Read bariba Misee 1 Bible Online

Misee 1 - bariba bible

Misee 1

¹Yudɑbɑn sinɑ boko Yotɑmu kɑ Akɑsi kɑ Esekiɑsi ben wɑɑti sɔɔrɑ Yinni Gusunɔ u Misee Mɔresɛtiɡii sɔ̃ɔwɑ ye yɑ koo Sɑmɑri kɑ Yerusɑlɛmu deemɑ.

²Bɛɛ bwesenu kpuro, i swɑɑ dɑkio. Bɛɛ hɑnduniɑɡibu, i swɑɑ tem kpĩiyɔ i nɔ. Yinni Gusunɔ u koo nɑ sɑɑ win wɑ̃ɑ yee dɛɛrɑrun di u bɛɛ tɑɑrɛ wɛ̃.

³Wee u yɑrim wee sɑɑ win wɑ̃ɑ yee ten min di, u sĩimɔ ɡuunun wɔllɔ.

⁴Ù n nu tɑɑrɑ, nu rɑ numwɑ. Kpɑ wɔwi yi n yɑndɑmɔ nɡe ɡum yɑrum ǹ kun mɛ nɡe nim mɛ mu sɑrɑm wee ɡunɡunun di.

⁵Isirelibɑ Yɑkɔbun bibun torɑnun sɔ̃nɑ yeni kpuro yɑ koorɑ. Wɑrɑ u Isirelibɑ dɑm kɑ̃ bu kɑ Gusunɔ seesi. Ben wuu mɑro Sɑmɑriwɑ. Wɑrɑ u Yudɑbɑ suremɔ bũu sɑ̃ɑru sɔɔ. Ben wuu mɑro Yerusɑlɛmuwɑ.

⁶Yinni Gusunɔ u nɛɛ, yenibɑrɑ yɑ koo de Sɑmɑri yu ko bɑnsu kpɑ bu resɛm duure mi. U koo yen ɡɑnin kpenu sure sere wɔwɑn sɔɔwɔ. Kpɑ bu yen kpɛɛkpɛɛku wɑ.

⁷Bɑ koo yen bwɑ̃ɑrokunu kpuro kɔsuku. Kɛ̃ɛ ni bɑ rɑɑ wɑ, bɑ koo nu dɔ̃ɔ mɛni. U koo de bu yen bũnun sɑ̃ɑ yɑ̃nu kpuro ɡurɑ. Domi sɑkɑrɑ ɡobiyɑ [1] bɑ kɑ nu dwɑ. Tɛ̃, tɔn tukobu bɑ koo nu ɡurɑ bu kɑ sɑ̃ɑru ko.

⁸Nɛ Misee kon weeweenu ko n swĩ. Kon sĩ tereru, kɑ nɑɑ dirisu. Kon wuri ko nɡe ɡbeeku bɔ̃ɔ. Kpɑ n swĩ nɡe tɑɑtɑɑru.

⁹Sɑmɑrin nɔni swɑ̃ɑ te yɑ wɑ sere tɑ Yudɑbɑ ɡirɑri, tɑ ǹ kpeemɔ. Wee tɑ tunumɑ sere Yerusɑlɛmu nɛn tɔmbun wuun kɔnnɔwɔ.

¹⁰I ku ye kpɑrɑ Gɑtiɔ. I ku mɑɑ swĩ Akoɔ. I bindio tuɑ sɔɔ nuku sɑnkirɑnun sɔ̃ Bɛti Leɑfɑrɑɔ.

¹¹Wee bɛɛ Sɑfiriɡibu bɑ koo bɛɛ yoru mwɛɛri, kpɑ i n wɑ̃ɑ tereru kɑ sekuru sɔɔ. Sɑnɑniɡibu bɑ ǹ kɑ̃kɔ bu yɑri ben wuun di. Bɛtisɑleɡibun weeweenu derɑ bɑ ǹ wɑ̃ɑ yeru mɔ.

¹²Mɑrɔtiɡibu bɑ diirimɔ ben ɑlɑfiɑn sɔ̃. Nɔni swɑ̃ɑ te, tɑ weewɑ Yinni Gusunɔn min di. Tɑ mɑɑ Yerusɑlɛmun ɡbɑ̃rɑ kɔnnɔ ɡirɑri.

¹³Bɛɛ Lɑkisiɡibu i bɛɛn kɛkɛ yi dumi ɡɑwe sɔɔru kowo. Domi i Isirelibɑn dɑɑ kɔ̃sɑ sɑɑrimɔ. Mɑ i derɑ Yerusɑlɛmuɡibu bɑ mɑn seesi.

¹⁴Yen sɔ̃nɑ i ko tɛ̃ kɑrɑnɑ kɑ Mɔresɛti Gɑtiɡibu. Akisibuɡibɑ kun mɑɑ Isirelibɑn sinɑmbu somiru wee.

¹⁵Bɛɛ Mɑresɑɡibu, Yinni Gusunɔ u koo kpɑm bɛɛ yibɛrɛ kpɑo nɔmu sɔndiɑ. Isirelibɑn sinɑ yiikoɡibu bɑ koo dɑ bu kuke kpee te bɑ mɔ̀ Adulɑmuɔ.

¹⁶Bɛɛ Yerusɑlɛmuɡibu, i bɛɛn seri kɔniɔ i wii kpɑrɑnu yi nuku sɑnkirɑnun sɔ̃. I swĩiyɔ bɛɛn bii be i kĩn sɔ̃. Wee bɑ koo bu mwɛɛri bu kɑ dɑ tem tukumɔ.