Read bariba Gbɑburu 2 Bible Online

Gbɑburu 2 - bariba bible

Gbɑburu 2

¹Yinni Gusunɔ u Mɔwisi kɑ Aroni sɔ̃ɔwɑ u nɛɛ,

²Isirelibɑ bɑ̀ n ben sɑnsɑni ɡirɑmɔ, ben bɑɑwure u koo win kuru ɡirɑwɑ win bweserun ɡidi bɔrɑn bɔkuɔ. Bɑ koo ben kuu ni ɡirɑwɑ bu kɑ nɛ, Yinni Gusunɔn kuu te sikerenɑ, kpɑ beɡii ni, nu n kɑ tu dɛsire fiiko.

³Sɔ̃ɔ yɑri yeru ɡiɑrɑ Yudɑbɑ bɑ koo ben sɑnsɑni ɡirɑ ben ɡidi bɔrɑn bɔkuɔ be, kɑ ben tɑbu kowobu. Ben tɑbu sunɔn yĩsirɑ Nɑsoni, Aminɑdɑbun bii.

⁴Win tɑbu kowobun ɡeerɑ sɑ̃ɑwɑ nɔrɔbun subɑ wɑtɑ kɑ wɔkurɑ nnɛ kɑ nɑtɑ (74.600).

⁵Be bɑ ko n wɑ̃ɑ ben wuuru sɔɔ berɑ, Isɑkɑrin bwese kɛrɑ kɑ Sɑbulonin bwese kɛrɑ. Isɑkɑrin tɑbu sunɔn yĩsirɑ Nɛtɑnɛɛli, Suɑrin bii. Win tɑbu kowobun ɡeerɑ sɑ̃ɑwɑ nɔrɔbun subɑ weerɑɑkuru kɑ nnɛ kɑ nɛɛru (54.400). Sɑbulonibɑn tɑbu sunɔn yĩsirɑ Eliɑbu, Helonin bii.

⁸Win tɑbu kowobun ɡeerɑ sɑ̃ɑwɑ nɔrɔbun subɑ weerɑɑkuru kɑ nɔɔbɑ yiru kɑ nɛɛru (57.400).

⁹Be kpurowɑ bɑ sɑ̃ɑ Yudɑbɑn tɑbu kowobu mɑ ben ɡeerɑ kuɑ nɔrɔbun subɑ wunɔbu kɑ wɛnɛ kɑ nɔɔbɑ tiɑ kɑ nɛɛru (186.400). Isirelibɑ bɑ̀ n sɑnum seewɑ, berɑ bɑ ko n dɑ ɡbi.

¹⁰Sɔ̃ɔ yɛ̃sɑn nɔm dwɑru ɡiɑrɑ Rubɛnibɑ bɑ koo ben sɑnsɑni ɡirɑ ben ɡidi bɔrɑn bɔkuɔ be, kɑ ben tɑbu kowobu. Ben tɑbu sunɔn yĩsirɑ Elisuri, Sedeurin bii.

¹¹Ben tɑbu kowobun ɡeerɑ sɑ̃ɑwɑ tɔmbu nɔrɔbun subɑ weeru kɑ nɔɔbɑ tiɑ kɑ nɛɛrɑ wunɔbu (46.500).

¹²Be bɑ ko n wɑ̃ɑ ben wuuru sɔɔ, berɑ Simɛɔn bwese kɛrɑ kɑ Gɑdin bwese kɛrɑ. Simɛɔbɑn tɑbu sunɔn yĩsirɑ Selumiɛli, Surisɑdɑin bii. Ben tɑbu kowobu bɑ sɑ̃ɑwɑ tɔmbu nɔrɔbun subɑ weerɑɑkuru kɑ nɔɔbɑ nnɛ kɑ ɡoobɑ wunɔbu (59.300). Gɑdiɡibun tɑbu sunɔn yĩsirɑ Eliɑsɑfu, Dewɛlin bii.

¹⁵Ben tɑbu kowobɑ sɑ̃ɑwɑ tɔmbu nɔrɔbun subɑ weeru kɑ nɔɔbu kɑ nɑtɑ kɑ weerɑɑkuru (45.650).

¹⁶Be kɑ Rubɛnin tɑbu kowobu kpuro bɑ sɑ̃ɑwɑ tɔmbu nɔrɔbun subɑ wunɔbu kɑ weerɑɑkuru kɑ tiɑ kɑ nɛɛru kɑ weerɑɑkuru (151.450). Beyɑ bɑ koo ko yiruse bɑ̀ n swɑɑ wɔriɔ.

¹⁷Yen biru, Lefibɑ bɑ koo Yinni Gusunɔn kuru suɑ kpɑ bɑ n wɑ̃ɑ tɑbu kowo wuunu yiru ye yɑ ɡbiɑ kɑ wuunu yiru ye yɑ wɑ̃ɑ biruɔn suunu sɔɔ. Ben tii bɑ ko n swĩinɛwɑ nɡe mɛ bɑ rɑ kɑ sinɛ sinɛ bɑ̀ n sɑnsɑni ɡirɑmɔ. Ben bɑɑwure u koo yɔ̃rɑwɑ win ɡidi bɔrɑn bɔkuɔ.

