusi sere wirɔ.

⁷Nɑ numɑ nɑ dɑ sere ɡuunun kpɛɛkpɛɛkuɔ, mɑ tem sɔɔwɔn ɡɑmbobɑ bɑ mɑn kɛnusi dim dim. Adɑmɑ Gusunɔ nɛn Yinni, ɑ mɑn yɑrɑ min di wɑsiru.

⁸Sɑnɑm mɛ nɑ kom yɑɑ biɑ nɑ wunɛ Yinni Gusunɔ yɑɑyɑ, mɑ ɑ nɛn kɑnɑru nuɑ wunɛn sɑ̃ɑ yee dɛɛrɑrun mi.

⁹Be bɑ bũnu sɑ̃ɑmɔ, bɑ ǹ mɑɑ wunɛn durom wɑsi.

¹⁰Adɑmɑ nɛ, kon nun yɑ̃kuru kuɑ. Kon nun siɑrɑ, kpɑ n nɛn nɔɔ mwɛɛru yibiɑ. Yinni Gusunɔ, wunɑ ɑ rɑ mɑn fɑɑbɑ ko.

¹¹Sɑɑ yerɑ Yinni Gusunɔ u swɑ̃ɑ ye sɔ̃ɔwɑ u nɛɛ, yu doo yu Yonɑsi siɑ kɑsɑɔ. Mɑ swɑ̃ɑ ye, yɑ dɑ kɑsɑɔ yɑ Yonɑsi siɑ.