¹⁸Sɔ̃ɔ duu yeru ɡiɑrɑ Efɑrɑimubɑ bɑ koo ben sɑnsɑni ɡirɑ ben ɡidi bɔrɑn bɔkuɔ be, kɑ ben tɑbu kowobu. Ben tɑbu sunɔn yĩsirɑ Elisɑmɑ, Amihudun bii.

¹⁹Win tɑbu kowobun ɡeerɑ sɑ̃ɑwɑ tɔmbu nɔrɔbun subɑ weeru kɑ nɛɛrɑ wunɔbu (40.500).

²⁰Ben wuuru sɔɔrɑ Mɑnɑsebɑ kɑ Bɛnyɑmɛɛbɑ bɑ koo ben sɑnsɑni ɡirɑ. Mɑnɑsebɑn tɑbu sunɔn yĩsirɑ Gɑmuliɛli, Pedɑsurin bii. Win tɑbu kowobun ɡeerɑ sɑ̃ɑwɑ tɔmbu nɔrɔbun subɑ tɛnɑ kɑ yiru kɑ ɡoobu (32.200). Bɛnyɑmɛɛbɑn tɑbu sunɔwɑ Abidɑni, Gideonin bii. Win tɑbu kowobun ɡeerɑ sɑ̃ɑwɑ tɔmbu nɔrɔbun subɑ tɛnɑ kɑ nɔɔbu kɑ nɛɛru (35.400).

²⁴Be kpuro kɑ Efɑrɑimun tɑbu kowobun ɡeerɑ kuɑwɑ tɔmbu nɔrɔbun subɑ wunɔbu kɑ nɔɔbɑ itɑ kɑ wunɔbu (108.100). Berɑ bɑ ko n sɑ̃ɑ itɑse bɑ̀ n swɑɑ wɔriɔ.

²⁵Sɔ̃ɔ yɛ̃sɑn nɔm ɡeu ɡiɑrɑ Dɑnubɑ bɑ koo mɑɑ ben sɑnsɑni ɡirɑ ben ɡidi bɔrɑn bɔkuɔ be, kɑ ben tɑbu kowobu. Ben tɑbu sunɔn yĩsirɑ Akiesɛɛ, Amisɑdɑin bii.

²⁶Win tɑbu kowobun ɡeerɑ sɑ̃ɑwɑ tɔmbu nɔrɔbun subɑ wɑtɑ kɑ yiru kɑ nɑtɑ kɑ wunɔbu (62.700).

²⁷Ben wuuru sɔɔrɑ Asɛɛbɑ kɑ Nɛfitɑlibɑ bɑ koo du. Asɛɛbɑn tɑbu sunɔn yĩsirɑ Pɑɡiɛli, Okirɑnin bii. Ben tɑbu kowobun ɡeerɑ sɑ̃ɑwɑ tɔmbu nɔrɔbun subɑ weeru kɑ tiɑ kɑ nɛɛrɑ wunɔbu (41.500). Nɛfitɑlibɑn tɑbu sunɔn yĩsirɑ Ahirɑ, Enɑnin bii. Win tɑbu kowobun ɡeerɑ sɑ̃ɑwɑ tɔmbu nɔrɔbun subɑ weerɑɑkuru kɑ itɑ kɑ nɛɛru (53.400).

³¹Be kpuro kɑ Dɑnubɑ ben ɡeerɑ kuɑwɑ tɔmbu nɔrɔbun subɑ wunɑɑ wɑtɑ itɑ sɑri kɑ nɑtɑ (157.600). Isirelibɑ bɑ̀ n swɑɑ wɔri, kpɑ ben bɑɑwuren ɡidi bɔrɑ yɑ n bu ɡbiiye, berɑ bɑ koo be bɑ tie swĩi biruɔ.

³²Isireli be bɑ koo kpĩ bu tɑbu ko, ben ɡeerɑ kuɑwɑ nɔrɔbun subɑ nɑtɑ kɑ itɑ kɑ nɛɛrɑ wunɔbu kɑ weerɑɑkuru (603.550). Bɑ bu ɡɑrɑwɑ bwese kɛrɑ kɑ bwese kɛrɑ, yɛnu kɑ yɛnu.

³³Bɑǹ Lefibɑn bweseru ɡɑrɑ yèn sɔ̃ Yinni Gusunɔ u Mɔwisi sɔ̃ɔwɑ u ku bu ɡɑri.

³⁴Mɑ Isirelibɑ bɑ kuɑ mɑm mɑm ye Yinni Gusunɔ u Mɔwisi sɔ̃ɔwɑ. Ben bɑɑwure u win sɑnsɑni ɡirɑwɑ mi ben ɡidi bɔrɑ yɑ ɡire. Yen biru, bɑ̀ n seewɑ bɑ swɑɑ wɔriɔ, bɑ rɑ n swĩinɛwɑ bwese kɛrɑ kɑ bwese kɛrɑ, yɛnu kɑ yɛnu.